ਖਿਡਾਰੀਆਂ ਲਈ ਕੋਚ ਨੇ ਸ਼ੁਰੂ ਕੀਤੀ 'ਸ਼ਗਨ ਸਕੀਮ'; ਆਰਥਿਕ ਤੰਗੀ ਕਾਰਨ ਹੁਣ ਨਹੀਂ ਟੁੱਟਣਗੇ ਸੁਪਨੇ

ਨੌਜਵਾਨ ਖਿਡਾਰੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਦਾ ਆਰਥਿਕ ਬੋਝ ਘੱਟ ਕਰਨ ਦੇ ਮਕਸਦ ਨਾਲ ਖੇਡ ਵਿਭਾਗ ਦੇ ਕੋਚ ਸਰਬਜੀਤ ਸਿੰਘ ਹੈਪੀ ਨੇ ਆਪਣੇ 35 ਮੌਜੂਦਾ ਅਤੇ ਪੁਰਾਣੇ ਖਿਡਾਰੀਆਂ ਨਾਲ ਮਿਲ ਕੇ ਇੱਕ ਅਨੋਖੀ 'ਸ਼ਗਨ ਸਕੀਮ' ਸ਼ੁਰੂ ਕੀਤੀ ਹੈ। ਇਸ ਸਕੀਮ ਦਾ ਉਦੇਸ਼ ਕੌਮੀ ਪੱਧਰ (National Level) ਦੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੇ ਹੋਣਹਾਰ ਖਿਡਾਰੀਆਂ ਨੂੰ ਵਿੱਤੀ ਸਹਾਇਤਾ ਪ੍ਰਦਾਨ ਕਰਨਾ ਹੈ, ਜੋ ਅਕਸਰ ਸਫ਼ਰ, ਰਹਿਣ-ਸਹਿਣ ਅਤੇ ਖੇਡਾਂ ਦੇ ਖ਼ਰਚੇ ਚੁੱਕਣ ਵਿੱਚ ਮੁਸ਼ਕਲ ਮਹਿਸੂਸ ਕਰਦੇ ਹਨ।

ਕੋਚ ਸਰਬਜੀਤ ਸਿੰਘ ਹੈਪੀ ਨੇ ਦੱਸਿਆ, "ਬਹੁਤ ਸਾਰੇ ਖਿਡਾਰੀਆਂ ਨੂੰ ਆਪਣੇ ਸਫ਼ਰ ਅਤੇ ਮੁਕਾਬਲਿਆਂ ਦਾ ਖ਼ਰਚਾ ਖੁਦ ਚੁੱਕਣਾ ਪੈਂਦਾ ਹੈ, ਜੋ ਉਨ੍ਹਾਂ ਦੇ ਮਾਪਿਆਂ ਲਈ ਇੱਕ ਵੱਡਾ ਬੋਝ ਹੁੰਦਾ ਹੈ। ਅਸੀਂ ਨਹੀਂ ਚਾਹੁੰਦੇ ਕਿ ਕੋਈ ਵੀ ਪ੍ਰਤਿਭਾਸ਼ਾਲੀ ਖਿਡਾਰੀ ਸਿਰਫ਼ ਇਸ ਲਈ ਖੇਡਾਂ ਛੱਡ ਦੇਵੇ ਕਿਉਂਕਿ ਉਸ ਦਾ ਪਰਿਵਾਰ ਖ਼ਰਚਾ ਨਹੀਂ ਚੁੱਕ ਸਕਦਾ।" ਇਸ ਸਕੀਮ ਤਹਿਤ ਕੋਚ, ਖਿਡਾਰੀ, ਪੁਰਾਣੇ ਸਿਖਿਆਰਥੀ ਅਤੇ ਹੋਰ ਸਹਿਯੋਗੀ ਮਿਲ ਕੇ ਇੱਕ ਸਾਂਝਾ ਫੰਡ ਤਿਆਰ ਕਰਨਗੇ, ਜਿਸ ਦੀ ਵਰਤੋਂ ਖਿਡਾਰੀਆਂ ਨੂੰ ਬਿਨਾਂ ਕਿਸੇ ਆਰਥਿਕ ਚਿੰਤਾ ਦੇ ਵੱਡੇ ਮੁਕਾਬਲਿਆਂ ਵਿੱਚ ਭੇਜਣ ਲਈ ਕੀਤੀ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਹੁਣ ਟੂਰਨਾਮੈਂਟਾਂ ਦੀ ਗਿਣਤੀ ਵੱਧ ਗਈ ਹੈ। ਉਨ੍ਹਾਂ ਨੇ ਤਿੰਨ ਮੁੱਖ ਟੂਰਨਾਮੈਂਟਾਂ—ਇੰਟਰ ਸਟੇਟ ਚੈਂਪੀਅਨਸ਼ਿਪ, ਓਪਨ ਨੈਸ਼ਨਲ ਚੈਂਪੀਅਨਸ਼ਿਪ ਅਤੇ ਜੂਨੀਅਨ ਨੈਸ਼ਨਲ ਚੈਂਪੀਅਨਸ਼ਿਪ ਦੀ ਪਛਾਣ ਕੀਤੀ ਹੈ, ਜਿੱਥੇ ਖਿਡਾਰੀ ਪੈਸਿਆਂ ਦੀ ਚਿੰਤਾ ਕੀਤੇ ਬਿਨਾਂ ਖੇਡ ਸਕਣਗੇ।

