ਫਾਇਰ ਮੁਲਾਜ਼ਮਾਂ ਦੀਆਂ ਮੰਗਾਂ ਜਾਇਜ਼: ਸਿਨਦ

ਹਰਿਆਣਾ ਦਮਕਲ ਕੇਂਦਰ ਵਿਭਾਗ ਕਰਮਚਾਰੀ ਯੂਨੀਅਨ ਵੱਲੋਂ ਸ਼ੁਰੂ ਕੀਤੀ ਹੜਤਾਲ ਤਹਿਤ ਨਰਵਾਣਾ ਵਿੱਚ ਵੀ ਭੁੱਖ ਹੜਤਾਲ ਜਾਰੀ ਹੈ। ਹੜਤਾਲ ਦੇ ਅੱਜ 21ਵੇਂ ਦਿਨ ਦੇ ਧਰਨੇ ਦੀ ਪ੍ਰਧਾਨਗੀ ਡੀ ਓ ਪਵਨ ਕੁਮਾਰ ਵੱਲੋਂ ਕੀਤੀ ਗਈ। ਇਸ ਦੌਰਾਨ ਮੰਚ ਸੰਚਾਲਨ ਬਲਾਕ ਨਰਵਾਣਾ ਦੇ ਪ੍ਰਧਾਨ ਰਾਜਾ ਸਿੰਘ ਗੁਰਥਲੀ ਨੇ ਕੀਤਾ। ਅੱਜ ਦੀ ਭੁੱਖ ਹੜਤਾਲ ਉੱਤੇ ਯੂਨੀਅਨ ਦੇ ਦੋ ਕਰਮਚਾਰੀ ਸੂਬਾ ਉਪ ਪ੍ਰਧਾਨ ਸਤਿਆਵਾਨ ਪਾਨੂੰ ਅਤੇ ਸਤਿਆਵਾਨ ਨੈਣ ਬੈਠੇ। ਯੂਨੀਅਨ ਦੇ ਸੂਬਾ ਪ੍ਰਧਾਨ ਰਾਜਿੰਦਰ ਸਿਨਦ ਸਮਰਥਨ ਦੇਣ ਲਈ ਧਰਨੇ ਉੱਤੇ ਪੁੱਜੇ।

ਧਰਨੇ ਨੂੰ ਸੰਬੋਧਨ ਕਰਦੇ ਹੋਏ ਸੂਬਾ ਪ੍ਰਧਾਨ ਰਾਜਿੰਦਰ ਸਿਨਦ ਨੇ ਦੱਸਿਆ ਕਿ ਫਾਇਰ ਕਰਮਚਾਰੀਆਂ ਦੀਆਂ ਮੰਗਾਂ ਪੂਰੀ ਤਰ੍ਹਾਂ ਜਾਇਜ਼ ਹਨ। ਉਨ੍ਹਾਂ ਦੀਆਂ ਮੰਗਾਂ ਵਿੱਚ ਫ਼ਰੀਦਾਬਾਦ ਵਿੱਚ ਸ਼ਹੀਦ ਹੋਏ ਦੋ ਫਾਇਰ ਕਰਮਚਾਰੀਆਂ ਭਵੀ ਚੰਦ ਸ਼ਰਮਾ ਅਤੇ ਰਣਵੀਰ ਸਿੰਘ ਦੇ ਪਰਿਵਾਰ ਨੂੰ ਇੱਕ ਕਰੋੜ ਰੁਪਏ ਦੀ ਆਰਥਿਕ ਸਹਾਇਤਾ, ਪਰਿਵਾਰ ਦੇ ਇੱਕ ਮੈਂਬਰ ਨੂੰ ਪੱਕੀ ਨੌਕਰੀ, ਕਰਮਚਾਰੀ ਨੂੰ ਸ਼ਹੀਦ ਦਾ ਦਰਜਾ, ਕੱਚੇ ਫਾਇਰ ਕਰਮਚਾਰੀਆਂ ਨੂੰ 58 ਸਾਲਾਂ ਦੀ ਉਮਰ ਤੱਕ ਨੌਕਰੀ ਦੀ ਗਾਰੰਟੀ, ਪੇਅ-ਰੋਲ ਅਤੇ ਕੌਸ਼ਲ ਕਰਮਚਾਰੀਆਂ ਦੇ ਵੇਤਨ ਵਿੱਚ ਵਾਧਾ, ਕਰਮਚਾਰੀਆਂ ਨੂੰ 5 ਹਜ਼ਾਰ ਰੁਪਏ ਜ਼ੋਖ਼ਮ ਭੱਤਾ, 7500 ਰੁਪਏ ਵਰਦੀ ਭੱਤਾ, 500 ਰੁਪਏ ਧੁਆਈ ਭੱਤਾ, ਨਿਯਮਿਤ ਕਰਮਚਾਰੀਆਂ ਨੂੰ ਬਿਨਾਂ ਸ਼ਰਤ ਏ ਸੀ ਪੀ ਅਤੇ ਤਰੱਕੀ ਦਾ ਲਾਭ, ਕੱਚੇ ਦਮਕਲ ਕਰਮਚਾਰੀਆਂ ਨੂੰ ਐੱਲ ਟੀ ਸੀ ਦਾ ਲਾਭ, ਸਾਰੇ ਦਮਕਲ ਕਰਮਚਾਰੀਆਂ ਨੂੰ ਤਿਉਹਾਰੀ ਛੁੱਟੀਆਂ ਵਿੱਚ ਕੰਮ ਕਰਨ ਦੇ ਬਦਲੇ ਇੱਕ ਮਹੀਨੇ ਦਾ ਵਾਧੂ ਵੇਤਨ ਆਦਿ 22 ਸੂਤਰੀ ਮੰਗਾਂ ਰੱਖੀ ਗਈਆਂ ਹਨ। ਉਨ੍ਹਾਂ ਨੇ ਚਿਤਾਵਨੀ ਦਿੱਤੀ ਕਿ ਜਦੋਂ ਤੱਕ ਉਨ੍ਹਾਂ ਦੀਆਂ ਮੰਗਾਂ ਪੂਰੀਆਂ ਨਹੀਂ ਹੁੰਦੀਆਂ, ਉਦੋਂ ਤੱਕ ਉਨ੍ਹਾਂ ਦਾ ਧਰਨਾ ਅਤੇ ਭੁੱਖ ਹੜਤਾਲ ਜਾਰੀ ਰਹੇਗੀ।