SSP ਚੰਡੀਗੜ੍ਹ ਅਤੇ DCP ਪੰਚਕੂਲਾ ਚੋਟੀ ਦੇ 25 ਪੁਲੀਸ ਅਧਿਕਾਰੀਆਂ ਦੀ ਸੂਚੀ ਵਿੱਚ ਸ਼ਾਮਲ
ਫੇਮ ਇੰਡੀਆ-ਏਸ਼ੀਆ ਪੋਸਟ ਨੇ ਜਾਰੀ ਕੀਤੀ ਸੂਚੀ
ਫੇਮ ਇੰਡੀਆ-ਏਸ਼ੀਆ ਪੋਸਟ ਨੇ ਦੇਸ਼ ਦੇ 25 ਚੋਟੀ ਦੇ ਪੁਲੀਸ ਅਧਿਕਾਰੀਆਂ ਦੀ ਸੂਚੀ ਜਾਰੀ ਕੀਤੀ ਹੈ, ਜਿਸ ਵਿੱਚ ਚੰਡੀਗੜ੍ਹ ਦੀ ਸੀਨੀਅਰ ਸੁਪਰਡੈਂਟ ਆਫ਼ ਪੁਲੀਸ (ਐੱਸ ਐੱਸ ਪੀ) ਕੰਵਰਦੀਪ ਕੌਰ ਅਤੇ ਪੰਚਕੂਲਾ ਦੀ ਡਿਪਟੀ ਕਮਿਸ਼ਨਰ ਆਫ਼ ਪੁਲੀਸ (ਡੀ ਸੀ ਪੀ) ਅਦਿਤੀ ਸਿੰਘ ਸ਼ਾਮਲ ਹਨ। ਸੂਚੀ ਵਿੱਚ ਪੰਜ ਅਧਿਕਾਰੀਆਂ ਲਈ ਇੱਕ ਵੱਖਰੀ "ਸੁਪਰ-5" ਸ਼੍ਰੇਣੀ ਵੀ ਸ਼ਾਮਲ ਹੈ ਜਿਨ੍ਹਾਂ ਨੇ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ ਹੈ।
ਫੇਮ ਇੰਡੀਆ ਦੇ ਅਨੁਸਾਰ, ਸਾਰੇ 30 ਅਧਿਕਾਰੀਆਂ ਦੀ ਚੋਣ ਫ਼ੀਲਡ ਤਜ਼ਰਬੇ, ਮੁਸ਼ਕਲ ਹਾਲਾਤਾਂ ਵਿੱਚ ਅਗਵਾਈ, ਅਪਰਾਧ ਕੰਟਰੋਲ, ਕਾਨੂੰਨ ਅਤੇ ਵਿਵਸਥਾ ਪ੍ਰਬੰਧਨ, ਸਿਵਲ ਸੇਵਾਵਾਂ, ਤਕਨਾਲੋਜੀ ਦੀ ਵਰਤੋਂ ਅਤੇ ਲੋਕਾਂ ਦੇ ਵਿਸ਼ਵਾਸ ਦੇ ਆਧਾਰ 'ਤੇ ਕੀਤੀ ਗਈ ਹੈ। ਫੇਮ ਇੰਡੀਆ ਨੇ ਕਿਹਾ ਕਿ ਦਰਜਾਬੰਦੀ ਵਿੱਚ ਰਵਾਇਤੀ ਕਾਨੂੰਨ-ਵਿਵਸਥਾ ਦੀਆਂ ਡਿਊਟੀਆਂ ਦੇ ਨਾਲ-ਨਾਲ ਅਧਿਕਾਰੀਆਂ ਦੁਆਰਾ ਸਾਈਬਰ ਕ੍ਰਾਈਮ, ਨਸ਼ਾਂ, ਟਰੈਫਿਕ, ਮਹਿਲਾ ਅਤੇ ਬਾਲ ਸੁਰੱਖਿਆ ਅਤੇ ਕਮਿਊਨਿਟੀ ਪੁਲੀਸਿੰਗ ਵਰਗੀਆਂ ਨਵੀਆਂ ਚੁਣੌਤੀਆਂ ਨਾਲ ਨਜਿੱਠਣ ਨੂੰ ਸ਼ਾਮਲ ਕੀਤਾ ਗਿਆ ਹੈ।
