PM ਦੀ ਅਗਵਾਈ ਵਾਲੀ ਕਮੇਟੀ ਨੇ ਹਰਿਆਣਾ ਕਾਡਰ ਦੇ IPS ਸੰਦੀਪ ਖੀਰਵਾਰ ਨੂੰ CRPF ਦੇ ਸਪੈਸ਼ਲ DG ਵਜੋਂ ਕੀਤਾ ਨਿਯੁਕਤ
ਖੀਰਵਾਰ ਦੀ ਦੋ ਸਾਲਾਂ ਵਿੱਚ ਦੂਜੀ ਵੱਡੀ ਤਰੱਕੀ
1995 ਬੈਚ ਦੇ ਹਰਿਆਣਾ ਕਾਡਰ ਦੇ ਆਈ ਪੀ ਐੱਸ ਅਧਿਕਾਰੀ ਸੰਦੀਪ ਖੀਰਵਾਰ ਨੂੰ ਵੀਰਵਾਰ ਨੂੰ ਸੈਂਟਰਲ ਰਿਜ਼ਰਵ ਪੁਲੀਸ ਫੋਰਸ (ਸੀ ਆਰ ਪੀ ਐੱਫ) ਦਾ ਸਪੈਸ਼ਲ ਡਾਇਰੈਕਟਰ ਜਨਰਲ (ਡੀ ਜੀ) ਨਿਯੁਕਤ ਕੀਤਾ ਗਿਆ।
ਇਹ ਖੀਰਵਾਰ ਦੀ ਦੋ ਸਾਲਾਂ ਵਿੱਚ ਦੂਜੀ ਵੱਡੀ ਤਰੱਕੀ ਹੈ। ਫਰਵਰੀ 2024 ਵਿੱਚ, ਉਨ੍ਹਾਂ ਨੂੰ ਸੀ ਆਰ ਪੀ ਐੱਫ ਦੇ ਆਈ ਜੀ ਪੀ ਦੇ ਅਹੁਦੇ ਤੋਂ ਤਰੱਕੀ ਦੇ ਕੇ ਏ ਡੀ ਜੀ ਪੀ, ਸੀ ਆਰ ਪੀ ਐੱਫ ਬਣਾਇਆ ਗਿਆ ਸੀ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਕੈਬਨਿਟ ਦੀ ਨਿਯੁਕਤੀ ਕਮੇਟੀ ਦੁਆਰਾ ਜਾਰੀ ਇੱਕ ਆਦੇਸ਼ ਵਿੱਚ ਕਿਹਾ ਗਿਆ ਹੈ ਕਿ ਖੀਰਵਾਰ 31 ਮਈ, 2033 ਨੂੰ ਆਪਣੀ ਸੇਵਾਮੁਕਤੀ ਤੱਕ ਜਾਂ ਅਗਲੇ ਆਦੇਸ਼ਾਂ ਤੱਕ, ਜੋ ਵੀ ਪਹਿਲਾਂ ਹੋਵੇ, ਇਸ ਅਹੁਦੇ 'ਤੇ ਰਹਿਣਗੇ।
ਉੱਥੇ ਹੀ ਤ੍ਰਿਪੁਰਾ ਕਾਡਰ ਦੇ 1995 ਬੈਚ ਦੇ ਹੀ ਆਈ ਪੀ ਐੱਸ ਅਧਿਕਾਰੀ ਪੁਨੀਤ ਰਸਤੋਗੀ ਨੂੰ ਬਾਰਡਰ ਸਿਕਿਓਰਿਟੀ ਫੋਰਸ (ਬੀ ਐੱਸ ਐੱਫ) ਦਾ ਸਪੈਸ਼ਲ ਡੀ ਜੀ ਨਿਯੁਕਤ ਕੀਤਾ ਗਿਆ ਹੈ। ਉਹ ਇਸ ਸਮੇਂ ਬੀ ਐੱਸ ਐੱਫ ਵਿੱਚ ਏ ਡੀ ਜੀ ਵਜੋਂ ਤਾਇਨਾਤ ਹਨ।
ਜਦਕਿ ਬਿਹਾਰ ਕਾਡਰ ਦੇ 1995 ਬੈਚ ਦੇ ਆਈ ਪੀ ਐੱਸ ਅਧਿਕਾਰੀ ਜਗਮੋਹਨ, ਜੋ ਇਸ ਸਮੇਂ ਇੰਟੈਲੀਜੈਂਸ ਬਿਊਰੋ (ਆਈ ਬੀ) ਵਿੱਚ ਵਧੀਕ ਡਾਇਰੈਕਟਰ ਵਜੋਂ ਤਾਇਨਾਤ ਹਨ, ਨੂੰ ਆਈ ਬੀ ਦਾ ਸਪੈਸ਼ਲ ਡਾਇਰੈਕਟਰ ਨਿਯੁਕਤ ਕੀਤਾ ਗਿਆ ਹੈ।
