Explainer: IRS ਅਫ਼ਸਰ ਦੀ ਧੀ ਦਾ ਕਾਤਲ ਕਿਵੇਂ ਫੜਿਆ ਗਿਆ ! ਇੰਸਟਾਗ੍ਰਾਮ ਚੈਟ ਅਤੇ ਹੋਟਲ Wi-Fi ਨੇ ਖੋਲ੍ਹੇ ਭੇਤ

ਦੱਖਣੀ-ਪੂਰਬੀ ਦਿੱਲੀ ਦੇ ਕੈਲਾਸ਼ ਹਿਲਜ਼ ਇਲਾਕੇ ਵਿੱਚ ਇੱਕ 22 ਸਾਲਾ IIT ਗ੍ਰੈਜੂਏਟ ਅਤੇ ਸੀਨੀਅਰ IRS ਅਫ਼ਸਰ ਦੀ ਧੀ ਨਾਲ ਜਬਰ-ਜਨਾਹ ਅਤੇ ਕਤਲ ਦੇ ਮਾਮਲੇ ਵਿੱਚ ਦਿੱਲੀ ਪੁਲੀਸ ਨੇ ਮੁਲਜ਼ਮ ਰਾਹੁਲ ਮੀਨਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਲਜ਼ਮ ਤੱਕ ਪਹੁੰਚਣ ਲਈ ਡਿਜੀਟਲ ਸਬੂਤਾਂ ਨੇ ਸਭ ਤੋਂ ਅਹਿਮ ਭੂਮਿਕਾ ਨਿਭਾਈ।

ਪੁਲੀਸ ਨੇ ਇਸ ਕੇਸ ਨੂੰ ਸੁਲਝਾਉਣ ਲਈ ਤਿੰਨ ਮੁੱਖ ਤਕਨੀਕੀ ਕੜੀਆਂ ਦੀ ਵਰਤੋਂ ਕੀਤੀ:

1. ਚੋਰੀ ਕੀਤਾ ਹੋਇਆ ਮੋਬਾਈਲ ਫੋਨ

ਜਾਂਚ ਦੌਰਾਨ ਪਤਾ ਲੱਗਾ ਕਿ ਮੁਲਜ਼ਮ ਕੋਲ ਆਪਣਾ ਕੋਈ ਨਿੱਜੀ ਫੋਨ ਨਹੀਂ ਸੀ। ਉਸ ਨੂੰ ਲੱਗਦਾ ਸੀ ਕਿ ਫੋਨ ਨਾ ਹੋਣ ਕਾਰਨ ਪੁਲੀਸ ਉਸ ਨੂੰ ਟ੍ਰੇਸ ਨਹੀਂ ਕਰ ਸਕੇਗੀ। ਪਰ, ਉਹ ਇੱਕ ਅਜਿਹਾ ਫੋਨ ਵਰਤ ਰਿਹਾ ਸੀ ਜੋ ਉਸ ਨੇ ਰਾਜਸਥਾਨ ਦੇ ਅਲਵਰ ਵਿੱਚ ਇੱਕ ਛੇੜਛਾੜ ਦੀ ਘਟਨਾ ਦੌਰਾਨ ਚੋਰੀ ਕੀਤਾ ਸੀ। ਪੁਲੀਸ ਨੇ ਇਸ ਚੋਰੀ ਦੇ ਫੋਨ ਦੀ ਲੋਕੇਸ਼ਨ ਅਤੇ ਵਰਤੋਂ ਦੇ ਤਰੀਕਿਆਂ ਦੀ ਜਾਂਚ ਕਰਕੇ ਮੁਲਜ਼ਮ ਦਾ ਪਿੱਛਾ ਕਰਨਾ ਸ਼ੁਰੂ ਕੀਤਾ।