ਪਹਿਲੀ ਵਾਰ ਉੱਠਿਆ 50,000 ਰੁਪਏ ਦਾ ਫੰਡ; 5 ਖਿਡਾਰੀਆਂ ਨੂੰ ਮਿਲੀ ਮਦਦ

ਇਸ ਮੁਹਿੰਮ ਨੂੰ ਸ਼ੁਰੂਆਤ ਵਿੱਚ ਹੀ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਸਰਬਜੀਤ ਹੈਪੀ ਦੇ ਇੱਕ ਪੁਰਾਣੇ ਖਿਡਾਰੀ ਨੇ ਇਸ ਫੰਡ ਵਿੱਚ 13,000 ਰੁਪਏ ਦਾ ਯੋਗਦਾਨ ਪਾਇਆ। ਸਾਰਿਆਂ ਦੇ ਸਾਂਝੇ ਯਤਨਾਂ ਸਦਕਾ ਹਾਲ ਹੀ ਵਿੱਚ 50,000 ਰੁਪਏ ਇਕੱਠੇ ਕੀਤੇ ਗਏ, ਜਿਸ ਨਾਲ ਭੁਵਨੇਸ਼ਵਰ ਵਿੱਚ ਹੋਣ ਵਾਲੀ 65ਵੀਂ ਨੈਸ਼ਨਲ ਇੰਟਰ-ਸਟੇਟ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਸੂਬੇ ਦੀ ਮੇਜ਼ਬਾਨੀ ਕਰਨ ਜਾ ਰਹੇ 5 ਖਿਡਾਰੀਆਂ—ਹਰਜੀਤ ਸਿੰਘ, ਮਾਇਆ, ਜਸ਼ਨ, ਕੁਲਬੀਰ ਰਾਮ ਅਤੇ ਰੀਤਿਕਾ ਦੀ ਮਦਦ ਕੀਤੀ ਗਈ ਹੈ। ਹਾਲਾਂਕਿ ਹਰਜੀਤ ਸਿੰਘ ਅਤੇ ਮਾਇਆ ਦੀਆਂ ਟਿਕਟਾਂ ਦਾ ਪ੍ਰਬੰਧ ਪਹਿਲਾਂ ਹੀ ਕੁਝ ਨੇਕ ਦਿਲ ਲੋਕਾਂ ਵੱਲੋਂ ਕੀਤਾ ਜਾ ਚੁੱਕਾ ਸੀ, ਪਰ ਇਸ 50,000 ਰੁਪਏ ਦੇ ਫੰਡ ਦੀ ਵਰਤੋਂ ਦੂਜੇ ਖਿਡਾਰੀਆਂ ਦੀਆਂ ਟਿਕਟਾਂ, ਰਹਿਣ-ਸਹਿਣ, ਖਾਣ-ਪੀਣ ਅਤੇ ਸਥਾਨਕ ਆਵਾਜਾਈ ਦੇ ਖ਼ਰਚਿਆਂ ਲਈ ਕੀਤੀ ਗਈ ਹੈ।

ਕਿਵੇਂ ਚੱਲੇਗੀ ਇਹ ਸਕੀਮ ?

ਇਸ ਫੰਡ ਨੂੰ ਲਗਾਤਾਰ ਚਲਾਉਣ ਲਈ ਫੈਸਲਾ ਕੀਤਾ ਗਿਆ ਹੈ ਕਿ ਹਰ ਟੂਰਨਾਮੈਂਟ ਤੋਂ ਪਹਿਲਾਂ ਹਰੇਕ ਖਿਡਾਰੀ 200 ਰੁਪਏ ਅਤੇ ਇੱਛੁਕ ਕੋਚ 500 ਰੁਪਏ ਦਾ ਯੋਗਦਾਨ ਪਾਉਣਗੇ। ਕੋਚ ਸਰਬਜੀਤ ਸਿੰਘ ਹੈਪੀ ਨੇ ਉਮੀਦ ਜਤਾਈ ਕਿ ਖੇਡਾਂ ਦੇ ਵਿਕਾਸ ਲਈ ਹੋਰ ਲੋਕ ਵੀ ਅੱਗੇ ਆਉਣਗੇ। ਉਨ੍ਹਾਂ ਕਿਹਾ, "ਇੱਥੋਂ ਦੇ ਲੋਕ ਬਹੁਤ ਦਰਿਆਦਿਲ ਹਨ ਅਤੇ ਮੈਨੂੰ ਉਮੀਦ ਹੈ ਕਿ ਖੇਡਾਂ ਦੇ ਖੇਤਰ ਵਿੱਚ ਵੀ ਲੋਕ ਖੁੱਲ੍ਹੇ ਦਿਲ ਨਾਲ ਮਦਦ ਕਰਨਗੇ ਤਾਂ ਜੋ ਹੋਣਹਾਰ ਨੌਜਵਾਨ ਆਪਣੇ ਸੁਪਨੇ ਪੂਰੇ ਕਰ ਸਕਣ।" ਕੌਮੀ ਪੱਧਰ ਦੇ ਖਿਡਾਰੀਆਂ ਮਾਇਆ ਅਤੇ ਹਰਜੀਤ ਸਿੰਘ ਨੇ ਇਸ ਔਖੇ ਸਮੇਂ ਸਾਥ ਦੇਣ ਅਤੇ ਖਿਡਾਰੀਆਂ ਦੇ ਹਿੱਤ ਵਿੱਚ ਸੋਚਣ ਲਈ ਆਪਣੇ ਕੋਚ ਦਾ ਦਿਲੋਂ ਧੰਨਵਾਦ ਕੀਤਾ।