ਫੱਤੂ ਢੀਂਗਾ ਬਲਾਕ ਦੇ ਚੇਅਰਮੈਨ ਅਤੇ ਵਾਈਸ ਚੇਅਰਮੈਨ ਦੇ ਅਹੁਦਿਆਂ ’ਤੇ ਰਾਣਾ ਧੜਾ ਕਾਬਜ਼

ਸੁਲਤਾਨਪੁਰ ਲੋਧੀ ਦੇ ਫੱਤੂ ਢੀਂਗਾ ਬਲਾਕ ਲਈ ਇਹ ਚੋਣ ਕਪੂਰਥਲਾ ਡੀਸੀ ਦਫ਼ਤਰ ਵਿੱਚ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦੇ ਆਬਜ਼ਰਵਰ ਦੀ ਹਾਜ਼ਰੀ ਵਿੱਚ ਹੋਈ। ਇਸ ਦੌਰਾਨ ਆਜ਼ਾਦ ਵਿਧਾਇਕ ਰਾਣਾ ਇੰਦਰ ਪ੍ਰਤਾਪ ਦੇ ਧੜੇ ਨੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰਾਂ ਨੂੰ ਮਾਤ ਦਿੱਤੀ। ਰਾਣਾ ਦੀ ਸਮਰਥਕ ਮਨਵੀਰ ਕੌਰ ਕੁੱਲ 16 ਵੋਟਾਂ ਵਿੱਚੋਂ 9 ਵੋਟਾਂ ਹਾਸਲ ਕਰਕੇ ਚੇਅਰਪਰਸਨ ਚੁਣੀ ਗਈ। ਰਾਣਾ ਨੇ ਵੀ ਬਤੌਰ ਵਿਧਾਇਕ ਆਪਣੀ ਵੋਟ ਪਾਈ।

ਵਾਈਸ ਚੇਅਰਪਰਸਨ ਦੇ ਅਹੁਦੇ ਲਈ 8-8 ਵੋਟਾਂ ਨਾਲ ਮੁਕਾਬਲਾ ਬਰਾਬਰ (ਡਰਾਅ) ਰਿਹਾ। ਪਰਚੀ ਕੱਢਣ (ਚਿੱਟ ਪਿਕਿੰਗ) ਦੌਰਾਨ ਇਹ ਅਹੁਦਾ ਵੀ ਰਾਣਾ ਦੇ ਧੜੇ ਦੀ ਦਲਜੀਤ ਕੌਰ ਦੇ ਹਿੱਸੇ ਆਇਆ। ਵਾਈਸ ਚੇਅਰਪਰਸਨ ਦੇ ਅਹੁਦੇ ਲਈ ਵੋਟਿੰਗ ਦੌਰਾਨ ਬਾਰੇ ਰਾਣਾ ਨੇ ਕਿਹਾ, "ਇੱਕ ਉਮੀਦਵਾਰ ਨੇ ਪੇਪਰ ਬੈਲਟ 'ਤੇ ਗਲਤ ਮੋਹਰ ਲਗਾ ਦਿੱਤੀ ਸੀ ਜੋ ਕਿ ਫੋਲਡ ਹੋ ਗਈ ਸੀ। ਕਿਉਂਕਿ ਪ੍ਰਮਾਤਮਾ ਸਾਡੇ ਪੱਖ ਵਿੱਚ ਸੀ, ਸਾਡਾ ਉਮੀਦਵਾਰ ਆਖਰਕਾਰ ਡਰਾਅ ਵਿੱਚ ਵੀ ਜਿੱਤ ਗਿਆ।"

ਪੋਲਿੰਗ ਸੈਂਟਰ ਤੋਂ ਬਾਹਰ ਆ ਕੇ ਰਾਣਾ ਨੇ ਵੋਟਰਾਂ ਅਤੇ ਆਪਣੇ ਸ਼ੁਭਚਿੰਤਕਾਂ ਅਤੇ ਵਿਸ਼ੇਸ਼ ਤੌਰ 'ਤੇ ਆਪਣੇ ਪਿਤਾ - ਕਪੂਰਥਲਾ ਤੋਂ ਕਾਂਗਰਸੀ ਵਿਧਾਇਕ ਰਾਣਾ ਗੁਰਜੀਤ ਸਿੰਘ ਦਾ ਧੰਨਵਾਦ ਕੀਤਾ।