Viral reel stunt: ਨੌਜਵਾਨ ਨੇ ਟਰੈਂਡਿੰਗ ਰੀਲ ਬਣਾਉਣ ਲਈ ਫਲਾਈਓਵਰ ਤੋਂ ਪੈਸੇ ਸੁੱਟੇ; ਕੇਸ ਦਰਜ

Viral reel stunt: ਪਾਣੀਪਤ ਦੇ ਸਭ ਤੋਂ ਵਿਅਸਤ ਫਲਾਈਓਵਰ 'ਤੇ ਇੱਕ ਕਥਿਤ ਸੋਸ਼ਲ ਮੀਡੀਆ ਸਟੰਟ ਉਸ ਸਮੇਂ ਹਫੜਾ-ਦਫੜੀ ਵਿੱਚ ਬਦਲ ਗਿਆ ਜਦੋਂ ਇੱਕ ਵਿਅਕਤੀ ਨੇ ਵਾਇਰਲ ਰੀਲ ਬਣਾਉਣ ਲਈ ਨੈਸ਼ਨਲ ਹਾਈਵੇ-44 ਦੇ ਉੱਪਰੋਂ ਕਰੰਸੀ ਨੋਟ ਸੁੱਟ ਦਿੱਤੇ। ਇਸ ਘਟਨਾ ਕਾਰਨ ਆਵਾਜਾਈ ਵਿੱਚ ਵਿਘਨ ਪਿਆ ਅਤੇ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਣ ਤੋਂ ਬਾਅਦ ਪੁਲੀਸ ਨੂੰ ਕਾਰਵਾਈ ਕਰਨੀ ਪਈ।

ਸਿਟੀ ਪੁਲੀਸ ਪਾਣੀਪਤ ਅਨੁਸਾਰ ਇਹ ਘਟਨਾ ਪਾਣੀਪਤ ਵਿੱਚ ਦਿੱਲੀ-ਅੰਬਾਲਾ ਐੱਨਐੱਚ-44 ਉੱਤੇ ਸਥਿਤ ਇੱਕ ਫਲਾਈਓਵਰ 'ਤੇ ਵਾਪਰੀ ਹੈ। ਹਾਲਾਂਕਿ, ਘਟਨਾ ਦੀ ਤਰੀਕ ਅਜੇ ਨਿਰਧਾਰਤ ਨਹੀਂ ਕੀਤੀ ਗਈ ਹੈ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਇੱਕ ਵੀਡੀਓ ਵਿੱਚ ਇੱਕ ਵਿਅਕਤੀ ਨੂੰ ਫਲਾਈਓਵਰ ਦੀ ਰੇਲਿੰਗ ਨੇੜੇ ਖੜ੍ਹੇ ਹੋ ਕੇ ਹੇਠਾਂ ਸੜਕ 'ਤੇ ਜ਼ਿਆਦਾਤਰ 10 ਰੁਪਏ ਦੇ ਨੋਟਾਂ ਦੀਆਂ ਗੁੱਟੀਆਂ ਸੁੱਟਦੇ ਹੋਏ ਦਿਖਾਇਆ ਗਿਆ ਹੈ। ਇਸ ਦੌਰਾਨ ਫਲਾਈਓਵਰ 'ਤੇ ਉਸਦੇ ਨਾਲ 10 ਤੋਂ 12 ਸਾਲ ਦੇ ਕੁਝ ਬੱਚੇ ਵੀ ਨਜ਼ਰ ਆਏ।

ਜਿਵੇਂ ਹੀ ਨੋਟ ਐਨਐਚ-44 ਦੀ ਸਰਵਿਸ ਲੇਨ 'ਤੇ ਡਿੱਗੇ, ਪੈਦਲ ਯਾਤਰੀਆਂ, ਵਾਹਨ ਚਾਲਕਾਂ, ਆਟੋ-ਰਿਕਸ਼ਾ ਡਰਾਈਵਰਾਂ ਅਤੇ ਰਾਹਗੀਰਾਂ ਨੇ ਨਕਦੀ ਇਕੱਠੀ ਕਰਨ ਲਈ ਭੱਜ-ਦੌੜ ਮਚਾ ਦਿੱਤੀ। ਕਈ ਲੋਕਾਂ ਨੇ ਕਥਿਤ ਤੌਰ 'ਤੇ ਆਪਣੇ ਵਾਹਨ ਸੜਕ ਦੇ ਵਿਚਕਾਰ ਰੋਕ ਦਿੱਤੇ ਅਤੇ ਡਿੱਗਦੇ ਨੋਟਾਂ ਵੱਲ ਦੌੜ ਪਏ, ਜਿਸ ਨਾਲ ਆਵਾਜਾਈ ਜਾਮ ਹੋ ਗਈ। ਖੁਸ਼ਕਿਸਮਤੀ ਨਾਲ, ਜੋਖਮ ਭਰੀਆਂ ਸਥਿਤੀਆਂ ਦੇ ਬਾਵਜੂਦ ਕਿਸੇ ਦੁਰਘਟਨਾ ਜਾਂ ਜ਼ਖਮੀ ਹੋਣ ਦੀ ਕੋਈ ਖ਼ਬਰ ਨਹੀਂ ਮਿਲੀ।

ਐਸਐਚਓ ਸਿਟੀ ਪਾਣੀਪਤ ਦਵਿੰਦਰ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਅਣਪਛਾਤੇ ਵਿਅਕਤੀ ਖਿਲਾਫ ਹਫੜਾ-ਦਫੜੀ ਪੈਦਾ ਕਰਨ ਅਤੇ ਲੋਕਾਂ ਦੀਆਂ ਜਾਨਾਂ ਨੂੰ ਖਤਰੇ ਵਿੱਚ ਪਾਉਣ ਦਾ ਮਾਮਲਾ ਦਰਜ ਕੀਤਾ ਹੈ। ਉਨ੍ਹਾਂ ਕਿਹਾ, "ਅਸੀਂ ਵਾਇਰਲ ਵੀਡੀਓ ਦਾ ਨੋਟਿਸ ਲਿਆ ਹੈ ਅਤੇ ਕੇਸ ਦਰਜ ਕਰ ਲਿਆ ਹੈ। ਦੋਸ਼ੀ ਦੀ ਪਛਾਣ ਕਰਨ ਅਤੇ ਉਸ ਨੂੰ ਲੱਭਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਜੇ ਕੋਈ ਵੀ ਵਿਅਕਤੀ ਜਨਤਕ ਜੀਵਨ ਨੂੰ ਖਤਰੇ ਵਿੱਚ ਪਾਉਣ ਦਾ ਜ਼ਿੰਮੇਵਾਰ ਪਾਇਆ ਗਿਆ ਤਾਂ ਉਸ ਖਿਲਾਫ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।" ਐਸਐਚਓ ਨੇ ਨਾਗਰਿਕਾਂ ਨੂੰ ਅਪੀਲ ਕੀਤੀ ਕਿ ਉਹ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਲਈ ਵੀਡੀਓ ਬਣਾਉਂਦੇ ਸਮੇਂ ਅਜਿਹੀਆਂ ਗਤੀਵਿਧੀਆਂ ਤੋਂ ਬਚਣ ਜੋ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਦੀਆਂ ਹਨ ਜਾਂ ਕਿਸੇ ਦੀ ਜਾਨ ਨੂੰ ਖਤਰੇ ਵਿੱਚ ਪਾਉਂਦੀਆਂ ਹਨ।