NMC brings new rules: NMC ਨੇ ਹਟਾਈ MBBS ਸੀਟਾਂ ਦੀ ਲਿਮਟ, ਹੁਣ ਨਵੇਂ ਕਾਲਜ ਖੋਲ੍ਹਣਾ ਹੋਵੇਗਾ ਸੌਖਾ

ਭਾਰਤ ਵਿੱਚ ਮੈਡੀਕਲ ਸਿੱਖਿਆ ਦੇ ਖੇਤਰ ਨੂੰ ਵੱਡਾ ਹੁਲਾਰਾ ਦੇਣ ਲਈ, ਨੈਸ਼ਨਲ ਮੈਡੀਕਲ ਕਮਿਸ਼ਨ (NMC) ਨੇ 'ਅੰਡਰਗ੍ਰੈਜੂਏਟ ਮੈਡੀਕਲ ਐਜੂਕੇਸ਼ਨ ਰੈਗੂਲੇਸ਼ਨਜ਼, 2023' (UG-MSR 2023) ਵਿੱਚ ਅਹਿਮ ਬਦਲਾਅ ਕੀਤੇ ਹਨ। ਇਨ੍ਹਾਂ ਸੋਧੇ ਹੋਏ ਨਿਯਮਾਂ ਨਾਲ ਨਵੇਂ ਮੈਡੀਕਲ ਕਾਲਜ ਖੋਲ੍ਹਣ ਵਿੱਚ ਮਦਦ ਮਿਲੇਗੀ ਅਤੇ ਮੌਜੂਦਾ ਕਾਲਜਾਂ ਵਿੱਚ ਸੀਟਾਂ ਦੀ ਗਿਣਤੀ ਵੀ ਵਧੇਗੀ।

ਨਵੇਂ ਨਿਯਮਾਂ

1. MBBS ਸੀਟਾਂ ਦੀ ਸੀਮਾ ਖ਼ਤਮ

ਸਭ ਤੋਂ ਵੱਡਾ ਬਦਲਾਅ ਇਹ ਹੈ ਕਿ ਅਕਾਦਮਿਕ ਸਾਲ 2024-25 ਤੋਂ ਇੱਕ ਕਾਲਜ ਵਿੱਚ MBBS ਦੀਆਂ ਸੀਟਾਂ ਨੂੰ 150 ਤੱਕ ਸੀਮਤ ਰੱਖਣ ਦੀ ਪੁਰਾਣੀ ਪਾਬੰਦੀ ਹਟਾ ਦਿੱਤੀ ਗਈ ਹੈ। ਹੁਣ ਮੈਡੀਕਲ ਕਾਲਜ ਆਪਣੀ ਸਮਰੱਥਾ ਅਨੁਸਾਰ ਸੀਟਾਂ ਵਧਾ ਸਕਦੇ ਹਨ, ਬਸ਼ਰਤੇ ਉਹ ਹੋਰ ਰੈਗੂਲੇਟਰੀ ਸ਼ਰਤਾਂ ਪੂਰੀਆਂ ਕਰਦੇ ਹੋਣ।

2. ਆਬਾਦੀ ਦੇ ਅਧਾਰ 'ਤੇ ਸੀਟਾਂ ਦਾ ਅਨੁਪਾਤ ਵਾਪਸ ਲਿਆ

NMC ਨੇ ਉਸ ਨਿਯਮ ਨੂੰ ਵਾਪਸ ਲੈ ਲਿਆ ਹੈ ਜਿਸ ਤਹਿਤ ਕਿਸੇ ਰਾਜ ਜਾਂ ਕੇਂਦਰ ਸ਼ਾਸਤ ਪ੍ਰਦੇਸ਼ ਵਿੱਚ ਪ੍ਰਤੀ 10 ਲੱਖ ਦੀ ਆਬਾਦੀ ਪਿੱਛੇ 100 MBBS ਸੀਟਾਂ ਹੋਣੀਆਂ ਲਾਜ਼ਮੀ ਸਨ। ਇਸ ਸ਼ਰਤ ਦੇ ਹਟਣ ਨਾਲ ਹੁਣ ਸੂਬਿਆਂ ਲਈ ਮੈਡੀਕਲ ਸਿੱਖਿਆ ਦਾ ਬੁਨਿਆਦੀ ਢਾਂਚਾ ਵਧਾਉਣਾ ਸੌਖਾ ਹੋ ਜਾਵੇਗਾ।

3. ਦੂਰੀ ਦੇ ਨਿਯਮਾਂ ਵਿੱਚ ਸੋਧ

ਪਹਿਲਾਂ ਨਿਯਮ ਸੀ ਕਿ ਮੈਡੀਕਲ ਕਾਲਜ ਅਤੇ ਉਸ ਨਾਲ ਜੁੜੇ ਹਸਪਤਾਲ ਵਿਚਕਾਰ ਦੂਰੀ 30 ਮਿੰਟ ਦੇ ਸਫ਼ਰ ਦੇ ਅੰਦਰ ਹੋਣੀ ਚਾਹੀਦੀ ਸੀ। ਹੁਣ ਇਸ ਨੂੰ ਬਦਲ ਕੇ ਵੱਧ ਤੋਂ ਵੱਧ 10 ਕਿਲੋਮੀਟਰ ਦੀ ਦੂਰੀ ਕਰ ਦਿੱਤਾ ਗਿਆ ਹੈ। ਉੱਤਰ-ਪੂਰਬੀ ਅਤੇ ਹਿਮਾਲੀਅਨ ਸੂਬਿਆਂ ਲਈ, ਭੂਗੋਲਿਕ ਚੁਣੌਤੀਆਂ ਨੂੰ ਦੇਖਦੇ ਹੋਏ ਇਹ ਸੀਮਾ 15 ਕਿਲੋਮੀਟਰ ਰੱਖੀ ਗਈ ਹੈ।

ਮੈਡੀਕਲ ਇੰਫਰਾਸਟਰੱਕਚਰ ਨੂੰ ਮਿਲੇਗਾ ਹੁਲਾਰਾ

ਨੈਸ਼ਨਲ ਮੈਡੀਕਲ ਕਮਿਸ਼ਨ ਐਕਟ, 2019 ਦੇ ਤਹਿਤ ਕੀਤੀਆਂ ਗਈਆਂ ਇਹ ਸੋਧਾਂ ਦਰਸਾਉਂਦੀਆਂ ਹਨ ਕਿ ਸਰਕਾਰ ਮੈਡੀਕਲ ਸਿੱਖਿਆ ਨੂੰ ਵਧੇਰੇ ਪਹੁੰਚਯੋਗ ਬਣਾਉਣਾ ਚਾਹੁੰਦੀ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਨਿਯਮਾਂ ਵਿੱਚ ਇਸ ਢਿੱਲ ਨਾਲ ਸਰਕਾਰੀ ਅਤੇ ਨਿੱਜੀ ਖੇਤਰ ਦੋਵਾਂ ਨੂੰ ਨਵੇਂ ਕਾਲਜ ਸਥਾਪਤ ਕਰਨ ਅਤੇ ਪੁਰਾਣੇ ਕਾਲਜਾਂ ਦਾ ਵਿਸਤਾਰ ਕਰਨ ਲਈ ਉਤਸ਼ਾਹ ਮਿਲੇਗਾ।