'ਵਾਹਿਗੁਰੂ' ਤੁਹਾਨੂੰ ਸਮਝ ਬਖਸ਼ੇ': BJP 'ਚ ਸ਼ਾਮਲ ਹੋਣ ਤੋਂ ਬਾਅਦ Harbhajan Singh ਦੀ ਪਹਿਲੀ ਸਿਆਸੀ ਪੋਸਟ
ਸੋਸ਼ਲ ਮੀਡੀਆ 'ਤੇ ਮਚਿਆ ਹੰਗਾਮਾ; ਲੋਕਾਂ ਨੇ ਦੱਸਿਆ 'ਗੱਦਾਰ'
ਦਿਗਜ ਕ੍ਰਿਕਟਰ ਅਤੇ ਰਾਜ ਸਭਾ ਮੈਂਬਰ ਹਰਭਜਨ ਸਿੰਘ, ਜੋ ਕਰੀਬ ਤਿੰਨ ਹਫ਼ਤੇ ਪਹਿਲਾਂ ਆਮ ਆਦਮੀ ਪਾਰਟੀ ਛੱਡ ਕੇ ਭਾਰਤੀ ਜਨਤਾ ਪਾਰਟੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਜਨਤਕ ਤੌਰ 'ਤੇ ਬਿਲਕੁਲ ਚੁੱਪ ਸਨ, ਨੇ ਅੱਜ ਸ਼ਾਮ ਆਪਣੀ ਪਹਿਲੀ ਸਿਆਸੀ ਸੋਸ਼ਲ ਮੀਡੀਆ ਪੋਸਟ ਨਾਲ ਇੱਕ ਨਵਾਂ ਹੰਗਾਮਾ ਖੜ੍ਹਾ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਆਪਣੇ 'ਐਕਸ' (X) ਖਾਤੇ 'ਤੇ ਕੁਰਾਲੀ ਵਿਖੇ ਦਾਦਾ-ਦਾਦੀ ਦੇ ਸਾਹਮਣੇ ਇੱਕ ਚਾਰ ਸਾਲ ਦੀ ਬੱਚੀ ਦੇ ਕਥਿਤ ਅਗਵਾ ਦੀ ਖ਼ਬਰ ਦੀ ਵੀਡੀਓ ਸਾਂਝੀ ਕਰਦਿਆਂ ਲਿਖਿਆ, "ਪੰਜਾਬ ਵਿੱਚ ਕੀ ਚੱਲ ਰਿਹਾ ਹੈ। ਮੈਂ ਪੰਜਾਬ ਪੁਲੀਸ ਦੇ ਡੀਜੀਪੀ ਨੂੰ ਬੇਨਤੀ ਕਰਦਾ ਹਾਂ ਕਿ ਉਹ ਇਸ ਮਾਮਲੇ ਨੂੰ ਦੇਖਣ ਅਤੇ ਪਰਿਵਾਰ ਦੀ ਮਦਦ ਕਰਨ।" ਹਾਲਾਂਕਿ ਇਹ ਅਗਵਾ ਦਾ ਮਾਮਲਾ ਇੱਕ ਵਿਆਹੁਤਾ ਵਿਵਾਦ ਅਤੇ ਬੱਚੇ ਦੀ ਕਸਟਡੀ ਦੇ ਕੇਸ ਨਾਲ ਜੁੜਿਆ ਜਾਪਦਾ ਸੀ, ਪਰ ਭੱਜੀ ਦੀ ਪੋਸਟ ਤੋਂ ਬਾਅਦ ਇਸ ਨੇ ਇੱਕ ਬਿਲਕੁਲ ਵੱਖਰਾ ਰੂਪ ਲੈ ਲਿਆ।
