ਝਗੜੇ ਦੌਰਾਨ ਗੋਲੀ ਚਲਾਉਣ ਦੇ ਦੋਸ਼

ਲੋਹਾਰਾ ਦੇ ਕੈਨਾਲ ਐਵੇਨਿਊ ਇਲਾਕੇ ਵਿੱਚ ਦੋ ਗੁਆਂਢੀਆਂ ਵਿਚਾਲੇ ਗੱਡੀ ਹੌਲੀ ਕਰਨ ਨੂੰ ਲੈ ਕੇ ਹੋਈ ਬਹਿਸ ਨੇ ਭਿਆਨਕ ਝਗੜੇ ਦਾ ਰੂਪ ਧਾਰ ਲਿਆ। ਇੱਕ ਗੁਆਂਢੀ ਨੇ ਦੂਜੇ ’ਤੇ ਗੋਲੀ ਚਲਾਉਣ ਲਗਾਉਣ ਦਾ ਦੋਸ਼ ਲਗਾਇਆ। ਲੋਹਾਰਾ ਪੁਲ ਨੇੜੇ ਵਾਪਰੀ ਘਟਨਾ ਤੋਂ ਬਾਅਦ ਪੁਲੀਸ ਮੌਕੇ ’ਤੇ ਪਹੁੰਚੀ। ਪੁਲੀਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਦੋਵਾਂ ਧਿਰਾਂ ਨੇ ਮਰਾਡੋ ਪੁਲੀਸ ਚੌਕੀ ਵਿੱਚ ਸ਼ਿਕਾਇਤਾਂ ਦਰਜ ਕਰਵਾਈਆਂ ਹਨ। ਪੁਲੀਸ ਨੇੜਲੇ ਸੀ ਸੀ ਟੀ ਵੀ ਕੈਮਰਿਆਂ ਦੀ ਜਾਂਚ ਕਰ ਰਹੀ ਹੈ। ਜਾਣਕਾਰੀ ਦਿੰਦੇ ਹੋਏ ਮਨਦੀਪ ਬੱਸੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਗੁਆਂਢ ਵਿੱਚ ਰਹਿਣ ਵਾਲੇ ਵਿਅਕਤੀ ਨੇ ਆਪਣੀ ਕਾਰ ਚਲਾਉਣ ਲਈ ਇੱਕ ਡਰਾਈਵਰ ਰੱਖਿਆ ਹੈ। ਬੀਤੀ ਰਾਤ ਉਸ ਦਾ ਪੁੱਤਰ ਗਲੀ ਵਿੱਚ ਕੁੱਤਾ ਘੁੰਮਾ ਰਿਹਾ ਸੀ। ਇਸ ਦੌਰਾਨ ਉਥੋਂ ਇੱਕ ਕਾਰ ਚਾਲਕ ਕਾਫ਼ੀ ਤੇਜ਼ ਕਾਰ ਚਲਾ ਰਿਹਾ ਸੀ, ਉਸ ਦੇ ਬੇਟੇ ਨੇ ਮਨ੍ਹਾਂ ਕੀਤਾ ਪਰ ਡਰਾਈਵਰ ਨੇ ਕਾਰ ਹੌਲੀ ਨਹੀਂ ਕੀਤੀ। ਮਨਦੀਪ ਬੱਸੀ ਮੁਤਾਬਕ ਡਰਾਈਵਰ ਨੇ ਬਹਿਸ ਕਰਨੀ ਸ਼ੁਰੂ ਕਰ ਦਿੱਤੀ, ਬਹਿਸ ਤੋਂ ਬਾਅਦ ਮਾਮਲਾ ਹੱਥੋਪਾਈ ਤੱਕ ਪੁੱਜ ਗਿਆ। ਡਰਾਈਵਰ ਧਮਕੀਆਂ ਦਿੰਦਾ ਰਿਹਾ, ਇੰਨਾ ਹੀ ਨਹੀਂ ਉਸ ਨੇ ਪਿਸਤੌਲ ਵੀ ਕੱਢ ਲਈ।

ਮਨਦੀਪ ਨੇ ਦੋਸ਼ ਲਗਾਏ ਹਨ ਕਿ ਮੁਲਜ਼ਮ ਨੇ ਹਵਾਈ ਫਾਇਰ ਵੀ ਕੀਤਾ ਤੇ ਗੋਲੀ ਸੁਣ ਕੇ ਆਸ-ਪਾਸ ਦੇ ਲੋਕ ਵੀ ਇਕੱਠੇ ਹੋ ਗਏ। ਏ ਸੀ ਪੀ ਹਰਜਿੰਦਰ ਸਿੰਘ ਦਾ ਕਹਿਣਾ ਹੈ ਕਿ ਅਸਲ ਵਿੱਚ ਇਹ ਦੋ ਧਿਰਾਂ ਵਿਚਕਾਰ ਲੜਾਈ ਹੋਈ ਹੈ। ਇਸ ਵਿੱਚ ਕੋਈ ਗੋਲੀ ਨਹੀਂ ਚੱਲੀ। ਦੋਵਾਂ ਧਿਰਾਂ ਨੇ ਸ਼ਿਕਾਇਤ ਦਿੱਤੀ ਹੈ। ਪੁਲੀਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।