ਕਪੂਰਥਲਾ ਜੇਲ੍ਹ ਹਿੰਸਾ ਦਾ ਮੁੱਖ ਸਾਜ਼ਿਸ਼ਕਰਤਾ 2024 ਦੀ ਗੁਰਦਾਸਪੁਰ ਜੇਲ੍ਹ ਹਿੰਸਾ ਵਿੱਚ ਵੀ ਸੀ ਸ਼ਾਮਲ: ਪੁਲੀਸ

ਕਪੂਰਥਲਾ ਜੇਲ੍ਹ ਵਿੱਚ ਹੋਈ ਭੰਨ-ਤੋੜ, ਹਿੰਸਾ ਅਤੇ ਅੱਗ ਲਗਾਉਣ ਦੇ ਮਾਮਲੇ ਵਿੱਚ ਜਿਸ ਮੁੱਖ ਮੁਲਜ਼ਮ ਦਾ ਨਾਮ ਸਾਹਮਣੇ ਆਇਆ ਹੈ, ਉਸ ਦੀ ਪਛਾਣ ਇੱਕ ਅਜਿਹੇ ਕੈਦੀ ਵਜੋਂ ਹੋਈ ਹੈ ਜੋ ਪਹਿਲਾਂ ਸਾਲ 2024 ਵਿੱਚ ਗੁਰਦਾਸਪੁਰ ਜੇਲ੍ਹ ਵਿੱਚ ਹੋਈ ਬਿਲਕੁਲ ਇਸੇ ਤਰ੍ਹਾਂ ਦੀ ਇੱਕ ਘਟਨਾ ਵਿੱਚ ਵੀ ਸ਼ਾਮਲ ਸੀ।

ਹਾਲ ਹੀ ਵਿੱਚ ਹੋਈ ਹਿੰਸਾ ਦੇ ਸਬੰਧ ਵਿੱਚ ਕੇਂਦਰੀ ਜੇਲ੍ਹ, ਕਪੂਰਥਲਾ ਦੇ 31 ਕੈਦੀਆਂ ਖ਼ਿਲਾਫ਼ ਐੱਫ ਆਈ ਆਰ (FIR) ਦਰਜ ਕੀਤੀ ਗਈ ਹੈ। ਲੁਧਿਆਣਾ ਦੇ ਪੁਲੀਸ ਕਮਿਸ਼ਨਰ ਸਵਪਨ ਸ਼ਰਮਾ ਦੀ ਅਗਵਾਈ ਹੇਠ ਇਸ ਘਟਨਾ ਦੀ ਸੂਬਾ ਪੱਧਰੀ ਜਾਂਚ ਦੇ ਹੁਕਮ ਦਿੱਤੇ ਗਏ ਹਨ। ਇਹ ਜਾਂਚ ਕਪੂਰਥਲਾ ਜੇਲ੍ਹ ਵਿੱਚ 23-24 ਮਈ ਦੀ ਰਾਤ ਨੂੰ ਹੋਈ ਹਿੰਸਾ ਦੇ ਕਾਰਨਾਂ ਤੇ ਲਾਪਰਵਾਹੀਆਂ ਦਾ ਪਤਾ ਲਗਾਏਗੀ ਅਤੇ ਇਸ ਨੂੰ ਸੁਧਾਰਨ ਦੇ ਉਪਾਅ ਸੁਝਾਏਗੀ।

ਕਪੂਰਥਲਾ ਜੇਲ੍ਹ ਹਿੰਸਾ ਦੇ ਚਾਰ ਮੁੱਖ ਸਾਜ਼ਿਸ਼ਕਰਤਾਵਾਂ ਦੀ ਪਛਾਣ ਗੁਰਪ੍ਰਤਾਪ ਸਿੰਘ (ਸੇਖਵਾਂ, ਗੁਰਦਾਸਪੁਰ), ਖੁਸ਼ਹਾਲਵੀਰ ਸਿੰਘ (ਤਰਨਤਾਰਨ), ਸਰਵਣ ਸਿੰਘ (ਅੰਮ੍ਰਿਤਸਰ) ਅਤੇ ਬਲਰਾਮ ਬੱਲੂ (ਸੁਲਤਾਨਪੁਰ ਲੋਧੀ) ਵਜੋਂ ਹੋਈ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਨ੍ਹਾਂ ਚਾਰਾਂ ਖ਼ਿਲਾਫ਼ ਐੱਨ ਡੀ ਪੀ ਐੱਸ (NDPS) ਐਕਟ ਸਮੇਤ ਕਈ ਮਾਮਲੇ ਦਰਜ ਹਨ।