ਇਸ ਪੋਸਟ 'ਤੇ ਅਮਰੀਕਾ ਸਥਿਤ ਇੱਕ ਲੇਖਕ ਅਤੇ ਬਲੌਗਰ ਨੇ ਜਵਾਬ ਦਿੰਦਿਆਂ ਲਿਖਿਆ ਕਿ ਪੰਜਾਬ ਨੂੰ ਲੈਕਚਰ ਦੇਣ ਤੋਂ ਪਹਿਲਾਂ ਭੱਜੀ ਨੂੰ ਆਪਣੇ ਨਵੇਂ ਸਿਆਸੀ ਪਰਿਵਾਰ (ਭਾਜਪਾ) ਨੂੰ ਪੁੱਛਣਾ ਚਾਹੀਦਾ ਹੈ ਕਿ ਆਮ ਲੋਕ ਮਹਿੰਗਾਈ ਹੇਠ ਕਿਉਂ ਪਿਸ ਰਹੇ ਹਨ, ਜਦਕਿ ਸੈਲੀਬ੍ਰਿਟੀ ਰਾਤੋ-ਰਾਤ ਨਵੀਂ ਵਿਚਾਰਧਾਰਾ ਲੱਭ ਲੈਂਦੇ ਹਨ। ਉਨ੍ਹਾਂ ਸਰਕਾਰ ਨੂੰ ਰਸੋਈ ਗੈਸ ਦੀਆਂ ਵਧਦੀਆਂ ਕੀਮਤਾਂ, ਬੇਰੁਜ਼ਗਾਰੀ ਅਤੇ ਕਿਸਾਨਾਂ ਦੇ ਟੁੱਟਦੇ ਵਾਅਦਿਆਂ ਦੇ ਮਾਮਲੇ 'ਤੇ ਵੀ ਗਰੀਬ ਪਰਿਵਾਰਾਂ ਦੀ ਮਦਦ ਕਰਨ ਦੀ ਅਪੀਲ ਕੀਤੀ।
ਇਸ ਦੇ ਜਵਾਬ ਵਿੱਚ ਭੱਜੀ ਨੇ ਲੇਖਕ ਨੂੰ ਲਿਖਿਆ, "ਕਿਆ ਬਾਤ ਹੈ ਸਰਦਾਰ ਜੀ। ਤੁਹਾਡਾ ਮਤਲਬ ਇਹ ਹੈ ਕਿ ਉਸ ਵੀਡੀਓ ਵਿੱਚ ਜੋ ਵੀ ਹੋ ਰਿਹਾ ਹੈ ਉਹ ਸਹੀ ਹੈ? ਚਲੋ, ਮੈਂ ਉਮੀਦ ਕਰਦਾ ਹਾਂ ਕਿ ਕਿਸੇ ਦਿਨ ਅਜਿਹਾ ਤੁਹਾਡੇ ਆਪਣੇ ਪਰਿਵਾਰ ਨਾਲ ਨਾ ਹੋਵੇ। ਉੱਠੋ ਅਤੇ ਸਹੀ ਚੀਜ਼ ਲਈ ਖੜ੍ਹੇ ਹੋਵੋ। ਇਹ ਕਿਸੇ ਪਾਰਟੀ ਦਾ ਮਾਮਲਾ ਨਹੀਂ, ਇਹ ਇਨਸਾਨੀਅਤ ਦਾ ਮਾਮਲਾ ਹੈ। ਵਾਹਿਗੁਰੂ ਤੁਹਾਨੂੰ ਸਮਝ ਬਖਸ਼ੇ।"
ਹਰਭਜਨ ਸਿੰਘ ਦੇ ਇਸ ਜਵਾਬ ਤੋਂ ਬਾਅਦ 'ਆਪ' ਸਮਰਥਕਾਂ ਨੇ ਉਨ੍ਹਾਂ ਨੂੰ ਤਿੱਖੇ ਕਮੈਂਟਸ ਨਾਲ ਟ੍ਰੋਲ ਕਰਨਾ ਸ਼ੁਰੂ ਕਰ ਦਿੱਤਾ, ਜਿੱਥੇ ਇੱਕ ਯੂਜ਼ਰ ਨੇ ਦਿੱਲੀ ਵਿੱਚ 3 ਸਾਲ ਦੀ ਬੱਚੀ ਨਾਲ ਹੋਏ ਜਬਰ-ਜ਼ਨਾਹ ਦੇ ਮਾਮਲੇ 'ਤੇ ਭਾਜਪਾ ਨੂੰ ਘੇਰਦਿਆਂ ਭੱਜੀ ਦੀ ਚੁੱਪ 'ਤੇ ਸਵਾਲ ਚੁੱਕੇ ਅਤੇ ਬੀਸੀਸੀਆਈ/ਆਈਪੀਐਲ ਦੇ ਕੰਟਰੈਕਟਸ ਦਾ ਤਾਨਾ ਦਿੱਤਾ। ਦੂਜੇ ਯੂਜ਼ਰ ਨੇ ਲਿਖਿਆ ਕਿ ਜੇਕਰ ਇਨਸਾਨੀਅਤ ਪਾਰਟੀ ਲਾਈਨਾਂ ਤੋਂ ਉੱਪਰ ਹੈ ਤਾਂ ਨੀਟ (NEET) ਪੇਪਰ ਲੀਕ ਦੇ ਖ਼ਿਲਾਫ਼ ਵੀ ਆਵਾਜ਼ ਚੁੱਕੀ ਜਾਣੀ ਚਾਹੀਦੀ ਹੈ, ਜਦਕਿ ਇੱਕ ਤੀਜੇ ਯੂਜ਼ਰ ਨੇ ਉਨ੍ਹਾਂ ਨੂੰ 'ਗੱਦਾਰ' ਲਿਖਦਿਆਂ ਕਿਹਾ ਕਿ ਜਿਸ ਇਨਸਾਨ ਨੇ ਆਪਣੇ ਨਿੱਜੀ ਹਿੱਤਾਂ ਲਈ ਪੰਜਾਬ ਦੇ ਲੋਕਾਂ ਦੇ ਭਰੋਸੇ ਨੂੰ ਤੋੜਿਆ ਹੋਵੇ, ਉਹ ਲੋਕਾਂ ਨੂੰ ਸਹੀ ਚੀਜ਼ ਲਈ ਖੜ੍ਹੇ ਹੋਣ ਦਾ ਲੈਕਚਰ ਦੇਣ ਵਾਲਾ ਆਖਰੀ ਵਿਅਕਤੀ ਹੋਣਾ ਚਾਹੀਦਾ ਹੈ।
ਇਸ ਤੋਂ ਪਹਿਲਾਂ ਦਿਨ ਵੇਲੇ, ਭੱਜੀ ਨੇ ਆਪਣੇ ਰਾਜ ਸਭਾ ਸਹਿਯੋਗੀ ਵਿਕਰਮਜੀਤ ਸਿੰਘ ਸਾਹਨੀ ਦੀ ਇੱਕ ਪੋਸਟ ਨੂੰ ਵੀ ਰੀਪੋਸਟ ਕੀਤਾ ਸੀ, ਜਿਸ ਵਿੱਚ ਲਿਖਿਆ ਸੀ ਕਿ ਪੰਜਾਬ ਸਿਰ ਕੁੱਲ ਕਰਜ਼ਾ 5 ਲੱਖ ਕਰੋੜ ਰੁਪਏ ਨੂੰ ਪਾਰ ਕਰਨ ਦੇ ਬਾਵਜੂਦ ਪੰਜਾਬ ਸਰਕਾਰ ਨੇ ਅੱਜ ਮਾਰਕੀਟ ਉਧਾਰ ਰਾਹੀਂ ਫਿਰ 2500 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੈ, ਪਰ ਹੈਰਾਨੀ ਦੀ ਗੱਲ ਹੈ ਕਿ ਹਾਈਕੋਰਟ ਦੇ ਨਿਰਦੇਸ਼ਾਂ ਦੇ ਬਾਵਜੂਦ ਕਰੀਬ 7 ਲੱਖ ਸਰਕਾਰੀ ਕਰਮਚਾਰੀ ਅਤੇ ਪੈਨਸ਼ਨਰ ਅਜੇ ਵੀ ਲਗਪਗ 15,000 ਕਰੋੜ ਰੁਪਏ ਦੇ ਬਕਾਇਆ ਡੀਏ (DA) ਦੇ ਭੱਤਿਆਂ ਦੀ ਉਡੀਕ ਕਰ ਰਹੇ ਹਨ।
