ਗੈਸ ਸਿਲੰਡਰ ਨਾ ਮਿਲਣ ’ਤੇ ਲੋਕਾਂ ਵੱਲੋਂ ਹੰਗਾਮਾ

ਇਲਾਕੇ ਵਿੱਚ ਗੈਸ ਸਿਲੰਡਰ ਨਾ ਮਿਲਣ ਤੋਂ ਪ੍ਰੇਸ਼ਾਨ ਉਪਭੋਗਤਾਵਾਂ ਨੇ ਅੱਜ ਹੰਗਾਮਾ ਕੀਤਾ। ਉਨ੍ਹਾਂ ਗੈਸ ਏਜੰਸੀ ਦੇ ਬਾਹਰ ਵਿਰੋਧ ਪ੍ਰਦਰਸ਼ਨ ਕੀਤਾ ਅਤੇ ਪਿੰਡ ਵਿੱਚ ਸਿਲੰਡਰ ਵੰਡਣ ਜਾ ਰਹੀ ਇੱਕ ਡਿਲਿਵਰੀ ਵੈਨ ਨੂੰ ਰਸਤੇ ਵਿੱਚ ਰੋਕ ਲਿਆ। ਕਰੀਬ ਇੱਕ ਘੰਟੇ ਤੱਕ ਹੰਗਾਮਾ ਚੱਲਦਾ ਰਿਹਾ, ਜਿਸ ਤੋਂ ਬਾਅਦ ਏਜੰਸੀ ਸੰਚਾਲਕ ਅਤੇ ਪੁਲੀਸ ਮੁਲਾਜ਼ਮਾਂ ਨੇ ਲੋਕਾਂ ਨੂੰ ਸਮਝਾ ਕੇ ਸ਼ਾਂਤ ਕੀਤਾ। ਉਪਭੋਗਤਾਵਾਂ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੂੰ ਇੱਕ ਹਫ਼ਤੇ ਤੋਂ ਵੱਧ ਸਮੇਂ ਤੋਂ ਸਿਲੰਡਰ ਨਹੀਂ ਮਿਲ ਰਹੇ, ਜਦੋਂ ਕਿ ਗੈਸ ਏਜੰਸੀ ਤੋਂ ਸਿਲੰਡਰ ਭਰ ਕੇ ਪਿੰਡਾਂ ਵਿੱਚ ਭੇਜੇ ਜਾ ਰਹੇ ਹਨ। ਉਨ੍ਹਾਂ ਇਹ ਵੀ ਸ਼ਿਕਾਇਤ ਕੀਤੀ ਕਿ ਕਈ ਉਪਭੋਗਤਾਵਾਂ ਦੀ ਬੁਕਿੰਗ ਸਿਲੰਡਰ ਦਿੱਤੇ ਬਿਨਾਂ ਹੀ ‘ਡਿਲਿਵਰਡ’ ਦਿਖਾ ਦਿੱਤੀ ਗਈ ਹੈ।

ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਵੀ ਇਸੇ ਗੈਸ ਏਜੰਸੀ ਦੇ ਬਾਹਰ ਉਪਭੋਗਤਾਵਾਂ ਵੱਲੋਂ ਰੋਸ ਪ੍ਰਦਰਸ਼ਨ ਕੀਤਾ ਗਿਆ ਸੀ। ਪਿਛਲੇ ਹਫ਼ਤੇ ਲੋਕਾਂ ਨੇ ਗੈਸ ਸਿਲੰਡਰ ਰੀਫਿਲ ਨਾ ਹੋਣ ’ਤੇ ਰੋਡ ਜਾਮ ਕਰਕੇ ਵਿਰੋਧ ਜਤਾਇਆ ਸੀ। ਬਾਅਦ ਵਿੱਚ ਪੁਲੀਸ ਨੇ ਆ ਕੇ ਉਪਭੋਗਤਾਵਾਂ ਨੂੰ ਸ਼ਾਂਤ ਕੀਤਾ ਅਤੇ ਜਾਮ ਖੁੱਲ੍ਹਵਾਇਆ ਸੀ।

ਪਿੰਡ ਅਜੀਤ ਨਗਰ ਦੇ ਨਿਵਾਸੀ ਸੰਦੀਪ, ਭਾਨੀਖੇੜਾ ਤੋਂ ਹਰਮਨ, ਢਾਣੀ ਬਬਨਪੁਰ ਤੋਂ ਕਰਨ, ਘਾਸਵਾ ਤੋਂ ਸੰਦੀਪ ਕੁਮਾਰ ਅਤੇ ਮਹਮਬੜਾ ਤੋਂ ਗੁਰਚਰਨ ਸਮੇਤ ਕਈ ਉਪਭੋਗਤਾਵਾਂ ਨੇ ਦੱਸਿਆ ਕਿ ਉਹ ਰਤੀਆ ਤੋਂ 10 ਕਿਲੋਮੀਟਰ ਤੋਂ ਵੀ ਵੱਧ ਦੂਰ ਤੋਂ ਸਵੇਰੇ 5 ਵਜੇ ਤੋਂ ਆਏ ਹੋਏ ਹਨ, ਪਰ ਉਨ੍ਹਾਂ ਨੂੰ ਸਿਲੰਡਰ ਨਹੀਂ ਮਿਲ ਰਿਹਾ।

ਦੂਜੇ ਪਾਸੇ ਗੈਸ ਏਜੰਸੀ ਸੰਚਾਲਕ ਰਾਮਨਿਵਾਸ ਦਾ ਕਹਿਣਾ ਹੈ ਕਿ ਗੈਸ ਦੀ ਕੋਈ ਕਮੀ ਨਹੀਂ ਹੈ। ਉਪਭੋਗਤਾ ਸਿਰਫ਼ ਆਨਲਾਈਨ ਬੁਕਿੰਗ ਕਰਵਾਉਣ। ਏਜੰਸੀ ਦੇ ਬਾਹਰ ਲਾਈਨ ਵਿੱਚ ਲੱਗਣ ਦਾ ਕੋਈ ਫਾਇਦਾ ਨਹੀਂ ਹੈ। ਬੁਕਿੰਗ ਦੇ ਹਿਸਾਬ ਨਾਲ ਹੀ ਦੋ ਤੋਂ ਤਿੰਨ ਦਿਨਾਂ ਵਿੱਚ ਸਿਲੰਡਰ ਦੀ ਡਿਲੀਵਰੀ ਹੋਵੇਗੀ।