ਸਲਮਾਨ ਖ਼ਾਨ ਨੇ ਟਰੋਲ ਕਰਨ ਵਾਲਿਆਂ ਨੂੰ ਜਵਾਬ ਦਿੱਤਾ

ਮਾਂ ਬਣਨ ਤੋਂ ਬਾਅਦ ਵਜ਼ਨ ਵਧਣ ਕਾਰਨ ਕੈਟਰੀਨਾ ਕੈਫ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਟਰੋਲ ਕਰਨ ਵਾਲਿਆਂ ਦੀ ਅਭਿਨੇਤਾ ਸਲਮਾਨ ਖਾਨ ਨੇ ਸਖ਼ਤ ਆਲੋਚਨਾ ਕੀਤੀ ਹੈ। ‘ਬਿੱਗ ਬੌਸ ਸੀਜ਼ਨ 20’ ਦੇ ਐਪੀਸੋਡ ਦੌਰਾਨ ਸਲਮਾਨ ਖਾਨ ਨੇ ਆਪਣੀ ਕਮੀਜ਼ ਲਾਹ ਦਿੱਤੀ ਤੇ ਮੇਕਅੱਪ ਸਾਫ਼ ਕਰ ਦਿੱਤਾ। ਇਸ ਤਰ੍ਹਾਂ ਅਦਾਕਾਰ ਨੇ ਉਨ੍ਹਾਂ ਟਰੋਲ ਕਰਨ ਵਾਲਿਆਂ ਨੂੰ ਜਵਾਬ ਦਿੱਤਾ ਜੋ ਉਨ੍ਹਾਂ ਦੀ ਬਦਲਦੀ ਦਿਖ ਦਾ ਮਜ਼ਾਕ ਉਡਾ ਰਹੇ ਸਨ। ਕਿਸੇ ਦਾ ਨਾਂ ਲਏ ਬਿਨਾਂ ਅਦਾਕਾਰ ਨੇ ਫਿਰ ਬੱਚੇ ਦੇ ਜਨਮ ਤੋਂ ਬਾਅਦ ਵਜ਼ਨ ਵਧਣ ਬਾਰੇ ਗੱਲ ਕੀਤੀ ਅਤੇ ਇਸ ਬਾਰੇ ਹੋ ਰਹੀ ਟਰੋਲਿੰਗ ’ਤੇ ਸਵਾਲ ਉਠਾਏ। ਉਨ੍ਹਾਂ ਇਹ ਵੀ ਕਿਹਾ ਕਿ ਜਦੋਂ ਅਭਿਨੇਤਰੀ ਫਿਲਮਾਂ ਵਿੱਚ ਵਾਪਸੀ ਲਈ ਤਿਆਰ ਹੋਵੇਗੀ, ਤਾਂ ਉਹ ਫਿੱਟ ਵੀ ਹੋ ਜਾਵੇਗੀ। ਸਲਮਾਨ ਨੇ ਨਾਲ ਕਿਹਾ ਕਿ ਗਰਭ ਅਵਸਥਾ ਤੋਂ ਬਾਅਦ ਹਰ ਕਿਸੇ ਦਾ ਵਜ਼ਨ ਵਧਦਾ ਹੈ। ਸਲਮਾਨ ਨੇ ਕਿਹਾ, ‘‘ਕਿਸੇ ਦਾ ਮਜ਼ਾਕ ਬਣਾਉਣਾ ਠੀਕ ਨਹੀਂ। ਉਹ ਅਜੇ ਆਪਣੇ ਪਰਿਵਾਰ ਨਾਲ ਸਮਾਂ ਬਿਤਾਉਣਾ ਚਾਹੁੰਦੀ ਹੈ।’’ ਜ਼ਿਕਰਯੋਗ ਹੈ ਕਿ ਕੈਟਰੀਨਾ ਨੇ ਨਵੰਬਰ 2025 ਵਿੱਚ ਬੇਟੇ ਵਿਹਾਨ ਨੂੰ ਜਨਮ ਦਿੱਤਾ ਸੀ। ਉਸ ਨੇ ਹਾਲ ਹੀ ਵਿੱਚ ਆਪਣੇ ਪਤੀ ਵਿੱਕੀ ਕੌਸ਼ਲ ਨਾਲ ਮੁੰਬਈ ਵਿੱਚ ਗਣੇਸ਼ ਚਤੁਰਥੀ ਸਮਾਰੋਹ ’ਚ ਸ਼ਿਰਕਤ ਕੀਤੀ ਸੀ। ਅਦਾਕਾਰਾ ਦੀਆਂ ਵੀਡੀਓਜ਼ ’ਤੇ ਉਸ ਦਾ ਮਜ਼ਾਕ ਉਡਾਇਆ ਗਿਆ। ਕਈਆਂ ਨੇ ਇਨ੍ਹਾਂ ਵੀਡੀਓਜ਼ ਦੀ ਤੁਲਨਾ ਉਸ ਦੀਆਂ ਪਹਿਲੀਆਂ ਤਸਵੀਰਾਂ ਨਾਲ ਵੀ ਕੀਤੀ। ਅਦਾਕਾਰਾ ਨੇ ਹਾਲੇ ਤੱਕ ਇਸ ’ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ।