ਅਭਿਨੇਤਰੀ ਮਹਿਰੀਨ ਪੀਰਜ਼ਾਦਾ ਵਿਆਹ ਦੇ ਬੰਧਨ ਵਿੱਚ ਬੱਝੀ

ਅਭਿਨੇਤਰੀ ਮਹਿਰੀਨ ਪੀਰਜ਼ਾਦਾ ਜੋ ਕਿ ‘ਐਫ2: ਫਨ ਐਂਡ ਫਰਸਟ੍ਰੇਸ਼ਨ’, ‘ਮਹਾਨੁਭਾਵੁਡੂ’ ਅਤੇ ‘ਰਾਜਾ ਦਾ ਗ੍ਰੇਟ’ ਵਰਗੀਆਂ ਫ਼ਿਲਮਾਂ ਲਈ ਜਾਣੀ ਜਾਂਦੀ ਹੈ, ਨੇ ਹਿਮਾਚਲ ਪ੍ਰਦੇਸ਼ ’ਚ ਇੱਕ ਨਿੱਜੀ ਸਮਾਰੋਹ ਦੌਰਾਨ ਅਰਸ਼ ਔਲਖ ਨਾਲ ਵਿਆਹ ਕਰਵਾ ਲਿਆ ਹੈ। ਜੋੜੇ ਨੇ ਐਤਵਾਰ ਨੂੰ ਆਪੋ-ਆਪਣੇ ਇੰਸਟਾਗ੍ਰਾਮ ਹੈਂਡਲ ’ਤੇ ਇੱਕ ਪੋਸਟ ਰਾਹੀਂ ਇਹ ਖ਼ਬਰ ਸਾਂਝੀ ਕੀਤੀ। ਇਸ ਵਿੱਚ ਵਿਆਹ ਦੀਆਂ ਤਸਵੀਰਾਂ ਪੋਸਟ ਕੀਤੀਆਂ ਗਈਆਂ ਸਨ। ਅਦਾਕਾਰਾ ਨੇ ਆਪਣੇ ਵਿਆਹ ’ਚ ਗੁਲਾਬੀ ਰੰਗ ਦਾ ਅਨਾਰਕਲੀ ਸੂਟ ਪਹਿਨਿਆ ਹੋਇਆ ਸੀ, ਜਿਸ ’ਤੇ ਚਾਂਦੀ ਰੰਗੇ ਫੁੱਲਾਂ ਵਾਲੀ ਕਢਾਈ ਕੀਤੀ ਹੋਈ ਸੀ। ਮਹਿਰੀਨ ਦੇ ਪਤੀ ਅਰਸ਼ ਔਲਖ ਨੇ ਅਨਾਰਕਲੀ ਕੁੜਤਾ ਅਤੇ ਚਿੱਟੀ ਪੈਂਟ ਪਹਿਨੀ ਹੋਈ ਸੀ। ਉਸ ਦੇ ਪਹਿਰਾਵੇ ’ਤੇ ਵੀ ਕਢਾਈ ਦਾ ਕੰਮ ਕੀਤਾ ਹੋਇਆ ਸੀ। ਜ਼ਿਕਰਯੋਗ ਹੈ ਕਿ ਅਦਾਕਾਰਾ ਦੀ ਪਹਿਲਾਂ ਭਵਿਆ ਬਿਸ਼ਨੋਈ ਨਾਲ ਮੰਗਣੀ ਹੋਈ ਸੀ, ਜੋ ਕਿ ਸਿਆਸਤ ਵਿੱਚ ਸਰਗਰਮ ਹਨ। ਉਨ੍ਹਾਂ ਦੀ ਮੰਗਣੀ ਮਾਰਚ 2021 ਵਿੱਚ ਹੋਈ ਸੀ, ਪਰ ਜੁਲਾਈ 2021 ਵਿੱਚ ਉਨ੍ਹਾਂ ਨੇ ਇਸ ਨੂੰ ਤੋੜ ਦਿੱਤਾ ਸੀ। ਮਹਿਰੀਨ ਨੇ 2016 ਵਿੱਚ ਤੇਲਗੂ ਫ਼ਿਲਮ ਤੋਂ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਇਸ ਤੋਂ ਬਾਅਦ ਉਸ ਨੇ ਕਈ ਪ੍ਰਾਜੈਕਟਾਂ ਵਿੱਚ ਕੰਮ ਕੀਤਾ।