power sector privatization ਨਿੱਜੀਕਰਨ ਵਿਰੁੱਧ ਡਟੇ ਬਿਜਲੀ ਮੁਲਾਜ਼ਮ; ਹੜਤਾਲ ਦੂਜੇ ਦਿਨ ਵੀ ਜਾਰੀ
ਮਜ਼ਦੂਰ ਯੂਨੀਅਨਾਂ ਅਤੇ ਕਿਸਾਨ ਜਥੇਬੰਦੀਅਾਂ ਦੀ ਹਮਾਇਤ ਮਿਲੀ
ਬਿਜਲੀ ਵੰਡ ਦੇ ਸਮਾਨਾਂਤਰ ਲਾਇਸੈਂਸਿੰਗ ਅਤੇ ਨਿੱਜੀਕਰਨ ਦੇ ਵਿਰੋਧ ਵਿੱਚ ਬਿਜਲੀ ਮੁਲਾਜਮਾਂ ਦੀ ਹੜਤਾਲ ਅੱਜ ਦੂਜੇ ਦਿਨ ਵੀ ਜਨਤਕ ਹਿੱਤ, ਖਪਤਕਾਰਾਂ, ਕਿਸਾਨਾਂ ਅਤੇ ਕਰਮਚਾਰੀਆਂ ਦੇ ਹਿੱਤਾਂ ਵਿੱਚ ਜਾਰੀ ਰਹੀ। ਇਸ ਤਹਿਤ, ਨਰਾਇਣਗੜ੍ਹ ਦੇ ਸਾਰੇ ਸਬ-ਡਿਵੀਜ਼ਨਾਂ ਵਿੱਚ ਮੁਲਾਜ਼ਮਾਂ ਨੇ ਦੋ ਘੰਟੇ ਪ੍ਰਦਰਸ਼ਨ ਕੀਤਾ ਅਤੇ ਸਰਕਾਰ ਦੀਆਂ ਨਿੱਜੀਕਰਨ ਨੀਤੀਆਂ ਵਿਰੁੱਧ ਆਪਣਾ ਗੁੱਸਾ ਪ੍ਰਗਟ ਕੀਤਾ। ਨਰਾਇਣਗੜ੍ਹ ਵਿੱਚ ਮੁੱਖ ਪ੍ਰਦਰਸ਼ਨ ਰੁਦਰਾਕਸ਼ ਪਾਰਕ ਨਰਾਇਣਗੜ੍ਹ ਵਿੱਚ ਹੋਇਆ, ਜਿਸ ਦੀ ਪ੍ਰਧਾਨਗੀ ਯੂਨਿਟ ਪ੍ਰਧਾਨ ਬਲਿੰਦਰ ਸਿੰਘ ਗੁੱਜਰ ਨੇ ਕੀਤੀ ਅਤੇ ਸਟੇਜ ਦਾ ਪ੍ਰਬੰਧਨ ਯੂਨਿਟ ਸਕੱਤਰ ਅਰੁਣ ਕੁਮਾਰ ਨਰਾਇਣਗੜ੍ਹ ਨੇ ਸਫਲਤਾਪੂਰਵਕ ਕੀਤਾ। ਅੱਜ ਦੇ ਪ੍ਰਦਰਸ਼ਨ ਵਿੱਚ ਹਰਿਆਣਾ ਰਾਜ ਬਿਜਲੀ ਬੋਰਡ ਕਰਮਚਾਰੀ ਯੂਨੀਅਨ ਦੇ ਸੂਬਾ ਪ੍ਰਧਾਨ ਇਕਬਾਲ ਸਿੰਘ ਚੰਦਾਨਾ ਅਤੇ ਸੂਬਾ ਕਾਰਜਕਾਰਨੀ ਮੈਂਬਰ ਰਾਜੇਂਦਰ ਗਯੋਤ ਅਤੇ ਸੁਰੇਂਦਰ ਕੁਮਾਰ ਅਤੇ ਸਾਬਕਾ ਉਮੀਦਵਾਰ ਕਾਮਰੇਡ ਟੇਕ ਚੰਦ ਸੈਣੀ ਸੀ ਆਈ ਟੀ ਯੂ ਆਗੂ ਆਲ ਇੰਡੀਆ ਕਿਸਾਨ ਯੂਨੀਅਨ ਵਿਸ਼ੇਸ਼ ਤੌਰ ’ਤੇ ਪਹੁੰਚੇ ਅਤੇ ਕਰਮਚਾਰੀਆਂ ਨੂੰ ਸੰਬੋਧਨ ਕੀਤਾ ਅਤੇ ਹੜਤਾਲ ਨੂੰ ਆਪਣਾ ਸਮਰਥਨ ਦਿੱਤਾ। ਭਾਰਤੀ ਕਿਸਾਨ ਯੂਨੀਅਨ (ਟਿਕੈਟ ਗਰੁੱਪ) ਤੋਂ, ਯੂਥ ਸੂਬਾ ਪ੍ਰਧਾਨ ਚਮਨ ਗੁੱਜਰ ਅਤੇ ਜ਼ਿਲ੍ਹਾ ਪ੍ਰਧਾਨ ਸਰਦਾਰ ਸ਼ਿੰਗਾਰਾ ਸਿੰਘ ਅਤੇ ਇੰਡੀਅਨ ਨੈਸ਼ਨਲ ਲੋਕ ਦਲ ਦੇ ਬਲਾਕ ਪ੍ਰਧਾਨ ਲੱਕੀ ਨਾਗੋਲੀ ਦੇ ਨਾਲ ਗੋਲਡੀ ਮਾਨ, ਸੰਦੀਪ ਗੁੱਜਰ ਅਤੇ ਹਰਿਆਣਾ ਰਾਜ ਚਮਾਰ ਮਹਾਂਸਭਾ (ਰਜਿਸਟਰਡ) ਤੋਂ ਜ਼ਿਲ੍ਹਾ ਪ੍ਰਧਾਨ ਸੰਜੀਵ ਕੋਚਰ ਆਪਣੇ ਸਾਥੀਆਂ ਸਣੇ ਪਹੁੰਚੇ ਅਤੇ ਹੜਤਾਲ ਦਾ ਸਮਰਥਨ ਕੀਤਾ ਅਤੇ ਮੁਲਾਜ਼ਮਾਂ ਨੂੰ ਸੰਬੋਧਨ ਕੀਤਾ। ਇਸ ਪ੍ਰਦਰਸ਼ਨ ਵਿੱਚ ਸਬ-ਡਵੀਜ਼ਨ ਨਰਾਇਣਗੜ੍ਹ ਦੇ ਐਸਡੀਓ ਸੁਨੀਲ ਕੰਬੋਜ, ਸਾਰੇ ਜੇਈ ਅਤੇ ਏਰੀਆ ਇੰਚਾਰਜਾਂ ਦੇ ਨਾਲ-ਨਾਲ ਸਬ-ਯੂਨਿਟ ਮੁਖੀ ਕ੍ਰਿਸ਼ਨਾ ਪੰਡਿਤ, ਰਾਜੇਸ਼ ਧੀਮਾਨ, ਅਨਿਲ ਕੁਮਾਰ ਬਰਾੜ, ਸੰਜੀਵ ਗੁੱਜਰ, ਸਬ-ਯੂਨਿਟ ਸਕੱਤਰ ਚਰਨ ਸਿੰਘ ਗੁੱਜਰ, ਮਨਜੀਤ ਸਿੰਘ ਨਾਗਰਾ ਅਤੇ ਹੋਰ ਕਰਮਚਾਰੀ ਆਗੂ ਅਤੇ ਬਿਜਲੀ ਕਰਮਚਾਰੀ ਸ਼ਾਮਲ ਹੋਏ।
ਪਿੰਡਾਂ ਦੇ ਲੋਕ ਬਿਜਲੀ, ਪਾਣੀ ਨੂੰ ਤਰਸੇ
ਬਿਜਲੀ ਵਿਭਾਗ ਦੇ ਮੁਲਾਜ਼ਮਾਂ ਵਲੋਂ ਨਿੱਜੀਕਰਨ ਖ਼ਿਲਾਫ਼ ਕੀਤੀ ਜਾ ਰਹੀ ਹੜਤਾਲ ਦਾ ਅਸਰ ਦੇਖਣ ਨੂੰ ਮਿਲਿਆ। ਨਾਰਾਇਣਗੜ੍ਹ ਸ਼ਹਿਰ ਦੇ ਕਈ ਹਿੱਸਿਆਂ ਅਤੇ ਪਿੰਡਾਂ ਵਿੱਚ ਬਿਜਲੀ ਦੀ ਸਪਲਾਈ ਬੀਤੇ ਦਿਨ ਤੋਂ ਬੰਦ ਰਹੀ ਜਿਸ ਕਾਰਨ ਸ਼ਹਿਰ ਤੇ ਪਿੰਡਾਂ ਦੇ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਝੱਲਣੀਆਂ ਪਈਆਂ। ਇਕ ਤਰਫ ਬਿਜਲੀ ਨਾ ਆਣ ਕਰਕੇ ਬਿਜਲੀ ਨਾਲ ਹੋਣ ਵਾਲੇ ਸਾਰੇ ਕੰਮ ਕਾਰਜ ਠੱਪ ਰਹੇ ਦੂਜੇ ਪਾਸੇ ਬਿਜਲੀ ਸਪਲਾਈ ਨਾ ਹੋਣ ਕਾਰਨ ਪਾਣੀ ਦੀ ਵੀ ਲੋਕਾਂ ਨੂੰ ਦਿੱਕਤ ਦਾ ਸਾਹਮਣਾ ਕਰਨਾ ਪਿਆ। ਪੀਣ ਵਾਲੇ ਪਾਣੀ ਦੀ ਸਪਲਾਈ ਨਾ ਹੋਣ ਦੇ ਚਲਦਿਆਂ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਲੋਕਾਂ ਨੇ ਜਲਦ ਹੀ ਇਸ ਸਮੱਸਿਆ ਦਾ ਹੱਲ ਕੀਤੇ ਜਾਣ ਦੀ ਮੰਗ ਕੀਤੀ ਹੈ।
