ਮੈਨੂੰ ਸਟਾਰ ਨਹੀਂ ਸੀ ਬਣਨਾ ਚਾਹੀਦਾ: ਆਮਿਰ ਖਾਨ

ਅਦਾਕਾਰ ਆਮਿਰ ਖਾਨ ਨੇ ਕਿਹਾ ਕਿ ਉਸ ਨੂੰ ਨਹੀਂ ਪਤਾ ਕਿ ਉਹ ਸਟਾਰ ਕਿਵੇਂ ਬਣ ਗਿਆ। ਆਮਿਰ ਨੇ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ 30 ਸਾਲਾਂ ਤੋਂ ਵੱਧ ਦੇ ਆਪਣੇ ਕਰੀਅਰ ਦੌਰਾਨ ਉਸ ਨੇ ਉਹ ਸਭ ਕੁਝ ਕੀਤਾ, ਜਿਸ ਨਾਲ ਸਟਾਰਡਮ ਦੇ ਕਈ ਨਿਯਮ ਟੁੱਟ ਗਏ। ਆਮਿਰ (60) ਨੇ 56ਵੇਂ ਕੌਮਾਂਤਰੀ ਫਿਲਮ ਫੈਸਟੀਵਲ ਆਫ ਇੰਡੀਆ (ਆਈ ਐੱਫ ਐੱਫ ਆਈ) ਦੌਰਾਨ ਇੱਕ ਸੈਸ਼ਨ ਵਿੱਚ ਕਿਹਾ ਕਿ ਉਸ ਵੱਲੋਂ ਬਣਾਈਆਂ ਫਿਲਮਾਂ ’ਚ ਉਹ ਫਿਲਮਾਂ ਸ਼ਾਮਲ ਹਨ, ਜੋ ‘ਗ਼ੈਰ-ਵਿਵਹਾਰਕ’ ਸਨ। ਅਦਾਕਾਰ ਨੇ ਕਿਹਾ, ‘‘ਮੈਨੂੰ ਨਹੀਂ ਪਤਾ ਕਿ ਮੈਂ ਸਟਾਰ ਕਿਵੇਂ ਬਣਿਆ। ਤਰਕ ਨਾਲ ਦੇਖਿਆ ਜਾਵੇ ਤਾਂ ਮੈਨੂੰ ਸਟਾਰ ਨਹੀਂ ਬਣਨਾ ਚਾਹੀਦਾ ਸੀ। ਮੈਂ ਹਰ ਨਿਯਮ ਤੋੜਿਆ ਅਤੇ ਸਭ ਕੁਝ ਗ਼ੈਰ-ਵਿਵਹਾਰਕ ਕੀਤਾ। ਮੈਂ ਬਹੁਤ ਸ਼ੁਕਰਗੁਜ਼ਾਰ ਹਾਂ ਕਿ ਮੈਨੂੰ ਇੰਨਾ ਮਾਣ-ਸਤਿਕਾਰ ਅਤੇ ਸਫਲਤਾ ਮਿਲੀ ਹੈ।” ਅਦਾਕਾਰ ਨੇ ਕਿਹਾ ਕਿ ਭਾਵੇਂ ‘ਸਰਫਰੋਸ਼’, ‘ਲਗਾਨ’, ‘ਗਜਨੀ’, ‘ਤਾਰੇ ਜ਼ਮੀਨ ਪਰ’ ਹੋਵੇ ਜਾਂ ਨਵੀਂ ਫਿਲਮ ‘ਸਿਤਾਰੇ ਜ਼ਮੀਨ ਪਰ’ ਇਹ ਸਾਰੀਆਂ ਪ੍ਰਯੋਗਾਤਮਕ ਸਨ ਅਤੇ ਬਾਕਸ ਆਫਿਸ ’ਤੇ ਚੱਲਣੀਆਂ ਨਹੀਂ ਚਾਹੀਦੀਆਂ ਸਨ। ਉਸ ਨੇ ਕਿਹਾ, ‘‘ਲਗਪਗ ਹਰ ਫਿਲਮ ਦੀ ਚੋਣ ਕਰਦੇ ਸਮੇਂ ਮੈਨੂੰ ਇਹੀ ਲੱਗਦਾ ਸੀ ਕਿ ਪਤਾ ਨਹੀਂ ਚੱਲੇਗੀ ਜਾਂ ਨਹੀਂ।’’ ਆਮਿਰ ਨੇ ਕਿਹਾ ਕਿ ਜਦੋਂ 2008 ਵਿੱਚ ‘ਗਜਨੀ’ ਆਈ ਤਾਂ ਐਕਸ਼ਨ ਫਿਲਮਾਂ ਦਾ ਫੈਸ਼ਨ ਮੁੜ ਸ਼ੁਰੂ ਹੋ ਗਿਆ। ਆਮਿਰ ਦੀ ਤਾਜ਼ਾ ਫ਼ਿਲਮ ‘ਸਿਤਾਰੇ ਜ਼ਮੀਨ ਪਰ’ ਜੂਨ ਮਹੀਨੇ ਸਿਨੇਮਾਘਰਾਂ ਦਾ ਸ਼ਿੰਗਾਰ ਬਣੀ ਸੀ। ਇਸ ਫਿਲਮ ਨੇ ਬਾਕਸ ਆਫਿਸ ’ਤੇ 250 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕੀਤੀ ਹੈ।