ਡਿਜ਼ੀਟਲ ਸਿਸਟਮ 'ਚ ਅਟਕੀ 100 ਫੀਸਦ ਦਿਵਿਆਂਗ ਔਰਤ ਦੀ ਪੈਨਸ਼ਨ: ਇੱਕੋ ਆਧਾਰ 'ਤੇ ਬਣੀਆਂ ਦੋ ਆਈਡੀਜ਼' ਬਣੀਆਂ ਮੁਸੀਬਤ
ਇੱਕੋ ਆਧਾਰ ਅਤੇ ਇੱਕੋ ਬੈਂਕ ਖਾਤੇ 'ਤੇ ਬਣੀਆਂ ਦੋ ਪੈਨਸ਼ਨ ਆਈਡੀ; ਪੈਨਸ਼ਨ ਬੰਦ
ਜ਼ਿਲ੍ਹਾ ਸਮਾਜ ਭਲਾਈ ਵਿਭਾਗ ਸਿਰਸਾ ਦੀ ਕਥਿਤ ਲਾਪਰਵਾਹੀ ਕਾਰਨ ਪਿੰਡ ਗੋਰੀਵਾਲਾ ਦੀ 100 ਫ਼ੀਸਦੀ ਦਿਵਿਆਂਗ ਔਰਤ ਮਮਤਾ ਦੇਵੀ ਨੂੰ ਵੱਡੀ ਪਰੇਸ਼ਾਨੀ ਝੱਲਣੀ ਪੈ ਰਹੀ ਹੈ। ਮਮਤਾ ਬੋਲਣ ਵਿੱਚ ਪੂਰੀ ਤਰ੍ਹਾਂ ਅਸਮਰੱਥ ਹੈ। ਪਿਛਲੇ ਚਾਰ ਮਹੀਨਿਆਂ ਤੋਂ ਉਸ ਦੀ ਦਿਵਿਆਂਗ ਪੈਨਸ਼ਨ ਬੰਦ ਪਈ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਵਿਭਾਗ ਨੇ ਇੱਕੋ ਆਧਾਰ ਨੰਬਰ ਅਤੇ ਇੱਕੋ ਬੈਂਕ ਖਾਤੇ 'ਤੇ ਦੋ ਵੱਖ-ਵੱਖ ਪੈਨਸ਼ਨ ਆਈਡੀ ਚੜ੍ਹਾ ਦਿੱਤੀਆਂ। ਸਿਸਟਮ ਵਿੱਚ ਇਸ ਦੋਹਰੀ ਐਂਟਰੀ ਕਾਰਨ ਉਸ ਦੀ ਲਾਭਪਾਤਰੀ ਯੋਗਤਾ ਮੁਅੱਤਲ ਹੋ ਗਈ।
ਚਾਰ ਮਹੀਨਿਆਂ ਤੋਂ ਦਫ਼ਤਰਾਂ ਦੇ ਗੇੜੇ ਕੱਢਣ ਲਈ ਮਜਬੂਰ ਪਰਿਵਾਰ
ਮਮਤਾ ਦੇਵੀ ਦੇ ਪਿਤਾ ਦਲੀਪ ਸਿੰਘ ਵਾਸੀ ਸਾਦੇਵਾਲਾ ਨੇ ਦੱਸਿਆ ਕਿ ਧੀ ਦੀ ਪੈਨਸ਼ਨ ਮੁੜ ਚਾਲੂ ਕਰਵਾਉਣ ਲਈ ਉਹ ਪਿਛਲੇ ਚਾਰ ਮਹੀਨਿਆਂ ਤੋਂ ਜ਼ਿਲ੍ਹਾ ਸਮਾਜ ਭਲਾਈ ਦਫ਼ਤਰ ਸਿਰਸਾ ਦੇ ਗੇੜੇ ਕੱਢ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਹਰ ਵਾਰ ਅਧਿਕਾਰੀ 15 ਦਿਨਾਂ ਬਾਅਦ ਆਉਣ ਲਈ ਆਖ ਦਿੰਦੇ ਹਨ, ਪਰ ਅੱਜ ਤੱਕ ਮਸਲੇ ਦਾ ਕੋਈ ਹੱਲ ਨਹੀਂ ਨਿਕਲਿਆ।