ਪੰਜਾਬ ਕਾਡਰ ਦੀ 2013 ਬੈਚ ਦੀ ਆਈ ਪੀ ਐੱਸ ਅਧਿਕਾਰੀ ਕੰਵਰਦੀਪ ਕੌਰ ਨੇ ਮਾਰਚ 2023 ਵਿੱਚ ਚੰਡੀਗੜ੍ਹ ਐੱਸ ਐੱਸ ਪੀ ਵਜੋਂ ਚਾਰਜ ਸੰਭਾਲਿਆ ਸੀ ਅਤੇ ਮਾਰਚ 2026 ਵਿੱਚ ਉਨ੍ਹਾਂ ਦਾ ਕਾਰਜਕਾਲ ਇੱਕ ਸਾਲ ਲਈ ਵਧਾ ਦਿੱਤਾ ਗਿਆ ਸੀ।
ਉੱਥੇ ਹੀ ਕੰਪਿਊਟਰ ਸਾਇੰਸ ਵਿੱਚ ਬੀ ਟੈਕ ਕਰਨ ਵਾਲੀ 2021 ਬੈਚ ਦੀ ਆਈ ਪੀ ਐੱਸ ਅਧਿਕਾਰੀ ਅਦਿਤੀ ਨੇ ਜੁਲਾਈ 2026 ਵਿੱਚ ਪੰਚਕੂਲਾ ਡੀ ਸੀ ਪੀ ਵਜੋਂ ਅਹੁਦਾ ਸੰਭਾਲਿਆ ਸੀ। ਹਰਿਆਣਾ ਕਾਡਰ ਵਿੱਚ ਤਬਦੀਲ ਹੋਣ ਤੋਂ ਪਹਿਲਾਂ, ਉਹ ਹਿਮਾਚਲ ਪ੍ਰਦੇਸ਼ ਅਤੇ ਗੁਰੂਗ੍ਰਾਮ ਵਿੱਚ ਭ੍ਰਿਸ਼ਟਾਚਾਰ ਵਿਰੋਧੀ ਅਤੇ ਚੌਕਸੀ ਵਿਭਾਗ ਵਿੱਚ ਐੱਸ ਪੀ ਵਜੋਂ ਸੇਵਾ ਨਿਭਾ ਚੁੱਕੀ ਸੀ।
ਇਸ ਤੋਂ ਪਹਿਲਾਂ, ਮਈ ਵਿੱਚ 'ਫੇਮ ਇੰਡੀਆ-ਏਸ਼ੀਆ ਪੋਸਟ' ਦੇ "ਸਰਵੋਤਮ ਜ਼ਿਲ੍ਹਾ ਮੈਜਿਸਟ੍ਰੇਟ 2026" ਸਰਵੇਖਣ ਦੇ ਸ਼ੁਰੂਆਤੀ ਨਤੀਜਿਆਂ ਵਿੱਚ, ਮੁਹਾਲੀ ਦੀ ਡਿਪਟੀ ਕਮਿਸ਼ਨਰ ਕੋਮਲ ਮਿੱਤਲ ਅਤੇ ਉਨ੍ਹਾਂ ਦੇ ਪਤੀ, ਜੋ ਹੁਣ ਪਟਿਆਲਾ ਦੇ ਡੀ ਸੀ ਹਨ, ਹਿਮਾਂਸ਼ੂ ਅਗਰਵਾਲ ਨੂੰ ਦੇਸ਼ ਭਰ ਦੇ ਲਗਪਗ 800 ਜ਼ਿਲ੍ਹਿਆਂ ਵਿੱਚੋਂ ਚੁਣੇ ਗਏ ਕਰੀਬ 100 ਸ਼ਾਰਟਲਿਸਟ ਕੀਤੇ ਅਧਿਕਾਰੀਆਂ ਵਿੱਚ ਸ਼ਾਮਲ ਕੀਤਾ ਗਿਆ ਸੀ।
