ਕਲਾਲ ਮਾਜਰਾ ਦਾ ਸਰਪੰਚ ਮੁਅੱਤਲ

ਕੁਰੂਕਸ਼ੇਤਰ ਦੇ ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਸੋਲਰ ਲਾਈਟਾਂ ਖਰੀਦਣ ਵਿੱਚ ਊਣਤਾਈਆਂ ਵਰਤਣ ਦੇ ਦੋਸ਼ ਹੇਠ ਬਲਾਕ ਬਾਬੈਨ ਦੇ ਪਿੰਡ ਕਲਾਲ ਮਾਜਰਾ ਦੇ ਸਰਪੰਚ ਸੋਹਨ ਲਾਲ ਨੂੰ ਤੁਰੰਤ ਪ੍ਰਭਾਵ ਨਾਲ ਸਰਪੰਚ ਦੇ ਆਹੁਦੇ ਤੋਂ ਫਾਰਗ ਕਰ ਦਿੱਤਾ ਹੈ। ਡੀ ਸੀ ਨੇ ਪੰਚਾਇਤ ਦਾ ਚਾਰਜ ਬਹੁਮੱਤ ਰੱਖਣ ਵਾਲੇ ਪੰਚ ਨੂੰ ਦੇਣ ਦੇ ਆਦੇਸ਼ ਦਿੱਤੇ ਹਨ। ਪਿੰਡ ਦੇ ਸੁਭਾਸ਼ ਚੰਦ ਪੁੱਤਰ ਸੂਰਜਾ ਰਾਮ ਨੇ ਸਰਕਾਰ ਵੱਲੋਂ ਲਗਾਏ ਜਾ ਰਹੇ ਹੱਲ ਕੈਂਪਾਂ ਵਿਚ ਸ਼ਿਕਾਇਤ ਦੇ ਕੇ ਪਿੰਡ ਵਿਚ ਲਗਾਈਆਂ ਸੋਲਰ ਲਾਈਟਾਂ ਵਿਚ ਸਰਪੰਚ, ਗਰਾਮ ਸਕੱਤਰ ਜਿਤੇਂਦਰ ਸਿੰਘ ਅਤੇ ਗੁਰੂ ਕ੍ਰਿਪਾ ਸੋਲਰ ਐਨਰਜੀ ਸਿਸਟਮ ਲਾਡਵਾ ਵੱਲੋਂ ਵਰਤੀਆਂ ਗਈਆਂ ਊਣਤਾਈਆਂ ਦੀ ਜਾਂਚ ਦੀ ਮੰਗ ਕੀਤੀ ਸੀ। ਇਸ ਜਾਂਚ ਨੂੰ ਲੈ ਕੇ ਉਪ ਮੰਡਲ ਅਧਿਕਾਰੀ ਲਾਡਵਾ ਪੀ ਓ ਐਨ ਆਰ ਈ ਦਫਤਰ ਵਧੀਕ ਡਿਪਟੀ ਕਮਿਸ਼ਨਰ ਕੁਰੂਕਸ਼ੇਤਰ ਤੇ ਉਪ ਮੰਡਲ ਅਧਿਕਾਰੀ ਬਿਜਲੀ ਪੰਚਾਇਤੀ ਰਾਜ ਅੰਬਾਲਾ ਦੀ ਕਮੇਟੀ ਬਣਾਈ ਗਈ ਸੀ। ਜਾਂਚ ਕਮੇਟੀ ਨੇ ਸੁਭਾਸ਼ ਚੰਦ ਵਲੋਂ ਲਗਾਏ ਦੋਸ਼ਾ ਨੂੰ ਸਹੀ ਪਾਇਆ। ਡੀ ਸੀ ਨੇ ਸਰਪੰਚ ਨੂੰ ਮੁਅੱਤਲ ਕਰਦਿਆਂ ਮਾਮਲੇ ਦੀ ਅਗਲੇਰੀ ਜਾਂਚ ਲਈ ਵਧੀਕ ਡਿਪਟੀ ਕਮਿਸ਼ਨਰ ਕੁਰੂਕਸ਼ੇਤਰ ਨੂੰ ਜਾਂਚ ਅਧਿਕਾਰੀ ਨਿਯੁਕਤ ਕੀਤਾ ਹੈ। ਉਨਾਂ ਇਹ ਵੀ ਆਦੇਸ਼ ਦਿੱਤੇ ਹਨ ਕਿ ਮੁਅਤਲੀ ਦੇ ਸਮੇਂ ਦੌਰਾਨ ਸਰਪੰਚ ਸੋਹਨ ਲਾਲ ਪੰਚਾਇਤ ਦੀ ਕਿਸੇ ਵੀ ਕਾਰਵਾਈ ਵਿਚ ਹਿੱਸਾ ਨਹੀਂ ਲੈ ਸਕੇਗਾ। ਉਧਰ, ਸੁਭਾਸ਼ ਚੰਦ ਨੇ ਡੀ ਸੀ ਦੇ ਫੈਸਲੇ ਦਾ ਸਵਾਗਤ ਕੀਤਾ ਹੈ ਤੇ ਕਿਹਾ ਹੈ ਕਿ ਇਸ ਫੈਸਲੇ ਨਾਲ ਉਨ੍ਹਾਂ ਸਰਪੰਚਾਂ ਨੂੰ ਵੀ ਨਸੀਹਤ ਮਿਲੇਗੀ ਜੋ ਪੰਚਾਇਤ ਦੇ ਪੈਸਿਆਂ ਨੂੰ ਆਪਣੀ ਨਿੱਜੀ ਜਗੀਰ ਸਮਝ ਕੇ ਉਸ ਦਾ ਦੁਰਉਪਯੋਗ ਕਰਦੇ ਹਨ।