ਬਿਜਲੀ ਸਪਲਾਈ ਨਾ ਮਿਲਣ ਕਾਰਨ ਹਾਈਵੇਅ ਜਾਮ
ਪਿਹੋਵਾ(ਸਤਪਾਲ ਰਾਮਗੜ੍ਹੀਆ): ਬਿਜਲੀ ਕਰਮਚਾਰੀਆਂ ਦੀ ਹੜਤਾਲ ਕਾਰਨ ਪਿਛਲੇ 24 ਘੰਟਿਆਂ ਤੋਂ ਬੰਦ ਪਈ ਬਿਜਲੀ ਸਪਲਾਈ ਨੂੰ ਲੈ ਕੇ ਪਿੰਡ ਭੱਟ ਮਾਜਰਾ ਦੇ ਪਿੰਡ ਵਾਸੀਆਂ ਦਾ ਗੁੱਸਾ ਭੜਕ ਗਿਆ। ਔਰਤਾਂ ਨੇ ਪਿੰਡ ਵਾਸੀਆਂ ਸਣੇ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋ ਕੇ ਅੰਬਾਲਾ ਹਿਸਾਰ ਰੋਡ ਅਤੇ ਪਟਿਆਲਾ ਰੋਡ ਦੇ ਦੋਵੇਂ ਪਾਸੇ ਜਾਮ ਲਗਾ ਦਿੱਤਾ। ਸੂਚਨਾ ਮਿਲਣ ਤੋਂ ਬਾਅਦ ਪੁਲੀਸ ਮੌਕੇ ’ਤੇ ਪਹੁੰਚ ਗਈ। ਜਿਸ ਤੋਂ ਬਾਅਦ ਜਲਦੀ ਹੀ ਸਪਲਾਈ ਠੀਕ ਕਰਵਾ ਕੇ ਦੁਬਾਰਾ ਚਾਲੂ ਕਰਨ ਦਾ ਭਰੋਸਾ ਦੇ ਕੇ ਕਰੀਬ ਇਕ ਘੰਟੇ ਬਾਅਦ ਜਾਮ ਨੂੰ ਹਟਾਇਆ ਗਿਆ। ਪਿੰਡ ਵਾਸੀਆਂ ਗੁਰਚਰਨ ਸਿੰਘ, ਬਿੱਟੂ, ਬਲਕਾਰ, ਗੁਰਦੇਵ ਆਦਿ ਨੇ ਦੱਸਿਆ ਕਿ ਪਿੰਡ ਵਿੱਚ ਪਿਛਲੇ 24 ਘੰਟਿਆਂ ਤੋਂ ਬਿਜਲੀ ਸਪਲਾਈ ਨਹੀਂ ਹੈ। ਇਸ ਕਾਰਨ ਘਰਾਂ ਵਿੱਚ ਪੀਣ ਵਾਲਾ ਪਾਣੀ ਵੀ ਖਤਮ ਹੋ ਗਿਆ ਹੈ। ਲੋਕਾਂ ਦੇ ਜ਼ਰੂਰੀ ਕੰਮ ਠੱਪ ਪਏ ਹਨ। ਪਸ਼ੂਆਂ ਨੂੰ ਪਾਣੀ ਦੇਣ ਲਈ ਵੀ ਪ੍ਰਬੰਧ ਨਹੀਂ ਕੀਤੇ ਜਾ ਰਹੇ ਹਨ। ਦੂਜੇ ਪਾਸੇ ਹੜਤਾਲ ’ਤੇ ਜਾਣ ਤੋਂ ਪਹਿਲਾਂ ਬਿਜਲੀ ਵਿਭਾਗ ਦੇ ਮੁਲਾਜ਼ਮਾਂ ਨੇ ਸਪਲਾਈ ਬੰਦ ਕਰ ਦਿੱਤੀ ਸੀ। ਦੂਜੇ ਪਾਸੇ ਸ਼ੁੱਕਰਵਾਰ ਨੂੰ ਬਿਜਲੀ ਵਿਭਾਗ ਦੇ ਮੁਲਾਜ਼ਮਾਂ ਨੇ ਸ਼ਹਿਰ ਵਿੱਚ ਰੋਸ ਮਾਰਚ ਕੀਤਾ ਗਿਆ। ਇਸ ਦੌਰਾਨ ਰੋਡਵੇਜ਼ ਮੁਲਾਜ਼ਮ ਅਤੇ ਕਿਸਾਨ ਯੂਨੀਅਨਾਂ ਵੀ ਉਨ੍ਹਾਂ ਨਾਲ ਸ਼ਾਮਲ ਹੋਈਆਂ।

