ਨਿੱਜੀ ਪੱਤਰ ਪ੍ਰੇਰਕ
ਜਲੰਧਰ, 2 ਅਕਤੂਬਰ
ਇੱਥੇ ਸੁਰਜੀਤ ਹਾਕੀ ਸਟੇਡੀਅਮ ਵਿੱਚ ਜਾਰੀ ਇਸ ਲੀਗ ਦੇ ਪੂਲ-ਏ ਦੇ ਪਹਿਲੇ ਮੈਚ ਵਿੱਚ ਆਰਜੀਐੱਸ ਹਾਕੀ ਅਕੈਡਮੀ, ਧੰਨੋਵਾਲੀ ਵੱਲੋਂ ਸ਼ੁਰੂ ਤੋਂ ਹੀ ਹਮਲਾਵਰ ਹਾਕੀ ਖੇਡਦੇ ਹੋਏ ਆਰਜੀਐੱਸ ਯੂਥ ਸਪੋਰਟਸ ਕਲੱਬ, ਮਿੱਠਾਪੁਰ ਨੂੰ 5-2 ਨਾਲ ਹਰਾ ਕੇ 3 ਅੰਕ ਹਾਸਲ ਕੀਤੇ । ਅੱਧੇ ਸਮੇਂ ਤੱਕ ਜੇਤੂ ਟੀਮ 4-2 ਨਾਲ ਅੱਗੇ ਸੀ ਅਤੇ ਟੀਮ ਦੇ ਬੀਰੂ ਨੂੰ ‘ਮੈਨ ਆਫ਼ ਦਿ ਮੈਚ’ ਐਲਾਨਿਆ ਗਿਆ। ਪਿਛਲੇ ਲੀਗ ਮੈਚ ਵਿੱਚ ਆਰਜੀਐੱਸ ਹਾਕੀ ਅਕੈਡਮੀ ਧੰਨੋਵਾਲੀ ਨੂੰ ਹੋਈ 3-0 ਦੀ ਕਰਾਰੀ ਹਾਰ ਤੋਂ ਬਾਅਦ, ਪਹਿਲੇ ਰਾਊਂਡ ਗਲਾਸ ਸਪੋਰਟਸ ਇੰਟਰ-ਡਿਵੈਲਪਮੈਂਟ ਸੈਂਟਰ ਹਾਕੀ ਲੀਗ (ਅੰਡਰ-16) ਦੇ ਦੂਜੇ ਮੈਚ ਵਿਚ ਸ਼ਾਨਦਾਰ ਹਾਕੀ ਦਾ ਪ੍ਰਦਰਸ਼ਨ ਕਰਦਿਆਂ ਆਰਜੀਐੱਸ ਯੂਥ ਸਪੋਰਟਸ ਕਲੱਬ ਮਿੱਠਾਪੁਰ ਨੂੰ ਹਰਾਉਣ ਵਿੱਚ ਕਾਮਯਾਬੀ ਰਹੀ।
ਪੂਲ-ਬੀ ਦੇ ਦੂਜੇ ਮੈਚ ਵਿੱਚ ਆਰਜੀਐੱਸ ਏਕਨੂਰ ਹਾਕੀ ਅਕੈਡਮੀ ਤੇਹਾਂਗ ਨੇ ਆਰਜੀਐੱਸ ਜੀਟੀਬੀ ਹਾਕੀ ਅਕੈਡਮੀ ਬਾਬਾ ਬਕਾਲਾ ਨੂੰ ਇਕਤਰਫਾ ਮੈਚ ਵਿਚ 3-0 ਨਾਲ ਹਰਾਇਆ। ਜੇਤੂ ਟੀਮ ਹਾਫ਼ ਟਾਈਮ ਤੱਕ 1-0 ਨਾਲ ਅੱਗੇ ਸੀ ਅਤੇ ਟੀਮ ਦੇ ਹਰਸ਼ਦੀਪ ਸਿੰਘ ਨੂੰ ‘ਮੈਨ ਆਫ਼ ਦਿ ਮੈਚ’ ਐਲਾਨਿਆ ਗਿਆ। ਇਸੇ ਪੂਲ ਵਿੱਚ ਤੀਜੇ ਮੈਚ ਵਿੱਚ ਆਰਜੀਐੱਸ ਗੁਰੂ ਤੇਗ ਬਹਾਦਰ ਹਾਕੀ ਅਕੈਡਮੀ, ਚਰਹੇੜੀ ਨੇ ਆਰਜੀਐੱਸ ਗੋਬਿੰਦ ਸਪੋਰਟਸ ਹਾਕੀ ਅਕੈਡਮੀ, ਕੁੱਕੜ ਪਿੰਡ ਨੂੰ 4-1 ਨਾਲ ਹਰਾਇਆ ਅਤੇ ‘ਮੈਨ ਆਫ ਦਿ ਮੈਚ’ ਜੇਤੂ ਟੀਮ ਦਾ ਲਵਪ੍ਰੀਤ ਸਿੰਘ ਰਿਹਾ । ਪੂਲ-ਬੀ ਦੇ ਆਖਰੀ ਮੈਚ ਵਿੱਚ ਆਰਜੀਐੱਸ ਬਾਬਾ ਪੱਲਾ ਸਪੋਰਟਸ ਕਲੱਬ ਹਾਕੀ ਅਕੈਡਮੀ, ਬੁਤਾਲਾ ਨੇ ਆਰਜੀਐੱਸ ਹਾਕੀ ਅਕੈਡਮੀ, ਰੂਪਨਗਰ ਨੂੰ 7-0 ਨਾਲ ਹਰਾਇਆ। ਨਿੰਬ ਬ੍ਰੇਕ ’ਤੇ ਜੇਤੂ ਟੀਮ 5-0 ਨਾਲ ਅੱਗੇ ਸੀ। ਜੇਤੂ ਟੀਮ ਦੇ ਸੁਖਪ੍ਰੀਤ ਸਿੰਘ ਨੂੰ ‘ਮੈਨ ਆਫ ਦਿ ਮੈਚ’ ਐਲਾਨਿਆ ਗਿਆ।