ਪੰਚਾਇਤ ਵੱਲੋਂ ਸਰਵੀਕਲ ਕੈਂਸਰ ਵੈਕਸੀਨ ਦਾ ਵਿਰੋਧ
ਟਰਾਇਲ ਦੌਰਾਨ ਮੌਤਾਂ ਦਾ ਦਿੱਤਾ ਹਵਾਲਾ; ਬੱਚੇਦਾਨੀ ਖਰਾਬ ਹੋਣ ਦਾ ਖਦਸ਼ਾ ਪ੍ਰਗਟਾਇਆ; ਸਿਵਲ ਹਸਪਤਾਲ ’ਚ ਚੱਲ ਰਹੀ ਮੁਹਿੰਮ ਰੋਕਣ ਦਾ ਐਲਾਨ
ਸਥਾਨਕ ਸਿਵਲ ਹਸਪਤਾਲ ਵਿੱਚ 14 ਸਾਲ ਦੀਆਂ ਲੜਕੀਆਂ ਨੂੰ ਸਰਵੀਕਲ ਕੈਂਸਰ ਤੋਂ ਬਚਾਉਣ ਲਈ ਸ਼ੁਰੂ ਕੀਤੀ ਗਈ ਮੁਫ਼ਤ ਐੱਚ ਪੀ ਵੀ (ਹਿਊਮਨ ਪੈਪੀਲੋਮਾ ਵਾਇਰਸ) ਵੈਕਸੀਨ ਲਗਾਉਣ ਦੀ ਮੁਹਿੰਮ ਵਿਵਾਦਾਂ ਵਿੱਚ ਘਿਰ ਗਈ ਹੈ। ਇਸ ਮੁਹਿੰਮ ਦੇ ਵਿਰੋਧ ਵਿੱਚ ਪਿੰਡ ਨਗੂਰਾਂ ਦੇ ਮੰਦਰ ’ਚ ਖਾਂਡਾ ਤਪਾ ਦੀ ਪੰਚਾਇਤ ਸੱਦੀ ਗਈ, ਜਿਸ ਵਿੱਚ 10 ਪਿੰਡਾਂ ਦੇ ਲੋਕਾਂ ਨੇ ਸ਼ਮੂਲੀਅਤ ਕੀਤੀ। ਮੀਟਿੰਗ ਦੀ ਪ੍ਰਧਾਨਗੀ ਚਾਂਦਪੁਰ ਦੇ ਸਾਬਕਾ ਸਰਪੰਚ ਰਾਮ ਕੁਮਾਰ ਨਰਵਾਲ ਨੇ ਕੀਤੀ।
ਲਗਪਗ ਦੋ ਘੰਟੇ ਚੱਲੀ ਇਸ ਪੰਚਾਇਤ ਵਿੱਚ ਬੁਲਾਰਿਆਂ ਨੇ ਕਰੋਨਾ ਵੈਕਸੀਨ ਤੋਂ ਬਾਅਦ ਸਾਹਮਣੇ ਆਏ ਸਿਹਤ ਸਬੰਧੀ ਮਾੜੇ ਨਤੀਜਿਆਂ ਦਾ ਹਵਾਲਾ ਦਿੰਦਿਆਂ ਐੱਚ ਪੀ ਵੀ ਵੈਕਸੀਨ ਦਾ ਡਟਵਾਂ ਵਿਰੋਧ ਕਰਨ ਦਾ ਫੈਸਲਾ ਕੀਤਾ। ਮੀਟਿੰਗ ਵਿੱਚ ਰਵਿੰਦਰ ਹਸਨਪੁਰਾ, ਗਜੇ ਸਿੰਘ ਨਗੂਰਾਂ, ਧਰਮਪਾਲ ਨਗੂਰਾਂ, ਰਾਜੇਸ਼ ਨਗੂਰਾਂ, ਰਾਮਨਿਵਾਸ ਸ਼ਰਮਾ ਅਤੇ ਸੁਸ਼ੀਲ ਨਰਵਾਲ ਚਾਂਦਪੁਰ ਨੇ ਆਪਣੇ ਵਿਚਾਰ ਰੱਖੇ।
ਉਨ੍ਹਾਂ ਦੋਸ਼ ਲਾਇਆ ਕਿ ਇਸ ਵੈਕਸੀਨ ਦਾ ਟਰਾਇਲ 2009 ਵਿੱਚ ਤਿਲੰਗਾਨਾ ਅਤੇ ਗੁਜਰਾਤ ਵਿੱਚ ਕਰੀਬ 14,000 ਬੱਚਿਆਂ ’ਤੇ ਕੀਤਾ ਗਿਆ ਸੀ, ਜਿਸ ਦੌਰਾਨ 7 ਬੱਚਿਆਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਸੀ। ਉਨ੍ਹਾਂ ਦਾਅਵਾ ਕੀਤਾ ਕਿ ਇਸ ਵੈਕਸੀਨ ਕਾਰਨ ਬਹੁਤ ਸਾਰੀਆਂ ਲੜਕੀਆਂ ਵਿੱਚ ਗੰਭੀਰ ਸਾਈਡ ਇਫੈਕਟ ਦੇਖਣ ਨੂੰ ਮਿਲੇ ਸਨ, ਜਿਨ੍ਹਾਂ ਵਿੱਚ ਬੱਚੇਦਾਨੀ ਖਰਾਬ ਹੋਣ ਵਰਗੀਆਂ ਸਮੱਸਿਆਵਾਂ ਸ਼ਾਮਲ ਹਨ। ਪੰਚਾਇਤ ਨੇ ਇਨ੍ਹਾਂ ਤੱਥਾਂ ਦੇ ਆਧਾਰ ’ਤੇ ਸਰਬਸੰਮਤੀ ਨਾਲ ਫੈਸਲਾ ਕੀਤਾ ਕਿ ਉਹ ਆਪਣੇ ਇਲਾਕੇ ਵਿੱਚ ਇਹ ਵੈਕਸੀਨ ਨਹੀਂ ਲੱਗਣ ਦੇਣਗੇ ਤੇ ਇਸ ਦਾ ਵਿਰੋਧ ਕਰਨਗੇ।
