ਵਰਦਾਨ

ਬਣ ਬੈਠੇ ਭਗਵਾਨ ਬਥੇਰੇ ਪਹਿਲਾਂ ਵੀ

ਵੰਡ ਬੈਠੇ ਵਰਦਾਨ ਬਥੇਰੇ ਪਹਿਲਾਂ ਵੀ

ਅਤਾ ਪਤਾ ਕਿੱਧਰੇ ਨਾ ਲੱਭੇ ਜਿਨ੍ਹਾਂ ਦਾ

ਤਣ ਬੈਠੇ ਸੁਲਤਾਨ ਬਥੇਰੇ ਪਹਿਲਾਂ ਵੀ

ਦਾਅਵਾ ਕਰਦੇ ਰੱਬ ਦੇ ਬੂਹੇ ਖੋਲ੍ਹਣ ਦਾ

ਬਣ ਬੈਠੇ ਦਰਬਾਨ ਬਥੇਰੇ ਪਹਿਲਾਂ ਵੀ

ਮੁਸਲਮਾਨ, ਇਸਾਈ, ਹਿੰਦੂ, ਸਿੱਖ ਹੋ ਕੇ

ਬਣ ਬੈਠੇ ਗੁਣਵਾਨ ਬਥੇਰੇ ਪਹਿਲਾਂ ਵੀ

ਦੇਵਤਿਓ ਨਾ ਵੰਡੋ ਹੋਰ ਗ਼ਰੀਬੀ ਹੁਣ

ਕਰ ਬੈਠੇ ਅਹਿਸਾਨ ਬਥੇਰੇ ਪਹਿਲਾਂ ਵੀ

ਗ਼ਮੀ ਗ਼ਰੀਬੀ ਚੁੱਕ ਦਿਆਂਗੇ ਘਰ-ਘਰ ’ਚੋਂ

ਕਰ ਬੈਠੇ ਫ਼ੁਰਮਾਨ ਬਥੇਰੇ ਪਹਿਲਾਂ ਵੀ

ਤੋੜ ਰਹੇ ਨੇ ਹਾਕਮ ਰੋਜ਼ ਹੀ ਦਿਨ ਚੜ੍ਹਦੇ

ਟੁੱਟ ਬੈਠੇ ਅਰਮਾਨ ਬਥੇਰੇ ਪਹਿਲਾਂ ਵੀ

ਨਵਿਆਂ ਨੇ ਵੀ ਆਪਣੇ ਆਪਣੇ ਸਿਰਜ ਲਏ

ਮੱਲ ਬੈਠੇ ਅਸਮਾਨ ਬਥੇਰੇ ਪਹਿਲਾਂ ਵੀ

ਰੋਜ਼ ਲੜਾਈ ਹੁੰਦੀ ਪਈ ਹੈ ਧਰਮਾਂ ਦੀ

ਕਰ ਬੈਠੇ ਅਪਮਾਨ ਬਥੇਰੇ ਪਹਿਲਾਂ ਵੀ

ਅਣਜੋੜਾਂ ਦੀ ਗੱਲ ਅਜੇ ਵੀ ਮੁੱਕੀ ਨਹੀਂ

ਜਣ ਬੈਠੇ ਸਲਵਾਨ ਬਥੇਰੇ ਪਹਿਲਾਂ ਵੀ

ਰੋਜ਼ ਬਣਾਈ ਜਾਂਦੇ ਕਿਧਰੇ ਨਾ ਕਿਧਰੇ

ਬਣ ਬੈਠੇ ਸ਼ਮਸ਼ਾਨ ਬਥੇਰੇ ਪਹਿਲਾਂ ਵੀ

ਵੱਖਰੀ ਸੁਰ ਦਾ ਦਾਅਵਾ ਐਵੇਂ ਨਾ ਕਰੀਏ

ਲਿਖ ਬੈਠੇ ਅਨੁਵਾਨ ਬਥੇਰੇ ਪਹਿਲਾਂ ਵੀ

ਆਪ ਬਣੇ ਭਗਵਾਨ ਵੀ ਜਿੱਤਦੇ ਹਰਦੇ ਨੇ

ਬਣ ਬੈਠੇ ਭਲਵਾਨ ਬਥੇਰੇ ਪਹਿਲਾਂ ਵੀ

ਵੇਂਹਦੇ ਵੇਂਹਦਿਆਂ ‘ਸ਼ਾਮ’ ਹੋ ਗਈ ਦੇਰ ਬੜੀ

ਐਸੇ ਹੋਏ ਘਮਸਾਨ ਬਥੇਰੇ ਪਹਿਲਾਂ ਵੀ।

ਸੰਪਰਕ: 98141-13338

* * *