PF ’ਚ ਵੱਡੀ ਰਾਹਤ: EPFO ਦੀ ਨਵੀਂ ਅਮਨੈਸਟੀ ਸਕੀਮ ਨਾਲ ਜਾਣੋ ਕਿਵੇਂ ਤੇ ਕਿਸ ਨੂੰ ਮਿਲੇਗਾ ਲਾਭ
ਯੋਗ ਕਰਮਚਾਰੀਆਂ ਦਾ ਹਿੱਸਾ ਹੋ ਸਕਦਾ ਹੈ ਮੁਆਫ਼; ਜਾਣੋ ਸਕੀਮ ਦੀ ਪੂਰੀ ਪ੍ਰਕਿਰਿਆ ਤੇ ਆਖਰੀ ਤਾਰੀਖ
ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਵੱਲੋਂ ਸ਼ੁਰੂ ਕੀਤੀ ਗਈ ਕਰਮਚਾਰੀ ਨਾਮਜ਼ਦਗੀ ਮੁਹਿੰਮ (EEC) 2026 ਉਨ੍ਹਾਂ ਅਦਾਰਿਆਂ ਅਤੇ ਕਰਮਚਾਰੀਆਂ ਲਈ ਇੱਕ ਵੱਡੀ ਰਾਹਤ ਹੈ ਜੋ ਹੁਣ ਤੱਕ ਪੀ.ਐੱਫ. ਦੇ ਦਾਇਰੇ ਤੋਂ ਬਾਹਰ ਰਹਿ ਗਏ ਸਨ। ਇਸ ਪੂਰੀ ਯੋਜਨਾ ਅਤੇ ਇਸ ਨਾਲ ਜੁੜੇ ਅਹਿਮ ਪਹਿਲੂਆਂ ਨੂੰ ਆਸਾਨ ਸ਼ਬਦਾਂ ਵਿੱਚ ਇਸ ਤਰ੍ਹਾਂ ਸਮਝਿਆ ਜਾ ਸਕਦਾ ਹੈ:
ਇਹ ਯੋਜਨਾ ਕਿਸ ਲਈ ਹੈ ?
ਪੀ.ਐੱਫ. ਟਰੱਸਟ ਜਿਨ੍ਹਾਂ ਕੋਲ ਛੋਟ ਨਹੀਂ ਹੈ: ਬਹੁਤ ਸਾਰੇ ਅਜਿਹੇ ਪੀ.ਐੱਫ. ਟਰੱਸਟ ਹਨ ਜਿਨ੍ਹਾਂ ਕੋਲ ਇਨਕਮ ਟੈਕਸ (ਆਮ ਕਰ ਵਿਭਾਗ) ਦੀ ਮਾਨਤਾ ਤਾਂ ਹੈ, ਪਰ ਈ.ਪੀ.ਐੱਫ. ਕਾਨੂੰਨ ਤਹਿਤ ਉਨ੍ਹਾਂ ਕੋਲ ਰਸਮੀ ਤੌਰ ’ਤੇ ਛੋਟ (Exemption) ਦਾ ਆਰਡਰ ਨਹੀਂ ਹੈ। ਇਹ ਸਕੀਮ ਉਨ੍ਹਾਂ ਦੀ ਸਥਿਤੀ ਨੂੰ ਕਾਨੂੰਨੀ ਦਾਇਰੇ ਵਿੱਚ ਲਿਆਉਣ ਲਈ ਹੈ।
ਛੁਟੇ ਹੋਏ ਕਰਮਚਾਰੀ: ਉਹ ਕਰਮਚਾਰੀ ਜੋ 1 ਅਪਰੈਲ 2009 ਤੋਂ 31 ਮਾਰਚ 2026 ਦੇ ਵਿਚਕਾਰ ਯੋਗ ਹੋਣ ਦੇ ਬਾਵਜੂਦ ਪੀ.ਐੱਫ. ਫ੍ਰੇਮਵਰਕ ਵਿੱਚ ਸ਼ਾਮਲ ਨਹੀਂ ਕੀਤੇ ਜਾ ਸਕੇ ਸਨ, ਉਹ ਹੁਣ ਇਸ ਮੁਹਿੰਮ ਤਹਿਤ ਨਾਮਜ਼ਦ ਹੋ ਸਕਦੇ ਹਨ।
ਇਸ ਮੁਹਿੰਮ ਦੇ ਮੁੱਖ ਲਾਭ ਕੀ ਹਨ ?
