ਰੂਸ ’ਚ ਪਹੁੰਚਿਆ ਬੌਲੀਵੁੱਡ; ਬੋਮਨ ਇਰਾਨੀ ਵੱਲੋਂ ਮਾਸਕੋ ’ਚ ਫਿਲਮ ਬਣਾਉਣ ਦੀ ਯੋਜਨਾ

ਮਾਸਕੋ ਫਿਲਮ ਕਲੱਸਟਰ (ਮੋਸਕਿਨੋ) ਦੇ ਸਮਰਥਨ ਨਾਲ ਪ੍ਰਮੁੱਖ ਭਾਰਤੀ ਅਦਾਕਾਰਾਂ, ਮੀਡੀਆ ਹਸਤੀਆਂ ਅਤੇ ਸਕਰੀਨ ਰਾਈਟਰਾਂ ਦੇ ਵਫ਼ਦ ਨੇ ਮਾਸਕੋ ਦਾ ਦੌਰਾ ਕੀਤਾ। ਵਫ਼ਦ ਵਿੱਚ ਅਦਾਕਾਰ ਅਤੇ ਨਿਰਮਾਤਾ ਬੋਮਨ ਇਰਾਨੀ, ਜੀਓ ਕਰੀਏਟਿਵ ਲੈਬਜ਼ ਦੇ ਮੁਖੀ ਆਦਿਤਿਆ ਭੱਟ, ਟੀ ਵੀ ਅਦਾਕਾਰਾ ਅਸ਼ਨੂਰ ਕੌਰ, ਆਰੂਸ਼ ਭੋਲਾ ਅਤੇ ਵਰੁਣ ਯਾਦਵ ਅਤੇ ਨਾਲ ਹੀ ਸਪਾਈਰਲ ਬਾਉਂਡ ਸਕ੍ਰੀਨਰਾਈਟਿੰਗ ਮੁਕਾਬਲੇ ਦੇ ਜੇਤੂ ਰਾਬੀਆ ਘੋਸ਼, ਸੁਮੋਨ ਬੋਸ ਅਤੇ ਰਾਜਿੰਦਰ ਸਿੰਘ ਪੁਲਰ ਸ਼ਾਮਲ ਸਨ। ਮਹਿਮਾਨਾਂ ਨੇ ਰਾਜਧਾਨੀ ਦੀ ਫਿਲਮ ਸਨਅਤ ਦੇ ਮੁੱਖ ਸਥਾਨਾਂ ਦਾ ਦੌਰਾ ਕੀਤਾ ਅਤੇ ਰੂਸੀ ਨਿਰਦੇਸ਼ਕਾਂ ਅਤੇ ਸਕ੍ਰੀਨਰਾਈਟਰਾਂ ਨਾਲ ਮੁਲਾਕਾਤ ਕੀਤੀ। ਭਾਰਤੀ ਫਿਲਮ ਸਨਅਤ ਦੀ ਇਹ ਦਿਲਚਸਪੀ ਮਾਸਕੋ ਦੇ ਅੰਤਰਰਾਸ਼ਟਰੀ ਪੱਧਰ ’ਤੇ ਵਿਆਪਕ ਬਦਲਾਅ ਨੂੰ ਦਰਸਾਉਂਦੀ ਹੈ। ਮਾਸਕੋ ਫਿਲਮ ਕਲੱਸਟਰ ਅੱਜ ਵਿਕਸਤ ਈਕੋਸਿਸਟਮ ਹੈ, ਜੋ ਨਾ ਸਿਰਫ ਰੂਸੀ ਫਿਲਮ ਨਿਰਮਾਤਾਵਾਂ ਦਾ ਸਮਰਥਨ ਕਰਦਾ ਹੈ, ਬਲਕਿ ਅੰਤਰਰਾਸ਼ਟਰੀ ਸਹਿਯੋਗ ਨੂੰ ਵੀ ਸਰਗਰਮੀ ਨਾਲ ਵਧਾਉਂਦਾ ਹੈ। ਟੀਵੀ ਅਦਾਕਾਰਾ ਅਸ਼ਨੂਰ ਕੌਰ, ਜਿਸ ਨੇ ਆਪਣੀ ਜ਼ਿੰਦਗੀ ਦਾ ਜ਼ਿਆਦਾਤਰ ਸਮਾਂ ਫਿਲਮ ਸੈੱਟਾਂ ‘ਤੇ ਬਿਤਾਇਆ ਹੈ, ਨੇ ਮੰਨਿਆ ਕਿ ਉਹ ਫਿਲਮ ਪਾਰਕ ਦੇ ਪੈਮਾਨੇ ਤੋਂ ਪ੍ਰਭਾਵਿਤ ਹੋਈ ਸੀ। ਕਲਾਕਾਰਾਂ ਨੇ ਉਥੇ ਜਾ ਕੇ ਦੇਖਿਆ ਕਿ ਮਾਸਕੋ ਦਾ ਫਿਲਮ ਨਿਰਮਾਣ ਅੰਦਰੋਂ ਕਿਵੇਂ ਕੰਮ ਕਰਦਾ ਹੈ। ਉਨ੍ਹਾਂ ਨੂੰ ਰੂਸੀ ਨਿਰਦੇਸ਼ਕਾਂ ਅਤੇ ਪਟਕਥਾ ਲੇਖਕਾਂ ਨੂੰ ਮਿਲਣ ਦਾ ਮੌਕਾ ਮਿਲਿਆ। ਬੋਮਨ ਇਰਾਨੀ ਨੇ ਕਿਹਾ ‘‘ਮੈਂ ਭਾਰਤੀ ਫਿਲਮ ਨਿਰਮਾਤਾਵਾਂ ਅਤੇ ਸਕ੍ਰੀਨਰਾਈਟਰਾਂ ਨੂੰ ਰੂਸ ਵਿਚਲੇ ਮੌਕਿਆਂ ਬਾਰੇ ਦੱਸਣਾ ਚਾਹੁੰਦਾ ਹਾਂ। ਇਹ ਮੇਰਾ ਫਰਜ਼ ਹੈ। ਅਸੀਂ ਇੱਕ ਦਿਨ ਇਕੱਠੇ ਫਿਲਮ ਬਣਾਵਾਂਗੇ।’’