ਅਧਿਕਾਰੀਆਂ ਨੇ ਦੱਸਿਆ ਕਿ ਗੁਰਪ੍ਰਤਾਪ 2024 ਵਿੱਚ ਗੁਰਦਾਸਪੁਰ ਜੇਲ੍ਹ ਵਿੱਚ ਹੋਈ ਹਿੰਸਾ 'ਚ ਵੀ ਸ਼ਾਮਲ ਸੀ, ਜਿੱਥੇ ਕੈਦੀ ਜੇਲ੍ਹ ਦੀ ਛੱਤ 'ਤੇ ਚੜ੍ਹ ਗਏ ਸਨ। ਅਧਿਕਾਰੀਆਂ ਨੇ ਕਿਹਾ ਕਿ ਕਪੂਰਥਲਾ ਜੇਲ੍ਹ ਹਿੰਸਾ ਮਾਮਲੇ ਦੇ ਮੁਲਜ਼ਮਾਂ ਨੂੰ ਪੁੱਛਗਿੱਛ ਲਈ ਪ੍ਰੋਡਕਸ਼ਨ ਵਾਰੰਟ 'ਤੇ ਵੀ ਲਿਆਂਦਾ ਜਾਵੇਗਾ।

ਲੁਧਿਆਣਾ ਦੇ ਸੀ ਪੀ ਸਵਪਨ ਸ਼ਰਮਾ ਦੀ ਅਗਵਾਈ ਵਾਲੀ ਸੂਬਾ ਪੱਧਰੀ ਜਾਂਚ ਤੋਂ ਇਲਾਵਾ, ਇਸ ਮਾਮਲੇ ਦੀ ਜਾਂਚ ਕਪੂਰਥਲਾ ਦੀ ਇੱਕ ਐੱਸ ਆਈ ਟੀ (SIT) ਵੱਲੋਂ ਵੀ ਕੀਤੀ ਜਾ ਰਹੀ ਹੈ, ਜਿਸ ਵਿੱਚ ਡੀ ਐੱਸ ਪੀ ਸ਼ੀਤਲ ਸਿੰਘ (ਕਪੂਰਥਲਾ), ਐੱਸ ਐੱਚ ਓ ਸਾਈਬਰ ਕਰਾਈਮ (ਕਪੂਰਥਲਾ), ਏ ਸੀ ਪੀ ਵੈਸਟ (ਕਪੂਰਥਲਾ) ਅਤੇ ਜਲੰਧਰ ਪੁਲੀਸ ਕਮਿਸ਼ਨਰੇਟ ਦੇ ਮੈਂਬਰ ਸ਼ਾਮਲ ਹਨ।

ਜ਼ਿਕਰਯੋਗ ਹੈ ਕਿ 23-24 ਮਈ ਦੀ ਰਾਤ ਨੂੰ, ਕਪੂਰਥਲਾ ਜੇਲ੍ਹ ਬਲਾਕ ਦੀ ਬੈਰਕ ਨੰਬਰ 4 ਵਿੱਚ ਬੰਦ 100 ਤੋਂ 150 ਕੈਦੀ ਬਾਹਰ ਨਿਕਲ ਆਏ ਅਤੇ ਜੇਲ੍ਹ ਵਿੱਚ ਤੋੜ-ਫੋੜ ਕੀਤੀ। ਉਨ੍ਹਾਂ ਨੇ ਸਰਕਾਰੀ ਜਾਇਦਾਦ ਨੂੰ ਅੱਗ ਲਗਾ ਦਿੱਤੀ, ਗੇਟ ਅਤੇ ਗਰਿੱਲਾਂ ਤੋੜ ਦਿੱਤੀਆਂ। ਉਨ੍ਹਾਂ ਨੇ ਪੁਲੀਸ 'ਤੇ 'ਧੱਕੇਸ਼ਾਹੀ' ਦੇ ਦੋਸ਼ ਵੀ ਲਗਾਏ ਸਨ।