ਟਰੰਪ ਦੀ ਭੜਾਸ

ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਵਾਸ਼ਿੰਗਟਨ ਡੀ ਸੀ ਨੂੰ ‘ਅਪਰਾਧ-ਮੁਕਤ ਖੇਤਰ’ ਐਲਾਨਣ ਤੋਂ ਸਿਰਫ਼ ਤਿੰਨ ਮਹੀਨਿਆਂ ਬਾਅਦ ਰਾਸ਼ਟਰੀ ਰਾਜਧਾਨੀ ਇੱਕੋ ਵਿਅਕਤੀ ਵੱਲੋਂ ਕੀਤੇ ਹਮਲੇ ਨਾਲ ਹਿੱਲ ਗਈ ਹੈ। ਨੈਸ਼ਨਲ ਗਾਰਡ ਦੇ ਮੈਂਬਰਾਂ ਸਾਰਾਹ ਬੈੱਕਸਟ੍ਰੋਮ ਅਤੇ ਐਂਡਰਿਊ ਵੁਲਫ ਨੂੰ ਵ੍ਹਾਈਟ ਹਾਊਸ ਨੇੜੇ ਅਫ਼ਗਾਨ ਨਾਗਰਿਕ ਰਹਿਮਾਨਉੱਲ੍ਹਾ ਲਾਕਨਵਾਲ ਨੇ ਗੋਲੀ ਮਾਰ ਦਿੱਤੀ। ਫੱਟੜ ਹੋਣ ਕਾਰਨ ਵੀਰਵਾਰ ਨੂੰ ਸਾਰਾਹ ਦੀ ਮੌਤ ਹੋ ਗਈ, ਜਿਸ ਤੋਂ ਬਾਅਦ ਸਿਆਸੀ ਦੂਸ਼ਣਬਾਜ਼ੀ ਸ਼ੁਰੂ ਹੋ ਗਈ ਅਤੇ ਦੇਸ਼ਵਿਆਪੀ ਰੋਹ ਭੜਕ ਗਿਆ। ਪਹਿਲਾਂ ਵਾਂਗ ਜਲਦਬਾਜ਼ੀ ਵਾਲੇ ਪ੍ਰਤੀਕਰਮ ਵਿੱਚ ਡੋਨਲਡ ਟਰੰਪ ਨੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਦਾ ਪ੍ਰਸ਼ਾਸਨ ‘ਤੀਜੀ ਦੁਨੀਆ ਦੇ ਦੇਸ਼ਾਂ’ ਤੋਂ ਹੋਣ ਵਾਲੇ ਸਾਰੇ ਪਰਵਾਸ ਨੂੰ ‘ਪੱਕੇ ਤੌਰ ਉੱਤੇ ਰੋਕ’ ਦੇਵੇਗਾ। ਉਨ੍ਹਾਂ ਨੇ ਆਪਣੇ ਤੋਂ ਪਹਿਲਾਂ ਰਾਸ਼ਟਰਪਤੀ ਰਹੇ ਜੋਅ ਬਾਇਡਨ ’ਤੇ ਨਿਸ਼ਾਨਾ ਸੇਧਿਆ ਹੈ, ਜਿਨ੍ਹਾਂ ਦੇ ਸ਼ਾਸਨ ਦੌਰਾਨ ਅਫ਼ਗ਼ਾਨਿਸਤਾਨ ਵਿੱਚ ਸੀ ਆਈ ਏ ਨਾਲ ਕੰਮ ਕਰਨ ਵਾਲਾ ਲਾਕਨਵਾਲ 2021 ਦੇ ਇੱਕ ਮੁੜ-ਵਸੇਬਾ ਪ੍ਰੋਗਰਾਮ ਤਹਿਤ ਅਮਰੀਕਾ ਆਇਆ ਸੀ।

