ਮਹਿੰਦਰ ਸਿੰਘ ਰੱਤੀਆਂ
ਮੋਗਾ, 24 ਜਨਵਰੀ
ਭਾਵੇਂ ਸਿਆਸੀ ਆਗੂ ਸ਼ਹਿਰ ’ਚ ਕਰੋੜਾਂ ਰੁਪਏ ਦੇ ਵਿਕਾਸ ਕੰਮਾਂ ਵੱਡੇ-ਵੱਡੇ ਦਾਅਵੇ ਕਰ ਰਹੇ ਹਨ ਪਰ ਇਥੇ ਸਥਿੱਤ ਧਾਰਮਿਕ ਸਥਾਨ ਨਿਗਾਹਾ ਰੋਡ ਦੀ ਦਰਗਾਹ ਅੱਗੇ ਗਲੀ ਵਿੱਚ ਖੜੇ ਸੀਵਰੇਜ ਦੇ ਪਾਣੀ ਇਨ੍ਹਾਂ ਦਾਅਵਿਆਂ ਦੀ ਪੋਲ ਖੋਲ੍ਹ ਰਹੇ ਹਨ। ਇਸ ਬਦਬੂ ਭਰੇ ਮਾਹੌਲ ਨੇ ਮੁਹੱਲਾ ਵਾਸੀਆਂ ਹੀ ਨਹੀਂ ਬਲਕਿ ਰਾਹਗੀਰਾਂ ਦੇ ਵੀ ਨੱਕ ’ਚ ਦਮ ਕੀਤਾ ਹੋਇਆ ਹੈ। ਮੁਹੱਲਾ ਵਾਸੀ ਸਾਗਰ ਸੱਚਦੇਵਾ, ਪਵਨ ਕੁਮਾਰ, ਸੇਵਕ ਸਿੰਘ ਤੇ ਹੋਰਾਂ ਨੇ ਦੱਸਿਆ ਕਿ ਸੀਵਰੇਜ ਓਵਰਫਲੋਅ ਕਾਰਨ ਬਦਬੂ ਕਾਰਨ ਜਿਊਣਾ ਮੁਹਾਲ ਹੋ ਗਿਆ। ਦੱਸਣਯੋਗ ਹੈ ਕਿ ਬਿਨਾਂ ਬਰਸਾਤ ਤੋਂ ਹੀ ਇਸ ਸੜਕ ’ਤੇ ਹਰ ਵੇਲੇ ਸੀਵਰੇਜ ਦਾ ਗੰਦਾ ਪਾਣੀ ਭਰਿਆ ਰਹਿੰਦਾ ਹੈ। ਗੰਦੇ ਪਾਣੀ ਕਾਰਨ ਕਈ ਤਰ੍ਹਾਂ ਦੀਆਂ ਬੀਮਾਰੀਆਂ ਫੈਲਣ ਦਾ ਖਦਸ਼ਾ ਵੀ ਬਣਿਆ ਰਹਿੰਦਾ ਹੈ। ਉਨ੍ਹਾਂ ਕੌਂਸਲਰ ਤੇ ਨਗਰ ਨਿਗਮ ਅਧਿਕਾਰੀਆਂ ਕੋਲ ਵੀ ਸਮੱਸਿਆ ਦੇ ਹੱਲ ਲਈ ਅਪੀਲ ਕੀਤੀ ਪਰ ਪਰ ਇਸ ਮਸਲੇ ਦਾ ਕੋਈ ਵੀ ਹੱਲ ਨਹੀਂ ਹੋਇਆ। ਦੂਜੇ ਪਾਸੇ ਨਿਗਮ ਦੇ ਸੀਵਰੇਜ਼ ਵਿਭਾਗ ਅਧਿਕਾਰੀ ਸੇਵਕ ਰਾਮ ਨੇ ਕਿਹਾ ਕਿ ਸਮੱਸਿਆ ਉਨ੍ਹਾਂ ਦੇ ਧਿਆਨ ਵਿੱਚ ਆਈ ਹੈ ਜਲਦ ਹੀ ਇਸ ਸਮੱਸਿਆ ਦਾ ਹੱਲ ਕੀਤਾ ਜਾਏਗਾ।