ਕਰਮਚਾਰੀਆਂ ਲਈ ਰਾਹਤ: ਮੁਹਿੰਮ ਦੀਆਂ ਸ਼ਰਤਾਂ ਤਹਿਤ ਜੇਕਰ ਪਹਿਲਾਂ ਕਰਮਚਾਰੀਆਂ ਦੀ ਤਨਖ਼ਾਹ ਵਿੱਚੋਂ ਪੀ.ਐੱਫ. ਦਾ ਹਿੱਸਾ ਨਹੀਂ ਕੱਟਿਆ ਗਿਆ ਸੀ, ਤਾਂ ਉਨ੍ਹਾਂ ਦੇ ਹਿੱਸੇ ਦਾ ਯੋਗਦਾਨ ਮੁਆਫ ਕੀਤਾ ਜਾ ਸਕਦਾ ਹੈ।
ਸਵੈ-ਇੱਛਾ ਨਾਲ ਸੁਧਾਰ ਦਾ ਮੌਕਾ: ਨਿਯੋਕਤਾ (ਮਾਲਕ) ਬੀਤੇ ਸਮੇਂ ਦੀਆਂ ਆਪਣੀਆਂ ਗ਼ਲਤੀਆਂ ਜਾਂ ਪਾਲਣਾ ਵਿੱਚ ਰਹੀਆਂ ਖਾਮੀਆਂ ਨੂੰ ਬਿਨਾਂ ਕਿਸੇ ਜੁਰਮਾਨੇ ਦੇ ਸਵੈ-ਇੱਛਾ ਨਾਲ ਠੀਕ ਕਰ ਸਕਦੇ ਹਨ।
ਕੁਝ ਸਖ਼ਤ ਸ਼ਰਤਾਂ ਤੋਂ ਛੋਟ: ਯੋਗ ਟਰੱਸਟਾਂ ਨੂੰ ਘੱਟੋ-ਘੱਟ ਕਰਮਚਾਰੀਆਂ ਦੀ ਗਿਣਤੀ, ਘੱਟੋ-ਘੱਟ ਫੰਡ ਸਾਈਜ਼ (ਕਾਰਪਸ) ਅਤੇ ਤਿੰਨ ਸਾਲਾਂ ਦੀ ਪਾਲਣਾ ਵਰਗੀਆਂ ਮੁਸ਼ਕਲ ਸ਼ਰਤਾਂ ਤੋਂ ਛੋਟ ਦਿੱਤੀ ਜਾਵੇਗੀ।
ਇਹ ਪ੍ਰਕਿਰਿਆ ਕਿਵੇਂ ਕੰਮ ਕਰੇਗੀ ?
ਟਾਈਮਲਾਈਨ: ਇਹ ਵਿੰਡੋ 6 ਮਹੀਨਿਆਂ ਲਈ ਖੁੱਲ੍ਹੀ ਹੈ ਅਤੇ ਇਸ ਅਧੀਨ ਪੀ.ਐੱਫ. ਟਰੱਸਟਾਂ ਨੂੰ ਅਪਲਾਈ ਕਰਨ ਲਈ 28 ਦਸੰਬਰ ਤੱਕ ਦਾ ਸਮਾਂ ਦਿੱਤਾ ਗਿਆ ਹੈ, ਜਦੋਂ ਕਿ ਇਹ ਮੁਹਿੰਮ 31 ਅਕਤੂਬਰ ਤੱਕ ਜਾਰੀ ਰਹੇਗੀ।
ਤਕਨੀਕੀ ਪ੍ਰਕਿਰਿਆ: ਨਿਯੋਕਤਾਵਾਂ ਨੂੰ ਉਮੰਗ (UMANG) ਐਪ ਰਾਹੀਂ ਚਿਹਰਾ ਪ੍ਰਮਾਣੀਕਰਨ (ਫੇਸ ਅਥੈਂਟੀਕੇਸ਼ਨ) ਆਧਾਰਿਤ ਯੂਨੀਵਰਸਲ ਅਕਾਊਂਟ ਨੰਬਰ (UAN) ਤਿਆਰ ਕਰਨਾ ਪਵੇਗਾ। ਇਸ ਤੋਂ ਬਾਅਦ ਈ.ਸੀ.ਆਰ. (ECR) ਪ੍ਰਕਿਰਿਆ ਰਾਹੀਂ ਨਾਮਜ਼ਦਗੀ ਅਤੇ ਰਕਮ ਜਮ੍ਹਾਂ ਕਰਵਾਉਣ ਦੀ ਪ੍ਰਕਿਰਿਆ ਪੂਰੀ ਹੋਵੇਗੀ।
ਈ.ਪੀ.ਐੱਫ.ਓ. ਦੀ ਸਖ਼ਤੀ ਅਤੇ ਤਾਲਮੇਲ
ਭਵਿੱਖ ਵਿੱਚ ਅਜਿਹੀ ਬੇਨਿਯਮੀ ਨੂੰ ਰੋਕਣ ਲਈ ਈ.ਪੀ.ਐੱਫ.ਓ. ਨੇ ਇਨਕਮ ਟੈਕਸ ਵਿਭਾਗ ਅਤੇ ਆਈ.ਸੀ.ਏ.ਆਈ. (ICAI) ਵਰਗੀਆਂ ਸੰਸਥਾਵਾਂ ਨਾਲ ਹੱਥ ਮਿਲਾਇਆ ਹੈ। ਹੁਣ ਟੈਕਸ ਵਿਭਾਗ ਨੂੰ ਆਖਿਆ ਗਿਆ ਹੈ ਕਿ ਉਹ ਕਿਸੇ ਵੀ ਪੀ.ਐੱਫ. ਟਰੱਸਟ ਨੂੰ ਮਾਨਤਾ ਦੇਣ ਤੋਂ ਪਹਿਲਾਂ ਈ.ਪੀ.ਐੱਫ. ਐਂਡ ਐੱਮ.ਪੀ. ਐਕਟ ਤਹਿਤ ਉਸ ਦੀ ਸਥਿਤੀ ਦੀ ਜਾਂਚ ਜ਼ਰੂਰ ਕਰੇ, ਤਾਂ ਜੋ ਨਿਯਮਾਂ ਦੀ ਸਖ਼ਤੀ ਨਾਲ ਪਾਲਣਾ ਯਕੀਨੀ ਬਣਾਈ ਜਾ ਸਕੇ।
