Explainer: ਪੰਜਾਬੀ ਕਿਉਂ ਨਹੀਂ ਛੱਡ ਰਹੇ ਰਸੋਈ ਗੈਸ ਸਿਲੰਡਰ? ਪਾਈਪਡ ਗੈਸ (PNG) ਦੇ ਰਾਹ ਵਿੱਚ ਵੱਡੀਆਂ ਰੁਕਾਵਟਾਂ
ਸੂਬੇ ਵਿੱਚ 96 ਲੱਖ ਸਿਲੰਡਰ ਕਨੈਕਸ਼ਨਾਂ ਦੇ ਮੁਕਾਬਲੇ ਪਾਈਪਡ ਗੈਸ ਦੇ ਸਿਰਫ਼ 1.5 ਲੱਖ ਗਾਹਕ; ਸੁਰੱਖਿਆ ਅਤੇ ਸੇਵਾਵਾਂ ’ਤੇ ਉੱਠੇ ਸਵਾਲ
Explainer: ਪੰਜਾਬ ਵਿੱਚ ਕੇਂਦਰੀ ਗੈਸ ਪਾਈਪਲਾਈਨ (PNG) ਨੂੰ ਉਤਸ਼ਾਹਿਤ ਕਰਨ ਦੇ ਸਰਕਾਰੀ ਯਤਨਾਂ ਦੇ ਬਾਵਜੂਦ, ਲੋਕ ਅਜੇ ਵੀ ਰਵਾਇਤੀ LPG ਸਿਲੰਡਰਾਂ ਨੂੰ ਹੀ ਪਹਿਲ ਦੇ ਰਹੇ ਹਨ। ਇੱਕ ਰਿਪੋਰਟ ਅਨੁਸਾਰ, ਪੰਜਾਬ ਵਿੱਚ ਲਗਭਗ 96 ਲੱਖ LPG ਕਨੈਕਸ਼ਨ ਹਨ, ਜਦੋਂਕਿ ਪਾਈਪਡ ਗੈਸ ਦੇ ਸਿਰਫ਼ 1.5 ਲੱਖ ਕਨੈਕਸ਼ਨ ਹੀ ਹਨ।
ਇਸ ਦਾ ਮੁੱਖ ਕਾਰਨ ਪਾਈਪਡ ਗੈਸ ਦੀ ਸਥਾਪਨਾ ’ਤੇ ਆਉਣ ਵਾਲਾ ਉੱਚਾ ਖਰਚਾ, ਸੁਰੱਖਿਆ ਨੂੰ ਲੈ ਕੇ ਚਿੰਤਾਵਾਂ ਅਤੇ ਬਾਅਦ ਵਿੱਚ ਮਿਲਣ ਵਾਲੀਆਂ ਮਾੜੀਆਂ ਸੇਵਾਵਾਂ ਹਨ। ਸਮਾਜਿਕ ਕਾਰਕੁਨਾਂ ਅਨੁਸਾਰ, ਕਿਰਾਏਦਾਰਾਂ ਲਈ ਨਵੇਂ ਕਨੈਕਸ਼ਨ ਦੀ ਸਕਿਓਰਿਟੀ ਭਰਨਾ ਵੀ ਇੱਕ ਵੱਡੀ ਸਿਰਦਰਦੀ ਹੈ, ਜਦੋਂਕਿ ਇੱਕ ਸਿਲੰਡਰ ਆਮ ਤੌਰ ’ਤੇ ਢਾਈ ਮਹੀਨੇ ਚੱਲ ਜਾਂਦਾ ਹੈ।
ਦੂਜੇ ਪਾਸੇ, ਪੱਛਮੀ ਏਸ਼ੀਆ ਵਿੱਚ ਚੱਲ ਰਹੀ ਜੰਗ ਕਾਰਨ LPG ਦੀ ਸਪਲਾਈ ਵਿੱਚ 25 ਫੀਸਦੀ ਦੀ ਕਮੀ ਆਈ ਹੈ, ਜਿਸ ਕਾਰਨ ਬਾਜ਼ਾਰ ਵਿੱਚ ਹਾਹਾਕਾਰ ਮਚੀ ਹੋਈ ਹੈ। ਪੰਜਾਬ ਦੇ LPG ਡਿਸਟਰੀਬਿਊਟਰਾਂ ਦੀ ਫੈਡਰੇਸ਼ਨ ਦੇ ਪ੍ਰਧਾਨ ਗੁਰਪਾਲ ਸਿੰਘ ਮਾਨ ਨੇ ਦੋਸ਼ ਲਾਇਆ ਹੈ ਕਿ ਸਰਕਾਰੀ ਤੇਲ ਕੰਪਨੀਆਂ ਲੋਕਾਂ ਨੂੰ ਜਾਣਬੁੱਝ ਕੇ ਨਿੱਜੀ PNG ਨੈੱਟਵਰਕ ਵੱਲ ਧੱਕ ਰਹੀਆਂ ਹਨ।
ਮਾਰਚ ਵਿੱਚ ਸਿਲੰਡਰਾਂ ਦੀ ਬੁਕਿੰਗ ਵਿੱਚ 300ਫੀਸਦ ਦਾ ਉਛਾਲ ਦੇਖਿਆ ਗਿਆ ਹੈ, ਜਿਸ ਕਾਰਨ ਲੋਕਾਂ ਨੂੰ ਲੰਬੀਆਂ ਕਤਾਰਾਂ ਵਿੱਚ ਲੱਗਣਾ ਪੈ ਰਿਹਾ ਹੈ। ਅੰਮ੍ਰਿਤਸਰ 33,500 ਕਨੈਕਸ਼ਨਾਂ ਨਾਲ ਸੂਬੇ ਵਿੱਚ ਸਭ ਤੋਂ ਅੱਗੇ ਹੈ, ਜਦੋਂਕਿ ਲੁਧਿਆਣਾ ਅਤੇ ਜਲੰਧਰ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਵੀ ਪਾਈਪਡ ਗੈਸ ਦੀ ਰਫ਼ਤਾਰ ਬਹੁਤ ਸੁਸਤ ਹੈ।
