Explainer: ‘ਕੇਰਲ’ ਹੁਣ ਬਣਿਆ ‘ਕੇਰਲਮ’: ਕੀਤ ਹੈ ਇੱਕ ਇਤਿਹਾਸਕ ਬਦਲਾਅ ਦੇ ਪਿੱਛੇ ਦੀ ਪੂਰੀ ਕਹਾਣੀ?

ਕੇਰਲ ਅਤੇ ਕੇਰਲਮ ਦਾ ਭਾਸ਼ਾਈ ਟਕਰਾਅ: ਆਖਿਰ ਕੀ ਹੈ ਫਰਕ?

ਮਲਿਆਲਮ ਪਛਾਣ: ਮਲਿਆਲਮ ਭਾਸ਼ਾ ਵਿੱਚ ਰਾਜ ਨੂੰ ਹਮੇਸ਼ਾ ਤੋਂ 'ਕੇਰਲਮ' ਹੀ ਕਿਹਾ ਜਾਂਦਾ ਰਿਹਾ ਹੈ। 'ਕੇਰਲ' ਸ਼ਬਦ ਮੁੱਖ ਤੌਰ 'ਤੇ ਅੰਗਰੇਜ਼ੀ ਅਤੇ ਬਸਤੀਵਾਦੀ ਸ਼ਾਸਕਾਂ ਦੀ ਸਹੂਲਤ ਕਾਰਨ ਪ੍ਰਚਲਨ ਵਿੱਚ ਆਇਆ ਸੀ। ਮਲਿਆਲਮ ਵਿੱਚ 'ਕੇਰਾ' ਦਾ ਅਰਥ ਹੈ ਨਾਰੀਅਲ ਅਤੇ 'ਆਲਮ' ਦਾ ਅਰਥ ਹੈ ਭੂਮੀ। ਇਸ ਤਰ੍ਹਾਂ 'ਕੇਰਲਮ' ਦਾ ਸ਼ਾਬਦਿਕ ਅਰਥ ਹੈ 'ਨਾਰੀਅਲ ਦੇ ਦਰੱਖਤਾਂ ਦੀ ਭੂਮੀ'।

ਰਾਜ ਸਰਕਾਰ ਚਾਹੁੰਦੀ ਹੈ ਕਿ ਸੰਵਿਧਾਨ ਦੀ ਅੱਠਵੀਂ ਅਨੁਸੂਚੀ ਵਿੱਚ ਸ਼ਾਮਲ ਸਾਰੀਆਂ 22 ਅਧਿਕਾਰਤ ਭਾਸ਼ਾਵਾਂ ਵਿੱਚ ਰਾਜ ਦੀ ਪਛਾਣ 'ਕੇਰਲਮ' ਵਜੋਂ ਹੀ ਸਥਾਪਿਤ ਹੋਵੇ।

ਇਤਿਹਾਸਕ ਸਬੂਤ: 2200 ਸਾਲ ਪੁਰਾਣੀਆਂ ਜੜ੍ਹਾਂ ਦੀ ਤਲਾਸ਼

ਇਤਿਹਾਸਕ ਤੌਰ 'ਤੇ ਕੇਰਲ ਦਾ ਸਭ ਤੋਂ ਪੁਰਾਣਾ ਲਿਖਤੀ ਹਵਾਲਾ ਸਮਰਾਟ ਅਸ਼ੋਕ ਦੇ 257 ਈਸਵੀ ਪੂਰਵ ਦੇ 'ਸ਼ਿਲਾਲੇਖ II' ਵਿੱਚ ਮਿਲਦਾ ਹੈ। ਇਸ ਵਿੱਚ ਇਸ ਖੇਤਰ ਦੇ ਸ਼ਾਸਕ ਨੂੰ 'ਕੇਰਲਪੁਤਰ' ਕਿਹਾ ਗਿਆ ਹੈ। ਮੱਧਕਾਲੀ ਇਤਿਹਾਸ ਵਿੱਚ ਚੇਰਾ ਰਾਜਵੰਸ਼ ਦੇ ਸ਼ਾਸਨਕਾਲ ਦੌਰਾਨ ਵੀ ਇਸ ਖੇਤਰ ਨੂੰ 'ਚੇਰਾ-ਆਲਮ' ਜਾਂ 'ਕੇਰਲਮ' ਵਜੋਂ ਦਰਸਾਇਆ ਗਿਆ ਸੀ।

