CBSE 10th Result : ਇੱਕ-ਦੁਜੇ ਦੇ ਮੁਕਾਬਲੇਬਾਜ਼ ਜੁੜਵਾਂ ਭਰਾਵਾਂ ਨੇ ਇੱਕ ਬਰਾਬਰ 98 ਫੀਸਦੀ ਅੰਕ ਕੀਤੇ ਹਾਸਲ 

ਜਲੰਧਰ ਦੇ ਏਪੀਜੇ ਸਕੂਲ (ਮਹਾਵੀਰ ਮਾਰਗ) ਵਿੱਚ ਪੜ੍ਹਦੇ ਜੁੜਵਾਂ ਭਰਾਵਾਂ ਅਰਸ਼ ਪੁਰੀ ਅਤੇ ਸਪਰਸ਼ ਪੁਰੀ ਨੇ 10ਵੀਂ ਦੇ ਨਤੀਜਿਆਂ ਵਿੱਚ ਕਮਾਲ ਕਰ ਦਿੱਤਾ ਹੈ। 15 ਅਪਰੈਲ ਨੂੰ ਆਏ ਨਤੀਜਿਆਂ ਵਿੱਚ ਦੋਵਾਂ ਭਰਾਵਾਂ ਨੇ ਇੱਕ ਬਰਾਬਰ 98 ਫ਼ੀਸਦੀ ਅੰਕ ਹਾਸਲ ਕੀਤੇ ਹਨ।

ਇਹ ਜੁੜਵਾਂ ਭਰਾ ਨਾ ਸਿਰਫ਼ ਘਰ, ਜਮਾਤ ਅਤੇ ਸੈਕਸ਼ਨ ਸਾਂਝਾ ਕਰਦੇ ਹਨ, ਸਗੋਂ ਇਨ੍ਹਾਂ ਦੀਆਂ ਆਦਤਾਂ ਅਤੇ ਪੜ੍ਹਨ ਦਾ ਤਰੀਕਾ ਵੀ ਇੱਕੋ ਜਿਹਾ ਹੈ। ਦੋਵਾਂ ਵਿਚਾਲੇ ਹਮੇਸ਼ਾ ਪੜ੍ਹਾਈ ਨੂੰ ਲੈ ਕੇ ਮੁਕਾਬਲਾ ਰਹਿੰਦਾ ਹੈ। ਅਰਸ਼ ਨੇ ਮੁਸਕਰਾਉਂਦੇ ਹੋਏ ਕਿਹਾ, "ਅਸੀਂ ਹਮੇਸ਼ਾ ਲਗਪਗ ਇਕ ਬਰਾਬਰ ਅੰਕ ਲੈਂਦੇ ਰਹੇ ਹਾਂ, ਆਮ ਤੌਰ 'ਤੇ ਸਿਰਫ਼ ਇੱਕ ਜਾਂ ਦੋ ਨੰਬਰਾਂ ਦਾ ਫ਼ਰਕ ਹੁੰਦਾ ਸੀ, ਪਰ ਅਕਸਰ ਸਪਰਸ਼ ਥੋੜ੍ਹਾ ਅੱਗੇ ਨਿਕਲ ਜਾਂਦਾ ਸੀ।"

ਦੋਵੇਂ ਭਰਾਵਾਂ ਦੇ ਮਾਤਾ-ਪਿਤਾ ਡਾਕਟਰ ਹਨ ਅਤੇ ਹੁਣ ਉਹ ਖ਼ੁਦ ਵੀ ਇਸੇ ਰਾਹ 'ਤੇ ਚੱਲਣਾ ਚਾਹੁੰਦੇ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਉਹ ਦੋਵੇਂ ਡਾਕਟਰ ਬਣਨਾ ਚਾਹੁੰਦੇ ਹਨ, ਜੋ ਕਿ ਉਨ੍ਹਾਂ ਦੇ ਘਰ ਦੇ ਮਾਹੌਲ ਅਤੇ ਪਾਲਣ-ਪੋਸ਼ਣ ਤੋਂ ਮਿਲਿਆ ਇੱਕ ਸਾਂਝਾ ਸੁਪਨਾ ਹੈ।

ਪੜ੍ਹਾਈ ਵਿੱਚ ਮਾਹਰ ਹੋਣ ਦੇ ਨਾਲ-ਨਾਲ ਇਹ ਦੋਵੇਂ ਭਰਾ ਜ਼ਿੰਦਗੀ ਦਾ ਆਨੰਦ ਮਾਨਣ ਵਿੱਚ ਵੀ ਵਿਸ਼ਵਾਸ ਰੱਖਦੇ ਹਨ। ਦੋਵੇਂ ਬਾਸਕਟਬਾਲ ਦੇ ਚੰਗੇ ਖਿਡਾਰੀ ਹਨ ਅਤੇ ਪੜ੍ਹਾਈ ਨੂੰ ਬੋਝ ਨਹੀਂ ਮੰਨਦੇ। ਅਰਸ਼ ਨੇ ਦੂਜੇ ਵਿਦਿਆਰਥੀਆਂ ਨੂੰ ਸਲਾਹ ਦਿੰਦੇ ਹੋਏ ਕਿਹਾ, "ਸਾਡੇ ਮਾਪਿਆਂ ਨੇ ਸਾਡੇ 'ਤੇ ਕਦੇ ਦਬਾਅ ਨਹੀਂ ਪਾਇਆ। ਸਾਨੂੰ ਹਮੇਸ਼ਾ ਬਿਨਾਂ ਕਿਸੇ ਤਣਾਅ ਦੇ ਦਿਲਚਸਪੀ ਨਾਲ ਸਿੱਖਣ ਲਈ ਉਤਸ਼ਾਹਿਤ ਕੀਤਾ ਗਿਆ ਹੈ।"

ਦੋਵਾਂ ਵਿੱਚ ਬਹੁਤ ਸਾਰੀਆਂ ਗੱਲਾਂ ਇੱਕੋ ਜਿਹੀਆਂ ਹੋਣ ਦੇ ਬਾਵਜੂਦ ਕੁਝ ਫ਼ਰਕ ਵੀ ਹਨ। ਅਰਸ਼ ਨੂੰ ਸ਼ਤਰੰਜ ਖੇਡਣ ਦਾ ਸ਼ੌਕ ਹੈ, ਜਦਕਿ ਸਪਰਸ਼ ਨੂੰ ਸੰਗੀਤ ਦੇ ਸਾਜ਼ ਵਜਾਉਣਾ ਪਸੰਦ ਹੈ, ਜੋ ਉਨ੍ਹਾਂ ਦੀ ਇੱਕੋ ਜਿਹੀ ਜੀਵਨ ਸ਼ੈਲੀ ਨੂੰ ਥੋੜ੍ਹਾ ਵੱਖਰਾ ਬਣਾਉਂਦਾ ਹੈ।

ਜੁੜਵਾਂ ਭਰਾਵਾਂ ਨੇ ਆਪਣੀ ਸਫਲਤਾ ਦਾ ਸਿਹਰਾ ਆਪਣੇ ਸਕੂਲ ਅਤੇ ਅਧਿਆਪਕਾਂ ਸਿਰ ਵੀ ਬੰਨ੍ਹਿਆ। ਉਨ੍ਹਾਂ ਕਿਹਾ, "ਸਾਡੇ ਅਧਿਆਪਕਾਂ ਨੇ ਹਮੇਸ਼ਾ ਸਾਡਾ ਸਾਥ ਦਿੱਤਾ ਅਤੇ ਸਾਨੂੰ ਉਤਸ਼ਾਹਿਤ ਕੀਤਾ।"