ਨਿੱਜੀ ਪੱਤਰ ਪ੍ਰੇਰਕ
ਜਲੰਧਰ, 19 ਮਈ
ਪਾਵਰਕੌਮ ਦੀ ਐਨਫੋਰਸਮੈਂਟ ਟੀਮ ਵੱਲੋਂ ਗੈਸਟ ਹਾਊਸ ’ਤੇ ਮਾਰੇ ਗਏ ਛਾਪੇ ਦੌਰਾਨ ਬਿਜਲੀ ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ। ਇਸ ’ਤੇ ਟੀਮ ਨੇ ਗੈਸਟ ਹਾਊਸ ਨੂੰ 10 ਲੱਖ ਰੁਪਏ ਦਾ ਜੁਰਮਾਨਾ ਕੀਤਾ।
ਪਾਵਰਕੌਮ ਅਨੁਸਾਰ ਐਨਫੋਰਸਮੈਂਟ ਟੀਮ ਨੂੰ ਸੂਹ ਮਿਲੀ ਸੀ ਕਿ ਜਲੰਧਰ-ਪਠਾਨਕੋਟ ਹਾਈਵੇਅ ਨੇੜੇ ਧੋਗੜੀ ਰੋਡ ’ਤੇ ਗੈਸਟ ਹਾਊਸ ਬਿਜਲੀ ਚੋਰੀ ਕਰ ਰਿਹਾ ਹੈ। ਟੀਮ ਵੱਲੋਂ ਜਦੋਂ ਗੈਸਟ ਹਾਊਸ ਦੀ ਸਾਲਾਨਾ ਬਿਜਲੀ ਦੀ ਖਪਤ ਦੇਖੀ ਗਈ ਤਾਂ ਉਹ 5 ਹਜ਼ਾਰ ਯੂਨਿਟ ਸੀ ਜਦਕਿ ਗੈਸਟ ਹਾਊਸ ਨੂੰ 20 ਕਿਲੋਵਾਟ ਦਾ ਲੋਡ ਮਨਜ਼ੂਰ ਹੋਇਆ ਹੈ।
ਦੋ ਸੀਨੀਅਰ ਐਕਸੀਅਨਾਂ ਦੀ ਅਗਵਾਈ ਹੇਠ ਇਸ ਟੀਮ ਨੇ ਗੈਸਟ ਹਾਊਸ ਵਿੱਚੋਂ ਬਿਜਲੀ ਦਾ ਮੀਟਰ ਹਟਾ ਕੇ ਜਾਂਚ ਵਾਸਤੇ ਲੈਬਾਰਟਰੀ ਵਿੱਚ ਭੇਜ ਦਿੱਤਾ ਹੈ। ਟੀਮ ਵਿੱਚ ਸ਼ਾਮਲ ਅਧਿਕਾਰੀ ਨੇ ਦੱਸਿਆ ਕਿ ਮੀਟਰ ਵਿੱਚ ਦੋ ਥਾਵਾਂ ਤੋਂ ਛੋਟੇ-ਛੋਟੇ ਸੁਰਾਖ ਕੀਤੇ ਹੋਏ ਸਨ। ਮੀਟਰ ਦੀ ਪਲਾਸਟਿਕ ਬਾਡੀ ਵਿੱਚ ਕੀਤੇ ਗਏ ਇਨ੍ਹਾਂ ਛੋਟੇ ਸੁਰਾਖਾਂ ਰਾਹੀਂ ਤਾਰਾਂ ਕੱਟੀਆਂ ਹੋਈਆਂ ਸਨ। ਟੀਮ ਨੇ ਗੈਸਟ ਹਾਊਸ ਦੇ ਮਾਲਕ ਵਿਰੁੱਧ ਬਿਜਲੀ ਐਕਟ 2003 ਦੀ ਧਾਰਾ 135 ਤਹਿਤ ਮਾਮਲਾ ਦਰਜ ਕੀਤਾ ਹੈ ਤੇ ਉਸ ਵਿਰੁੱਧ ਐੱਫਆਈਆਰ ਦਰਜ ਕੀਤੀ ਗਈ ਹੈ।
ਬਿਜਲੀ ਬਿੱਲ ਨਾ ਭਰਨ ’ਤੇ ਪਟਵਾਰਖਾਨੇ ਦਾ ਕੁਨੈਕਸ਼ਨ ਕੱਟਿਆ
ਪਠਾਨਕੋਟ (ਪੱਤਰ ਪ੍ਰੇਰਕ): ਸੁਜਾਨਪੁਰ ਦੇ ਪਟਵਾਰਖਾਨੇ ਦਾ ਬਿਜਲੀ ਬਿੱਲ ਨਾ ਭਰਨ ਕਰਕੇ ਪਾਵਰਕੌਮ ਨੇ ਪਟਵਾਰਖਾਨੇ ਦਾ ਕੁਨੈਕਸ਼ਨ ਕੱਟ ਦਿੱਤਾ ਜਿਸ ਨਾਲ ਗਰਮੀ ਵਿੱਚ ਪਟਵਾਰੀਆਂ ਅਤੇ ਪਟਵਾਰਖਾਨੇ ਵਿੱਚ ਕੰਮ ਲਈ ਆਉਣ ਵਾਲੇ ਲੋਕਾਂ ਨੂੰ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬਿਜਲੀ ਨਾ ਹੋਣ ਕਾਰਨ ਪਟਵਾਰਖਾਨੇ ਵਿੱਚ ਸਾਰੇ ਕੰਮ ਠੱਪ ਹੋ ਗਏ ਹਨ। ਜਾਣਕਾਰੀ ਅਨੁਸਾਰ ਪਟਵਾਰਖਾਨੇ ਨੇ ਪਾਵਰਕੌਮ ਦੇ 1.43 ਲੱਖ ਰੁਪਏ ਦੇਣੇ ਹਨ। ਇਸ ਕਾਰਨ ਉਪ-ਮੰਡਲ ਸੁਜਾਨਪੁਰ ਵੱਲੋਂ ਬਿਜਲੀ ਸਪਲਾਈ ਕੱਟ ਦਿੱਤੀ ਗਈ ਹੈ। ਐੱਸਡੀਓ ਅਸ਼ਵਨੀ ਕੁਮਾਰ ਨੇ ਕਿਹਾ ਕਿ ਉਚ ਅਧਿਕਾਰੀਆਂ ਦੇ ਨਿਰਦੇਸ਼ਾਂ ਮੁਤਾਬਕ ਇਹ ਕਾਰਵਾਈ ਕੀਤੀ ਗਈ ਹੈ। ਜੇਕਰ ਉਨ੍ਹਾਂ ਕੋਲ ਮਾਲ ਵਿਭਾਗ ਦਾ ਕੋਈ ਪੱਤਰ ਲਿਖਤੀ ਰੂਪ ਵਿੱਚ ਆਉਂਦਾ ਹੈ ਤਾਂ ਫਿਰ ਬਿਜਲੀ ਸਪਲਾਈ ਬਹਾਲ ਕਰ ਦਿੱਤੀ ਜਾਵੇਗੀ।