ਗਾਇਕ ਧਨਪਤ ਸਿੰਘ ਦੀ ਯਾਦ ’ਚ ਸੰਗੀਤ ਉਤਸਵ

ਹਰਿਆਣਾ ਦੇ ਸਾਬਕਾ ਰਾਜ ਮੰਤਰੀ ਸੁਭਾਸ਼ ਸੁਧਾ ਨੇ ਕਿਹਾ ਕਿ ਸੂਬਾ ਸਰਕਾਰ ਸੂਬੇ ਦੀ ਵਿਰਾਸਤ ਅਤੇ ਸੱਭਿਆਚਾਰ ਨੂੰ ਸੰਭਾਲ ਰਹੀ ਹੈ। ਸਾਬਕਾ ਮੰਤਰੀ ਦੇਰ ਸ਼ਾਮ ਕਲਾਕ੍ਰਿਤੀ ਭਵਨ ਹਰਿਆਣਾ ਕਲਾ ਪਰਿਸ਼ਦ ਦੇ ਭਰਤਮੁਨੀ ਆਡੀਟੋਰੀਅਮ ਵਿੱਚ ਲੋਕ ਕਲਾਕਾਰ ਧਨਪਤ ਸਿੰਘ ਦੀ ਯਾਦ ਵਿੱਚ ਕਰਵਾਏ ਪੰਜ ਰੋਜ਼ਾ ਸੰਗੀਤ ਉਤਸਵ ਦੇ ਸਮਾਪਤੀ ਸਮਾਰੋਹ ਵਿੱਚ ਬਤੌਰ ਮੁੱਖ ਮਹਿਮਾਨ ਸੰਬੋਧਨ ਕਰ ਰਹੇ ਸਨ। ਇਸ ਤੋਂ ਪਹਿਲਾਂ ਸਾਬਕਾ ਰਾਜ ਮੰਤਰੀ ਸੁਭਾਸ਼ ਸੁਧਾ, ਜ਼ਿਲ੍ਹਾ ਸੂਚਨਾ ਤੇ ਲੋਕ ਸੰਪਰਕ ਅਧਿਕਾਰੀ ਡਾ. ਨਰਿੰਦਰ ਸਿੰਘ, ਪਦਮਸ੍ਰੀ ਡਾ. ਮਹਾਂਵੀਰ ਗੁੱਡੂ, ਰਾਸ਼ਟਰਪਤੀ ਪੁਰਸਕਾਰ ਜੇਤੂ ਪ੍ਰੇਮ ਦੇਹਾਤੀ, ਰਾਮ ਨਿਵਾਸ ਸਹਿਰਾਵਤ, ਡਾ. ਹਨੀਫ ਖਾਨ ਨੇ ਗਾਇਕ ਧਨਪਤ ਸਿੰਘ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਸਾਬਕਾ ਮੰਤਰੀ ਸੁਧਾ ਨੇ ਕਿਹਾ ਕਿ ਸਰਕਾਰ ਨੇ ਸੂਬੇ ਦੀ ਸੱਭਿਆਚਾਰਕ ਵਿਰਾਸਤ ਨੂੰ ਸੁਰੱਖਿਅਤ ਰੱਖਣ ਲਈ ਸੰਗੀਤ ਉਤਸਵ ਕਰਵਾਇਆ। ਇਸ ਮੌਕੇ ਸੂਬੇ ਭਰ ਦੇ ਲਗਭਗ 25 ਸੰਗੀਤ ਸਮੂਹਾਂ ਦੇ ਕਲਾਕਾਰਾਂ ਨੇ ਨੌਜਵਾਨ ਪੀੜ੍ਹੀ ਨੂੰ ਵਿਲੱਖਣ ਤਰੀਕੇ ਨਾਲ ਗੀਤ ਸ਼ੈਲੀ ਪੇਸ਼ ਕੀਤੀ। ਸਾਬਕਾ ਰਾਜ ਮੰਤਰੀ ਨੇ ਕਿਹਾ ਕਿ ਗਾਇਕੀ ਰਾਹੀਂ ਕਲਾਕਾਰ ਨਾ ਸਿਰਫ ਸਮਾਜ ਦੀਆਂ ਬੁਰਾਈਆਂ ਤੋਂ ਬਚਣ ਦਾ ਸੰਦੇਸ਼ ਦਿੰਦੇ ਹਨ ਸਗੋਂ ਸਮਾਜ ਵਿੱਚ ਭਾਈਚਾਰਾ ਕਾਇਮ ਕਰਨ ਦਾ ਸੱਦਾ ਵੀ ਦਿੰਦੇ ਹਨ। ਉਨ੍ਹਾਂ ਦੱਸਿਆ ਕਿ ਮੁੱਖ ਮੰਤਰੀ ਦੇ ਆਦੇਸ਼ਾਂ ਅਨਸੁਾਰ ਲੋਕ ਸੰਪਰਕ ਵਿਭਾਗ ਵੱਲੋਂ ਗਾਇਕ ਧਨਪਤ ਸਿੰਘ ਸਾਂਗੀ ਦੀ ਯਾਦ ਵਿੱਚ ਇਹ ਗੀਤ ਉਤਸਵ ਕੀਤਾ ਗਿਆ। ਇਸ ਮੁਕਾਬਲੇ ਵਿਚ ਪਹਿਲੇ ਸਥਾਨ ’ਤੇ ਸਹਿਣ ਵਾਲੀ ਟੀਮ ਨੂੰ ਮੁੱਖ ਮੰਤਰੀ ਇਕ ਲੱਖ ਰੁਪਏ ਦਾ ਇਨਾਮ ਦੇ ਕੇ ਸਨਮਾਨਿਤ ਕਰਨਗੇ ਤੇ ਉਤਸਵ ਵਿੱਚ ਹਿੱਸਾ ਲੈਣ ਵਾਲੀਆਂ ਟੀਮਾਂ ਨੂੰ 30 ਹਜ਼ਾਰ ਰੁਪਏ ਦੀ ਵਿੱਤੀ ਸਹਾਇਤਾ ਦਿੱਤੀ ਜਾਵੇਗੀ।