ਕੇਕੇ ਬਾਂਸਲ
ਰਤੀਆ, 7 ਅਪਰੈਲ
ਸ਼ਹਿਰ ਵਾਸੀਆਂ ਨੇ ਹਰਿਆਣਾ ਦੇ ਮੁੱਖ ਮੰਤਰੀ ਤੋਂ ਇਲਾਵਾ ਡਿਪਟੀ ਕਮਿਸ਼ਨਰ ਨੂੰ ਪੱਤਰ ਭੇਜ ਕੇ ਘੱਗਰ ਨਦੀ ਕੋਲ ਹਰਿਆਣਾ ਅਤੇ ਪੰਜਾਬ ਨੂੰ ਜੋੜਨ ਵਾਲੀ ਬਾਈਪਾਸ ਸੜਕ ਦਾ ਸੁੰਦਰੀਕਰਨ ਕਰਨ ਦੀ ਮੰਗ ਕੀਤੀ ਹੈ। ਮੁੱਖ ਮੰਤਰੀ ਅਤੇ ਹੋਰ ਅਧਿਕਾਰੀਆਂ ਨੂੰ ਭੇਜੇ ਗਏ ਪੱਤਰ ਦੀਆਂ ਕਾਪੀਆਂ ਇੱਥੇ ਵੰਡਦੇ ਹੋਏ ਸ਼ਹਿਰ ਵਾਸੀਆਂ ਵਿਚ ਸ਼ਾਮਲ ਰਾਜ ਕੁਮਾਰ, ਨਰਿੰਦਰ ਕੁਮਾਰ, ਪ੍ਰਦੀਪ ਕੁਮਾਰ, ਅਤੁਲ ਕੁਮਾਰ, ਰਾਜੇਸ਼ ਕੁਮਾਰ, ਸ਼ੁਭਮ ਕੁਮਾਰ, ਹਰਦੇਵ ਸਿੰਘ, ਨਿਰਭੈ ਸਿੰਘ, ਜਗਤਾਰ ਸਿੰਘ, ਜਾਗਰ ਸਿੰਘ, ਗੁਲਜਾਰ, ਲਾਲ ਸਿੰਘ, ਸੰਜੇ ਕੁਮਾਰ ਨੇ ਦੱਸਿਆ ਕਿ ਸ਼ਹਿਰ ਦੇ ਬੁਢਲਾਡਾ ਰੋਡ ’ਤੇ ਸਥਿਤ ਘੱਗਰ ਨਦੀ ਕੋਲ ਬੁਢਲਾਡਾ ਅਤੇ ਟੋਹਾਣਾ ਤੋਂ ਇਲਾਵਾ ਹਰਿਆਣਾ, ਪੰਜਾਬ ਹੋਰ ਖੇਤਰਾਂ ਨੂੰ ਜੋੜਨ ਵਾਲੀ ਬਾਈਪਾਸ ਸੜਕ ਦੀ ਹਾਲਤ ਨਿਰੰਤਰ ਬਦਤਰ ਹੁੰਦੀ ਜਾ ਰਹੀ ਹੈ। ਉਉਨ੍ਹਾਂ ਦੱਸਿਆ ਕਿ ਪਿਛਲੇ ਦਿਨੀਂ ਹਰਿਆਣਾ ਪ੍ਰਦੂਸ਼ਣ ਬੋਰਡ ਦੀ ਟੀਮ ਨੇ ਨਿਰੀਖਣ ਕਰਦੇ ਹੋਏ ਸਬੰਧਤ ਬਾਈਪਾਸ ਸੜਕ ਨੇੜੇ ਸੁੱਟੀ ਗੰਦਗੀ ’ਤੇ ਚਿੰਤਾ ਪ੍ਰਗਟ ਕਰਦੇ ਹੋਏ ਨਗਰਪਾਲਿਕਾ ਨੂੰ ਇਸ ਇਲਾਕੇ ਵਿਚ ਸਫਾਈ ਦੇ ਵਿਸ਼ੇਸ਼ ਆਦੇਸ਼ ਦਿੱਤੇ ਸਨ।