ਪੰਚਕੂਲਾ ਨਗਰ ਨਿਗਮ FD ਘੁਟਾਲਾ: Kotak Bank ਦੇ ਡਿਪਟੀ Vice-President ਨੇ ਕੀਤਾ ਆਤਮ-ਸਮਰਪਣ

ਸਟੇਟ ਵਿਜੀਲੈਂਸ ਅਤੇ ਐਂਟੀ-ਕਰੱਪਸ਼ਨ ਬਿਊਰੋ  (SV&ACB) ਨੇ ਬੁੱਧਵਾਰ ਨੂੰ ਕੋਟਕ ਮਹਿੰਦਰਾ ਬੈਂਕ ਦੇ ਡਿਪਟੀ ਵਾਈਸ-ਪ੍ਰੈਜ਼ੀਡੈਂਟ ਪੁਸ਼ਪਿੰਦਰ ਸਿੰਘ ਨੂੰ 150 ਕਰੋੜ ਰੁਪਏ ਦੇ ਘੁਟਾਲੇ ਦੇ ਸਬੰਧ ਵਿੱਚ ਆਤਮ-ਸਮਰਪਣ ਕਰਨ ਤੋਂ ਬਾਅਦ ਹਿਰਾਸਤ ਵਿੱਚ ਲੈ ਲਿਆ।

ਪੁਸ਼ਪਿੰਦਰ ਸਿੰਘ ਪੰਚਕੂਲਾ ਦੇ ਸੈਕਟਰ 11 ਸਥਿਤ ਕੋਟਕ ਮਹਿੰਦਰਾ ਬੈਂਕ ਦੇ ਬਰਾਂਚ ਮੈਨੇਜਰ ਵਜੋਂ ਤਾਇਨਾਤ ਸੀ, ਜਿੱਥੋਂ ਕਥਿਤ ਤੌਰ 'ਤੇ ਨਗਰ ਨਿਗਮ (MC) ਪੰਚਕੂਲਾ ਦੇ ਫੰਡ ਨੂੰ ਕੱਢ ਲਿਆ ਗਿਆ ਸੀ।

ਸੂਤਰਾਂ ਨੇ ਦੱਸਿਆ ਕਿ ਪੁਸ਼ਪਿੰਦਰ ਨੇ ਵਿਜੀਲੈਂਸ ਬਿਊਰੋ ਸਾਹਮਣੇ ਆਤਮ-ਸਮਰਪਣ ਕੀਤਾ ਅਤੇ ਪੁੱਛਗਿੱਛ ਲਈ ਉਸ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ। ਉਹ ਇਸ ਕੇਸ ਨਾਲ ਜੁੜਿਆ ਛੇਵਾਂ ਮੁਲਜ਼ਮ ਹੈ।

ਐੱਫ ਆਈ ਆਰ  ਮੁਤਾਬਕ ਨਗਰ ਨਿਗਮ ਨੇ ਸੈਕਟਰ 11 ਦੀ ਬਰਾਂਚ ਵਿੱਚ 145.03 ਕਰੋੜ ਰੁਪਏ ਦੀਆਂ 16 ਐਫ.ਡੀਜ਼ (FDs) ਕਰਵਾਈਆਂ ਹੋਈਆਂ ਸਨ, ਜਿਨ੍ਹਾਂ ਦਾ ਸਮਾਂ ਪੂਰਾ ਹੋਣ 'ਤੇ ਕੁੱਲ ਮੁੱਲ 158.02 ਕਰੋੜ ਰੁਪਏ ਬਣਦਾ ਸੀ। ਇਨ੍ਹਾਂ ਵਿੱਚੋਂ 59.58 ਕਰੋੜ ਰੁਪਏ ਦੀਆਂ 11 ਐੱਫ ਡੀਜ਼ 16 ਫਰਵਰੀ ਨੂੰ ਪੂਰੀਆਂ (Mature) ਹੋ ਚੁੱਕੀਆਂ ਸਨ। ਜਦੋਂ ਨਿਗਮ ਨੇ ਇਸ ਬਾਰੇ ਬੈਂਕ ਨਾਲ ਗੱਲ ਕੀਤੀ, ਤਾਂ ਬੈਂਕ ਅਧਿਕਾਰੀਆਂ ਦੀਆਂ ਗੱਲਾਂ ਨਾ ਤਾਂ ਆਪਸ ਵਿੱਚ ਮੇਲ ਖਾਂਦੀਆਂ ਸਨ ਅਤੇ ਨਾ ਹੀ ਨਿਗਮ ਦੇ ਰਿਕਾਰਡ ਨਾਲ ਮਿਲਦੀਆਂ ਸਨ, ਖ਼ਾਸ ਕਰਕੇ ਐੱਫ ਡੀਜ਼ ਦੇ ਰਿਕਾਰਡ ਵਿੱਚ ਵੱਡੀ ਗੜਬੜ ਸੀ।

ਵਿਜੀਲੈਂਸ ਵਿਭਾਗ ਵੱਲੋਂ ਅਦਾਲਤ ਵਿੱਚ ਦਿੱਤੀ ਜਾਣਕਾਰੀ ਮੁਤਾਬਕ ਪੰਚਕੂਲਾ ਨਿਗਮ ਦੇ ਸਾਬਕਾ ਅਕਾਊਂਟਸ ਅਧਿਕਾਰੀ ਵਿਕਾਸ ਕੌਸ਼ਿਕ ਨੇ ਕਥਿਤ ਤੌਰ 'ਤੇ ਪੁਸ਼ਪਿੰਦਰ ਸਿੰਘ (ਜੋ ਉਸ ਸਮੇਂ ਕੋਟਕ ਮਹਿੰਦਰਾ ਬੈਂਕ ਵਿੱਚ ਡਿਪਟੀ ਵਾਈਸ-ਪ੍ਰੈਜ਼ੀਡੈਂਟ ਸੀ) ਨਾਲ ਮਿਲ ਕੇ ਨਗਰ ਨਿਗਮ ਦੇ ਨਾਮ 'ਤੇ ਦੋ ਨਕਲੀ ਬੈਂਕ ਖਾਤੇ ਖੋਲ੍ਹੇ ਸਨ ਅਤੇ ਫੰਡਾਂ ਦੀ ਹੇਰਾਫੇਰੀ ਕੀਤੀ ਸੀ।