ਵਿਧਾਨ ਸਭਾ ਤੋਂ ਕੈਬਨਿਟ ਤੱਕ ਦਾ ਸਫ਼ਰ

ਅਗਸਤ 2023 ਵਿਚ ਕੇਰਲ ਵਿਧਾਨ ਸਭਾ ਨੇ ਪਹਿਲੀ ਵਾਰ ਪ੍ਰਸਤਾਵ ਭੇਜਿਆ ਸੀ, ਪਰ ਕੇਂਦਰ ਨੇ ਤਕਨੀਕੀ ਸੁਧਾਰਾਂ ਲਈ ਇਸ ਨੂੰ ਵਾਪਸ ਭੇਜ ਦਿੱਤਾ। ਫਿਰ 24 ਜੂਨ, 2024 ਨੂੰ ਵਿਧਾਨ ਸਭਾ ਨੇ ਸਰਬਸੰਮਤੀ ਨਾਲ ਸੋਧਿਆ ਹੋਇਆ ਪ੍ਰਸਤਾਵ ਪਾਸ ਕੀਤਾ ਅਤੇ 24 ਫਰਵਰੀ, 2026 ਨੂੰ ਮੋਦੀ ਸਰਕਾਰ ਨੇ ਕੈਬਨਿਟ ਮੀਟਿੰਗ ਵਿੱਚ ਇਸਨੂੰ ਅੰਤਿਮ ਮਨਜ਼ੂਰੀ ਦਿੱਤੀ।

ਪ੍ਰਸ਼ਾਸਨਿਕ ਅਤੇ ਵਿੱਤੀ ਪ੍ਰਭਾਵ: ਕੀ-ਕੀ ਬਦਲੇਗਾ?

ਮਾਹਿਰਾਂ ਅਨੁਸਾਰ ਸਾਰੇ ਰੇਲਵੇ ਸਟੇਸ਼ਨਾਂ, ਬੱਸ ਅੱਡਿਆਂ, ਸਾਈਨਬੋਰਡਾਂ ਅਤੇ ਡਿਜੀਟਲ ਰਿਕਾਰਡਾਂ ਨੂੰ ਅਪਡੇਟ ਕਰਨ ਵਿੱਚ 300 ਤੋਂ 500 ਕਰੋੜ ਰੁਪਏ ਤੱਕ ਦਾ ਖਰਚਾ ਆ ਸਕਦਾ ਹੈ। ਵਿਦੇਸ਼ ਮੰਤਰਾਲੇ ਨੂੰ ਭਾਰਤੀ ਪਾਸਪੋਰਟ ਦੇ ਡੇਟਾਬੇਸ ਵਿੱਚ ਬਦਲਾਅ ਕਰਨਾ ਹੋਵੇਗਾ। ਹੁਣ ਨਵੇਂ ਜਾਰੀ ਹੋਣ ਵਾਲੇ ਪਾਸਪੋਰਟਾਂ 'ਤੇ 'Keralam' ਦਰਜ ਹੋਵੇਗਾ।

ਰਾਜਾਂ ਦੇ ਨਾਮ ਬਦਲਣ ਦਾ ਇਤਿਹਾਸ

ਉੱਤਰ ਪ੍ਰਦੇਸ਼ (1950): 'ਸੰਯੁਕਤ ਪ੍ਰਾਂਤ' ਤੋਂ ਬਦਲਿਆ ਗਿਆ।

ਤਾਮਿਲਨਾਡੂ (1969): 'ਮਦਰਾਸ ਰਾਜ' ਤੋਂ ਬਦਲਿਆ ਗਿਆ।

ਕਰਨਾਟਕ (1973): 'ਮੈਸੂਰ ਰਾਜ' ਤੋਂ ਬਦਲਿਆ ਗਿਆ।

ਉੱਤਰਾਖੰਡ (2007): 'ਉੱਤਰਾਂਚਲ' ਤੋਂ ਬਦਲਿਆ ਗਿਆ।

ਓਡੀਸ਼ਾ (2011): 'ਉੜੀਸਾ' ਤੋਂ ਬਦਲਿਆ ਗਿਆ।

ਮੁੱਖ ਮੰਤਰੀ ਪਿਨਰਈ ਵਿਜਯਨ ਨੇ ਇਸ ਨੂੰ ਰਾਜ ਦੇ ਇਤਿਹਾਸ ਦਾ ਇੱਕ ਗੌਰਵਮਈ ਪਲ ਦੱਸਿਆ ਹੈ ਅਤੇ ਵਿਰੋਧੀ ਧਿਰ (UDF) ਨੇ ਵੀ ਇਸ ਪ੍ਰਸਤਾਵ ਦਾ ਸਮਰਥਨ ਕੀਤਾ ਹੈ।