2. ਹੋਟਲ ਦਾ Wi-Fi ਅਤੇ IPDR ਰਿਕਾਰਡ

ਕਤਲ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਰਾਹੁਲ ਮੀਨਾ ਪੀੜਤ ਦੇ ਘਰੋਂ ਕਰੀਬ 2.5 ਲੱਖ ਰੁਪਏ ਲੈ ਕੇ ਫ਼ਰਾਰ ਹੋ ਗਿਆ ਸੀ। ਉਹ ਦਿੱਲੀ ਦੇ ਦੁਆਰਕਾ ਇਲਾਕੇ ਦੇ ਇੱਕ ਹੋਟਲ ਵਿੱਚ ਜਾ ਕੇ ਲੁਕ ਗਿਆ। ਉੱਥੇ ਉਸ ਨੇ ਇੰਟਰਨੈੱਟ ਚਲਾਉਣ ਲਈ ਹੋਟਲ ਦੇ Wi-Fi ਦੀ ਵਰਤੋਂ ਕੀਤੀ। ਪੁਲੀਸ ਨੇ Internet Protocol Detail Records (IPDR) ਦੀ ਮਦਦ ਨਾਲ ਇਹ ਪਤਾ ਲਗਾ ਲਿਆ ਕਿ ਉਹ ਫੋਨ ਕਿਸ ਨੈੱਟਵਰਕ 'ਤੇ ਚੱਲ ਰਿਹਾ ਹੈ, ਜਿਸ ਨਾਲ ਉਸ ਦੀ ਸਹੀ ਲੋਕੇਸ਼ਨ ਹੋਟਲ ਵਿੱਚ ਮਿਲ ਗਈ।

3. ਇੰਸਟਾਗ੍ਰਾਮ (Instagram) ਚੈਟ

ਤੀਜਾ ਵੱਡਾ ਸਬੂਤ ਸੋਸ਼ਲ ਮੀਡੀਆ ਤੋਂ ਮਿਲਿਆ। ਹੋਟਲ ਵਿੱਚ ਰੁਕਣ ਦੌਰਾਨ ਮੁਲਜ਼ਮ ਗੁਰੂਗ੍ਰਾਮ ਵਿੱਚ ਰਹਿਣ ਵਾਲੇ ਆਪਣੇ ਇੱਕ ਰਿਸ਼ਤੇਦਾਰ ਨਾਲ ਲਗਾਤਾਰ ਇੰਸਟਾਗ੍ਰਾਮ ਰਾਹੀਂ ਗੱਲਬਾਤ ਕਰ ਰਿਹਾ ਸੀ। ਜਦੋਂ ਪੁਲੀਸ ਨੇ ਉਸ ਰਿਸ਼ਤੇਦਾਰ ਤੋਂ ਪੁੱਛਗਿੱਛ ਕੀਤੀ, ਤਾਂ ਉਸ ਨੇ ਮੁਲਜ਼ਮ ਦੀਆਂ ਹਰਕਤਾਂ ਅਤੇ ਟਿਕਾਣੇ ਬਾਰੇ ਅਹਿਮ ਜਾਣਕਾਰੀ ਦਿੱਤੀ।

ਦਿੱਲੀ ਅਤੇ ਰਾਜਸਥਾਨ (ਅਲਵਰ, ਜੈਪੁਰ, ਦੌਸਾ) ਵਿੱਚ ਪੁਲੀਸ ਦੀਆਂ 15 ਤੋਂ ਵੱਧ ਟੀਮਾਂ ਛਾਪੇਮਾਰੀ ਕਰ ਰਹੀਆਂ ਸਨ, ਪਰ Wi-Fi ਅਤੇ ਡਿਜੀਟਲ ਸਬੂਤਾਂ ਨੇ ਸਾਰੇ ਭੇਤ ਖੋਲ ਦਿੱਤੇ। ਪੁਲੀਸ ਮੁਤਾਬਕ ਰਾਹੁਲ ਮੀਨਾ ਪਹਿਲਾਂ ਹੀ ਰਾਜਸਥਾਨ ਵਿੱਚ ਇੱਕ ਜਬਰ-ਜਨਾਹ ਦੇ ਕੇਸ ਵਿੱਚ ਲੋੜੀਂਦਾ ਸੀ। ਪੁਲੀਸ ਦੀ ਮੁਸਤੈਦੀ ਕਾਰਨ ਇਹ ਖ਼ਤਰਨਾਕ ਅਪਰਾਧੀ ਹੁਣ ਸਲਾਖਾਂ ਪਿੱਛੇ ਹੈ।