ਹਰਿਆਣਾ ’ਚ ਵੱਡਾ ਪ੍ਰਸ਼ਾਸਨਿਕ ਫੇਰਬਦਲ; 21 IAS ਅਤੇ 42 HCS ਅਧਿਕਾਰੀਆਂ ਦੇ ਤਬਾਦਲੇ
ਅਮਿਤ ਅਗਰਵਾਲ ਨੂੰ ਕੁਰੂਕੁਸ਼ੇਤਰ ਵਿਕਾਸ ਬੋਰਡ ਦਾ ਵਾਧੂ ਚਾਰਜ; ਗੀਤਾ ਭਾਰਤੀ ਹਿਸਾਰ ਦੀ ਨਵੀਂ ਕਮਿਸ਼ਨਰ ਨਿਯੁਕਤ
ਹਰਿਆਣਾ ਸਰਕਾਰ ਨੇ ਵੀਰਵਾਰ ਨੂੰ ਇੱਕ ਵੱਡਾ ਪ੍ਰਸ਼ਾਸਨਿਕ ਫੇਰਬਦਲ ਕਰਦਿਆਂ 21 ਆਈ.ਏ.ਐੱਸ. (IAS) ਅਤੇ 42 ਐੱਚ.ਸੀ.ਐੱਸ. (HCS) ਅਧਿਕਾਰੀਆਂ ਦੇ ਤੁਰੰਤ ਪ੍ਰਭਾਵ ਨਾਲ ਤਬਾਦਲੇ ਕਰ ਦਿੱਤੇ ਹਨ। ਇਨ੍ਹਾਂ ਹੁਕਮਾਂ ਤਹਿਤ ਕਈ ਜ਼ਿਲ੍ਹਿਆਂ ਦੇ ਡਿਪਟੀ ਕਮਿਸ਼ਨਰ ਅਤੇ ਵਿਭਾਗੀ ਮੁਖੀ ਬਦਲੇ ਗਏ ਹਨ। ਉਦਯੋਗ ਅਤੇ ਵਣਜ ਵਿਭਾਗ ਦੇ ਕਮਿਸ਼ਨਰ ਅਤੇ ਸਕੱਤਰ ਅਮਿਤ ਕੁਮਾਰ ਅਗਰਵਾਲ ਨੂੰ ਉਨ੍ਹਾਂ ਦੀਆਂ ਮੌਜੂਦਾ ਡਿਊਟੀਆਂ ਦੇ ਨਾਲ-ਨਾਲ ਕੁਰੂਕੁਸ਼ੇਤਰ ਵਿਕਾਸ ਬੋਰਡ ਦੇ ਮੈਂਬਰ ਸਕੱਤਰ ਦਾ ਵਾਧੂ ਚਾਰਜ ਸੌਂਪਿਆ ਗਿਆ ਹੈ। ਗੀਤਾ ਭਾਰਤੀ ਹਿਸਾਰ ਡਿਵੀਜ਼ਨ ਦੀ ਨਵੀਂ ਕਮਿਸ਼ਨਰ ਹੋਵੇਗੀ, ਜਦੋਂਕਿ ਰਵੀ ਪ੍ਰਕਾਸ਼ ਗੁਪਤਾ ਨੂੰ ਸ਼ਹਿਰੀ ਸੰਪਦਾ ਵਿਭਾਗ ਦੇ ਸਕੱਤਰ ਅਤੇ ਗੁਰੂਗ੍ਰਾਮ ਡਿਵੀਜ਼ਨ ਦੇ ਕਮਿਸ਼ਨਰ ਦਾ ਜ਼ਿੰਮਾ ਦਿੱਤਾ ਗਿਆ ਹੈ। ਨਰਹਰੀ ਸਿੰਘ ਬੰਗੜ ਨੂੰ ਕਾਨਫੈੱਡ (CONFED) ਦਾ ਐਮ.ਡੀ. ਅਤੇ ਸਤਿੰਦਰ ਦੂਹਨ ਨੂੰ ਹੁਨਰ ਵਿਕਾਸ ਅਤੇ ਉਦਯੋਗਿਕ ਸਿਖਲਾਈ ਵਿਭਾਗ ਦਾ ਡਾਇਰੈਕਟਰ ਨਿਯੁਕਤ ਕੀਤਾ ਗਿਆ ਹੈ।