​ਸਖ਼ਤ ਸੁਰੱਖਿਆ ਵਾਲੇ ਵ੍ਹਾਈਟ ਹਾਊਸ ਨੇੜੇ ਹੋਏ ਇਸ ਹਮਲੇ ਨੇ ਅਮਰੀਕਾ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੀਆਂ ਖ਼ਾਮੀਆਂ ਨੂੰ ਪ੍ਰਤੱਖ ਕਰ ਦਿੱਤਾ ਹੈ। ਅਜੇ ਅਗਸਤ ਵਿੱਚ ਹੀ ਟਰੰਪ ਨੇ ਹਿੰਸਕ ਅਪਰਾਧਾਂ ’ਤੇ ਲਗਾਮ ਕੱਸਣ ਦੀ ਕੋਸ਼ਿਸ਼ ਵਿੱਚ ਵਾਸ਼ਿੰਗਟਨ ’ਚ ਨੈਸ਼ਨਲ ਗਾਰਡ ਦੇ ਬਲਾਂ ਨੂੰ ਤਾਇਨਾਤ ਕੀਤਾ ਸੀ, ਭਾਵੇਂ ਕਿ ਇਹ ਪਹਿਲਾਂ ਹੀ ਦਹਾਕਿਆਂ ਦੇ ਆਪਣੇ ਸਭ ਤੋਂ ਹੇਠਲੇ ਪੱਧਰ ’ਤੇ ਸਨ। ਇੱਕ ਫੈਡਰਲ ਜੱਜ ਨੇ ਹੁਣ ਅਮਰੀਕੀ ਪ੍ਰਸ਼ਾਸਨ ਨੂੰ ਰਾਜਧਾਨੀ ਵਿੱਚ ਇਨ੍ਹਾਂ ਬਲਾਂ ਦੀ ਤਾਇਨਾਤੀ ਖ਼ਤਮ ਕਰਨ ਦਾ ਹੁਕਮ ਦਿੱਤਾ ਹੈ, ਇਹ ਕਹਿੰਦਿਆਂ ਕਿ ਫ਼ੌਜ ਦੀ ਮੌਜੂਦਗੀ ਇਲਾਕੇ ਵਿੱਚ ਕਾਨੂੰਨ ਲਾਗੂ ਕਰਨ ਵਾਲੇ ਹੋਰਨਾਂ ਸੁਰੱਖਿਆ ਏਜੰਸੀਆਂ ਦੇ ਅਧਿਕਾਰੀਆਂ ਦੇ ਅਧਿਕਾਰ ਖੇਤਰ ਵਿੱਚ ਦਖਲ ਦਿੰਦੀ ਹੈ। ਇਸ ਖੇਤਰੀ ਖਿੱਚੋਤਾਣ ਕਾਰਨ ਪੈਦਾ ਹੋਏ ਟਕਰਾਅ ਨੇ ਹਮਲਾਵਰ ਨੂੰ ਹੋਰ ਹੌਸਲਾ ਦਿੱਤਾ ਹੋ ਸਕਦਾ ਹੈ। ਹਾਲਾਂਕਿ, ਟਰੰਪ ਇਸ ਗੱਲ ਦੀ ਜ਼ਿੰਮੇਵਾਰੀ ਨਹੀਂ ਲੈਣਗੇ ਕਿ ਗ਼ਲਤੀ ਕਿੱਥੇ ਹੋਈ। ਇਸ ਦੀ ਬਜਾਏ, ਉਨ੍ਹਾਂ ਨੇ ਹਰ ਉਸ ਵਿਅਕਤੀ ਨੂੰ ਕੱਢਣ ਦਾ ਵਾਅਦਾ ਕੀਤਾ ਹੈ ਜਿਸ ਦੀ ਅਮਰੀਕਾ ਲਈ ‘ਕੋਈ ਕੀਮਤ’ ਨਹੀਂ ਹੈ। ਇਹ ਕੇਵਲ ਪਰਵਾਸ-ਵਿਰੋਧੀ ਬਿਆਨਬਾਜ਼ੀ ਭੜਕਾਉਣ ਦੀ ਕੋਸ਼ਿਸ਼ ਹੈ ਜਿਸ ਨੇ ਉਨ੍ਹਾਂ ਦੀ ਸਾਲ ਪਹਿਲਾਂ ਰਾਸ਼ਟਰਪਤੀ ਚੋਣ ਜਿੱਤਣ ਵਿੱਚ ਮਦਦ ਕੀਤੀ ਸੀ।

​ਪਰਵਾਸੀਆਂ ਨੂੰ ਬਦਨਾਮ ਕਰਨਾ ਗੋਰੇ ਕੱਟੜਵਾਦੀਆਂ ਨੂੰ ਹੰਗਾਮਾ ਕਰਨ ਦੀ ਖੁੱਲ੍ਹ ਦੇਵੇਗਾ। ਇਹ ਪੂਰੇ ਦੇਸ਼ ਵਿੱਚ ਅਸ਼ਾਂਤੀ ਪੈਦਾ ਕਰ ਸਕਦਾ ਹੈ ਅਤੇ ਪਰਵਾਸੀਆਂ ਖ਼ਿਲਾਫ਼ ਨਫ਼ਰਤੀ ਅਪਰਾਧਾਂ ਦਾ ਖ਼ਤਰਾ ਹੋਰ ਵੀ ਵਧ ਸਕਦਾ ਹੈ। ਅਮਰੀਕਾ ਨੂੰ ਚਾਹੀਦਾ ਹੈ ਕਿ ਉਹ ਆਪਣੀ ਘਰੇਲੂ ਸੁਰੱਖਿਆ ਨੂੰ ਮਜ਼ਬੂਤ ​​ਕਰੇ ਅਤੇ ਜਿਨ੍ਹਾਂ ਵਿਅਕਤੀਆਂ ਤੇ ਸਮੂਹਾਂ ਨੂੰ ਜ਼ਿਆਦਾ ਖ਼ਤਰਾ ਹੈ, ਉਨ੍ਹਾਂ ਦੀ ਪਛਾਣ ਕਰੇ, ਭਾਵੇਂ ਉਹ ਕਿਸੇ ਵੀ ਨਸਲ ਦੇ ਹੋਣ। ਗ਼ੈਰਕਾਨੂੰਨੀ ਅਤੇ ਵਿਘਨਕਾਰੀ ਲੋਕਾਂ ਨੂੰ ਘਟਾਉਣ ਲਈ ਟਰੰਪ ਵੱਲੋਂ ਦਿੱਤਾ ‘ਰਿਵਰਸ ਮਾਈਗ੍ਰੇਸ਼ਨ’ ਦਾ ਸੱਦਾ ਸਿਰਫ਼ ਘਬਰਾਹਟ ਅਤੇ ਅਸਥਿਰਤਾ ਨੂੰ ਹੀ ਵਧਾਏਗਾ।