Health Camp Initiative: ਲਾਇਨਜ਼ ਭਵਨ ’ਚ ਕੈਂਪ ਦੌਰਾਨ 65 ਯੂਨਿਟ Blood Donate
ਖੂਨਦਾਨੀਆਂ ਅਤੇ ਡਾਕਟਰੀ ਟੀਮ ਦਾ ਸਨਮਾਨ
ਲਾਇਨਜ਼ ਕਲੱਬ ਰੱਤੀਆ ਟਾਊਨ ਵੱਲੋਂ ਲਾਇਨਜ਼ ਜਨਪਦ 321-ਏ3 ਦੇ ਸੱਦੇ ’ਤੇ ਲਾਇਨਜ਼ ਭਵਨ ਵਿੱਚ ਸਰਵੇਸ਼ ਹੈਲਥ ਸਿਟੀ ਹਿਸਾਰ ਦੇ ਸਹਿਯੋਗ ਨਾਲ ਖੂਨਦਾਨ ਅਤੇ ਸਿਹਤ ਜਾਂਚ ਕੈਂਪ ਲਾਇਆ ਗਿਆ। ਕੈਂਪ ਦੌਰਾਨ 65 ਯੂਨਿਟ ਖੂਨ ਇਕੱਤਰ ਕੀਤਾ ਗਿਆ ਅਤੇ 100 ਤੋਂ ਵੱਧ ਵਿਅਕਤੀਆਂ ਦੀ ਬਲੱਡ ਸ਼ੂਗਰ ਦੀ ਜਾਂਚ ਕੀਤੀ ਗਈ। ਕੈਂਪ ਵਿੱਚ ਈ ਸੀ ਜੀ ਅਤੇ ਹੋਰ ਕਈ ਸਿਹਤ ਜਾਂਚਾਂ ਵੀ ਮੁਫ਼ਤ ਕੀਤੀਆਂ ਗਈਆਂ।
ਕੈਂਪ ਦੇ ਮੁੱਖ ਮਹਿਮਾਨ ਹਲਕਾ ਰੱਤੀਆ ਦੇ ਵਿਧਾਇਕ ਜਰਨੈਲ ਸਿੰਘ ਨੇ ਲੋਕਾਂ ਨੂੰ ਖੂਨਦਾਨ ਲਈ ਪ੍ਰੇਰਿਤ ਕਰਦਿਆਂ ਕਿਹਾ ਕਿ ਖੂਨ ਮਨੁੱਖੀ ਜੀਵਨ ਲਈ ਸਭ ਤੋਂ ਕੀਮਤੀ ਤੱਤ ਹੈ, ਜਿਸ ਨੂੰ ਕਿਸੇ ਪ੍ਰਯੋਗਸ਼ਾਲਾ ਵਿੱਚ ਤਿਆਰ ਨਹੀਂ ਕੀਤਾ ਜਾ ਸਕਦਾ। ਉਨ੍ਹਾਂ ਕਲੱਬ ਦੇ ਬੈਡਮਿੰਟਨ ਮੈਦਾਨ ਦੇ ਨਿਰਮਾਣ ਲਈ ਅਨੁਦਾਨ ਰਾਸ਼ੀ ਦੇਣ ਦਾ ਵੀ ਐਲਾਨ ਕੀਤਾ। ਲਾਇਨਜ਼ ਜਨਪਦ ਦੇ ਨਵ-ਚੁਣੇ ਗਵਰਨਰ ਲਾਇਨ ਸੰਜੈ ਗਾਂਧੀ ਨੇ ਕਲੱਬ ਨੂੰ ਵਧਾਈ ਦਿੱਤੀ। ਜਨਪਦ ਕੈਬਨਿਟ ਸਕੱਤਰ ਲਾਇਨ ਸ਼ਿਵ ਸੋਨੀ ਅਤੇ ਰੀਜਨ ਚੇਅਰਮੈਨ ਲਾਇਨ ਵਿਜੈ ਜਿੰਦਲ ਨੇ ਦੱਸਿਆ ਕਿ ਦਿੱਲੀ ਤੋਂ ਡੱਬਵਾਲੀ ਤੱਕ ਵੱਖ-ਵੱਖ ਕਲੱਬਾਂ ਵੱਲੋਂ ਇਹ ਮੁਹਿੰਮ ਚਲਾਈ ਜਾ ਰਹੀ ਹੈ। ਕਲੱਬ ਪ੍ਰਧਾਨ ਲਾਇਨ ਕਪਿਸ਼ ਗੁਪਤਾ ਅਤੇ ਪ੍ਰਾਜੈਕਟ ਅਧਿਕਾਰੀ ਲਾਇਨ ਅਨੀਸ਼ ਚੋਪੜਾ ਨੇ ਮਹਿਮਾਨਾਂ ਦਾ ਸਵਾਗਤ ਕੀਤਾ। ਸਮਾਗਮ ਦੇ ਅੰਤ ਵਿੱਚ ਖੂਨਦਾਨੀਆਂ ਅਤੇ ਹਿਸਾਰ ਤੋਂ ਆਈ ਡਾਕਟਰੀ ਟੀਮ ਨੂੰ ਪ੍ਰਸ਼ੰਸਾ ਪੱਤਰ ਤੇ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ।
