ਦਵਾਈਆਂ ਦੀ ਅੰਨ੍ਹੇਵਾਹ ਵਰਤੋਂ

ਅਜਿਹੇ ਕੇਸਾਂ ਦੇ ਵਧਣ ਕਾਰਨ ਭਾਰਤ ਵਿੱਚ ਫਲੂ ਖ਼ਿਲਾਫ਼ ਟੀਕਾਕਰਨ ਦੀ ਕਮੀ ਉਜਾਗਰ ਹੁੰਦੀ ਹੈ। ਟੀਕਾਕਰਨ ਨੂੰ ਫਲੂ ਦੀ ਰੋਕਥਾਮ ਲਈ ਸਿਹਤ ਸੰਭਾਲ ਦਾ ਮਹੱਤਵਪੂਰਨ ਹਿੱਸਾ ਬਣਾਉਣਾ ਚਾਹੀਦਾ ਹੈ, ਖ਼ਾਸ ਕਰਕੇ ਬਜ਼ੁਰਗਾਂ, ਗਰਭਵਤੀ ਔਰਤਾਂ, ਸਿਹਤ ਕਰਮੀਆਂ ਅਤੇ ਪੱਕੇ ਰੋਗੀਆਂ ਨੂੰ ਟੀਕਾਕਰਨ ਦੇ ਘੇਰੇ ਵਿੱਚ ਲਿਆਉਣਾ ਚਾਹੀਦਾ ਹੈ। ਐੱਨ ਸੀ ਡੀ ਸੀ ਮੌਸਮੀ ਫਲੂ ਨਿਗਰਾਨੀ ਅਤੇ ਟੀਕਾਕਰਨ ਸਬੰਧੀ ਮਾਰਗਦਰਸ਼ਨ ਪ੍ਰਦਾਨ ਕਰਦਾ ਹੈ ਪਰ ਸਿਫਾਰਿਸ਼ਾਂ ਉਦੋਂ ਹੀ ਮਾਅਨੇ ਰੱਖਦੀਆਂ ਹਨ ਜਦੋਂ ਲੋਕ ਉਨ੍ਹਾਂ ਤੱਕ ਪਹੁੰਚ ਕਰਨ ਅਤੇ ਉਨ੍ਹਾਂ ’ਤੇ ਅਮਲ ਕਰਨ। ਫਿਲਹਾਲ ਮੌਜੂਦਾ ਵਾਇਰਸ ਨਾਲ ਨਜਿੱਠਣ ਲਈ ਸਾਨੂੰ ਹੋਰ ਵੀ ਸਮਝਦਾਰੀ ਤੋਂ ਕੰਮ ਲੈਣਾ ਪਵੇਗਾ। ਭੀੜ-ਭੜੱਕੇ ਵਾਲੀਆਂ ਥਾਵਾਂ ’ਤੇ ਮਾਸਕ ਪਹਿਨਣਾ, ਬਿਮਾਰ ਹੋਣ ’ਤੇ ਘਰ ਰਹਿਣਾ ਅਤੇ ਸਮੇਂ-ਸਿਰ ਡਾਕਟਰੀ ਸਲਾਹ ਲੈਣ ਨਾਲ ਫਲੂ ਦਾ ਫੈਲਣਾ ਘਟਾਇਆ ਜਾ ਸਕਦਾ ਹੈ। ਕਿਸੇ ਫਲੂ ਦੇ ਫੈਲਣ ’ਤੇ ਹਸਪਤਾਲਾਂ ਤੇ ਹੋਰ ਨਿਗਰਾਨ ਅਮਲੇ ਨੂੰ ਤਿਆਰ-ਬਰ-ਤਿਆਰ ਰਹਿਣਾ ਚਾਹੀਦਾ ