ਨਵੀਂ ਦਿੱਲੀ, 15 ਜੁਲਾਈ
ਕੋਵਿਡ-19 ਮਹਾਮਾਰੀ ਦੌਰਾਨ ਪਰਵਾਸੀ ਕਾਮਿਆਂ ਨੂੰ ਉਨ੍ਹਾਂ ਦੇ ਘਰ ਤਕ ਪਹੁੰਚਾਉਣ ਲਈ ਮਦਦ ਕਰਕੇ ਕੌਮੀ ਪੱਧਰ ’ਤੇ ਸੁਰਖੀਆਂ ’ਚ ਆਇਆ ਅਦਾਕਾਰ ਸੋਨੂੰ ਸੂਦ ਜਲਦੀ ਹੀ ਆਪਣੇ ਇਸ ਤਜਰਬੇ ਬਾਰੇ ਕਿਤਾਬ ਲਿਖੇਗਾ।
ਇਸ ਪਲੇਠੀ ਕਿਤਾਬ ਦਾ ਭਾਵੇਂ ਅਜੇ ਤਕ ਕੋਈ ਸਿਰਲੇਖ ਨਹੀਂ ਰੱਖਿਆ ਗਿਆ, ਪਰ ਅਦਾਕਾਰ ਇਸ ਵਿੱਚ ਪਰਵਾਸੀ ਕਾਮਿਆਂ ਨਾਲ ਆਪਣੇ ਭਾਵਨਾਤਮਕ ਤੇ ਆਮ ਕਰਕੇ ਚੁਣੌਤੀਪੂਰਨ ਸਫ਼ਰ ਨੂੰ ਬਿਆਨ ਕਰੇਗਾ। ਪ੍ਰਕਾਸ਼ਨ ਹਾਊਸ ਪੈਂਗੁਇਨ ਰੈਂਡਮ ਹਾਊਸ ਇੰਡੀਆ ਨੇ ਅੱਜ ਐਲਾਨ ਕੀਤਾ ਕਿ ਕਿਤਾਬ ਸਾਲ ਦੇ ਆਖਿਰ ਤਕ ਰਿਲੀਜ਼ ਕੀਤੀ ਜਾਵੇਗੀ। ਸੂਦ ਨੇ ਇਕ ਬਿਆਨ ਵਿੱਚ ਕਿਹਾ, ‘ਮੈਂ ਆਪਣੇ ਇਨ੍ਹਾਂ ਤਜਰਬਿਆਂ ਤੇ ਕਹਾਣੀਆਂ, ਜੋ ਸਦਾ ਲਈ ਮੇਰੀ ਰੂਹ ਦੇ ਨਾਲ ਰਹਿਣਗੇ, ਨੂੰ ਇਸ ਕਿਤਾਬ ਵਿੱਚ ਬਿਆਨ ਕਰਨ ਦਾ ਫੈਸਲਾ ਕੀਤਾ ਹੈ। ਮੈਂ ਜੋਸ਼ ਵਿੱਚ ਵੀ ਹਾਂ ਤੇ ਥੋੜ੍ਹਾ ਘਬਰਾਇਆ ਵੀ। ਮੈਂ ਇਸ ਕਿਤਾਬ ਜ਼ਰੀਏ ਤੁਹਾਡੇ ਨਾਲ ਜੁੜਨ ਲਈ ਹੋਰ ਉਡੀਕ ਨਹੀਂ ਕਰ ਸਕਦਾ।’ -ਪੀਟੀਆਈ