ਸੂਤਰਾਂ ਮੁਤਾਬਕ ਦੋਹਰੀ ਆਈਡੀ ਵਾਲੀ ਇਹ ਸਮੱਸਿਆ ਸਿਰਫ਼ ਮਮਤਾ ਦੇਵੀ ਤੱਕ ਹੀ ਸੀਮਤ ਨਹੀਂ ਹੈ। ਹੋਰ ਵੀ ਕਈ ਯੋਗ ਲਾਭਪਾਤਰੀ ਇਸੇ ਤਰ੍ਹਾਂ ਦੀ ਤਕਨੀਕੀ ਗੜਬੜ ਦਾ ਸ਼ਿਕਾਰ ਹੋ ਕੇ ਜ਼ਿਲ੍ਹਾ ਦਫ਼ਤਰ ਦੇ ਗੇੜੇ ਕੱਢਣ ਲਈ ਮਜਬੂਰ ਹਨ।
ਪੈਨਸ਼ਨ ਬਹਾਲੀ ਅਤੇ ਬਕਾਇਆ ਰਾਸ਼ੀ ਜਾਰੀ ਕਰਨ ਦੀ ਮੰਗ
ਪਰਿਵਾਰ ਦਾ ਕਹਿਣਾ ਹੈ ਕਿ ਸਰੀਰਕ ਦਿੱਕਤ ਨੂੰ ਝੱਲ ਰਹੀ ਮਮਤਾ ਦੇਵੀ ਨੇ ਆਰਥਿਕ ਸਹਾਇਤਾ ਲਈ ਦਿਵਿਆਂਗ ਪੈਨਸ਼ਨ ਦੀ ਅਰਜ਼ੀ ਦਿੱਤੀ ਸੀ, ਪਰ ਵਿਭਾਗ ਦੇ ਪੋਰਟਲ ਨੇ 5 ਜੂਨ 2026 ਨੂੰ ਡਾਟਾ ਪੜਤਾਲ ਦੌਰਾਨ ਇਸ ਨੂੰ ਦੋਹਰੀ ਐਂਟਰੀ ਮੰਨ ਕੇ ਉਸ ਦੀ ਆਈਡੀ ਮੁਅੱਤਲ ਕਰ ਦਿੱਤੀ। ਵਿਭਾਗ ਦੀ ਇਸ ਤਕਨੀਕੀ ਗੜਬੜ ਦਾ ਖ਼ਮਿਆਜ਼ਾ ਹੁਣ ਪੀੜਤ ਪਰਿਵਾਰ ਭੁਗਤ ਰਿਹਾ ਹੈ। ਪਰਿਵਾਰ ਨੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਹੈ ਕਿ ਦੋਹਰੀ ਐਂਟਰੀ ਤੁਰੰਤ ਹਟਾ ਕੇ ਪੈਨਸ਼ਨ ਬਹਾਲ ਕੀਤੀ ਜਾਵੇ ਅਤੇ ਰੁਕੀ ਹੋਈ ਸਾਰੀ ਰਕਮ ਇੱਕੋ ਵਾਰ ਜਾਰੀ ਕੀਤੀ ਜਾਵੇ।
ਜ਼ਿਲ੍ਹਾ ਸਮਾਜ ਭਲਾਈ ਅਧਿਕਾਰੀ ਦਾ ਪੱਖਦੂਜੇ ਪਾਸੇ, ਜ਼ਿਲ੍ਹਾ ਸਮਾਜ ਭਲਾਈ ਅਧਿਕਾਰੀ ਸੱਤਿਆਵਾਨ ਨੇ ਕਿਹਾ ਕਿ ਇੱਕੋ ਲਾਭਪਾਤਰੀ ਦੀਆਂ ਦੋ ਪੈਨਸ਼ਨ ਆਈਡੀ ਬਣਨਾ ਸੰਭਵ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਮਾਮਲੇ ਦੀ ਜਾਂਚ ਕਰਵਾਈ ਜਾਵੇਗੀ ਅਤੇ ਜੇ ਕੋਈ ਖਾਮੀ ਪਾਈ ਗਈ ਤਾਂ ਉਸ ਦਾ ਤੁਰੰਤ ਹੱਲ ਕਰ ਦਿੱਤਾ ਜਾਵੇਗਾ।