ਸਤਬੀਰ ਸਿੰਘ: ਡਾਇਰੈਕਟਰ, ਫਾਇਰ ਸਰਵਿਸਿਜ਼ ਅਤੇ ਸੀ.ਈ.ਓ. ਆਯੁਸ਼ਮਾਨ ਭਾਰਤ।
ਵੰਦਨਾ ਦਿਸੋਦੀਆ: ਵਧੀਕ ਸਕੱਤਰ (ਗ੍ਰਹਿ ਵਿਭਾਗ) ਅਤੇ ਐਮ.ਡੀ. ਹਰਿਆਣਾ ਅਨੁਸੂਚਿਤ ਜਾਤੀ ਵਿੱਤ ਅਤੇ ਵਿਕਾਸ ਨਿਗਮ।
ਸ਼ਾਸ਼ਵਤ ਸਾਂਗਵਾਨ: ਡਾਇਰੈਕਟਰ, ਸ਼ਹਿਰੀ ਸਥਾਨਕ ਨਿਕਾਏ ਅਤੇ ਮਿਸ਼ਨ ਡਾਇਰੈਕਟਰ, ਰਾਜ ਸ਼ਹਿਰੀ ਆਜੀਵਿਕਾ ਮਿਸ਼ਨ।
ਵਧੀਕ ਡਿਪਟੀ ਕਮਿਸ਼ਨਰ (ADC): ਲਕਸ਼ਿਤ ਸਰਤੀਨ (ਹਾਂਸੀ), ਅੰਕਿਤ ਕੁਮਾਰ ਚੌਕਸੇ (ਪਾਣੀਪਤ), ਅਰਪਿਤ ਸਾਂਗਲ (ਸਿਰਸਾ), ਜਯੋਤੀ (ਨੂਹ), ਉਤਸਵ ਆਨੰਦ (ਹਿਸਾਰ) ਅਤੇ ਡਾ. ਰਾਹੁਲ ਰਾਇਆ (ਕਰਨਾਲ) ਵਜੋਂ ਤਾਇਨਾਤ ਕੀਤੇ ਗਏ ਹਨ।
ਇਸ ਤੋਂ ਇਲਾਵਾ ਸਬ-ਡਿਵੀਜ਼ਨਲ ਮੈਜਿਸਟਰੇਟ (SDM) ਪੱਧਰ ’ਤੇ ਵੀ ਕਈ ਬਦਲਾਅ ਕੀਤੇ ਗਏ ਹਨ। ਕਣਿਕਾ ਗੋਇਲ ਅੰਬਾਲਾ ਛਾਉਣੀ ਦੀ ਨਵੀਂ ਐੱਸ.ਡੀ.ਐੱਮ. ਹੋਵੇਗੀ। ਯੋਗੇਸ਼ ਸੈਣੀ ਨੂੰ ਮਹਿੰਦਰਗੜ੍ਹ ਅਤੇ ਰਵੀ ਮੀਨਾ ਨੂੰ ਝੱਜਰ ਦਾ ਐੱਸ.ਡੀ.ਐੱਮ. ਲਾਇਆ ਗਿਆ ਹੈ। ਅੰਕਿਤਾ ਪਵਾਰ ਸਾਂਪਲਾ ਦੀ ਨਵੀਂ ਐੱਸ.ਡੀ.ਐੱਮ. ਹੋਵੇਗੀ, ਜਦਕਿ ਅਭਿਨਵ ਸਿਵਾਚ ਨੂੰ ਝੱਜਰ ਦੇ ਜ਼ਿਲ੍ਹਾ ਮਿਉਂਸਪਲ ਕਮਿਸ਼ਨਰ ਦਾ ਵਾਧੂ ਚਾਰਜ ਦਿੱਤਾ ਗਿਆ ਹੈ।
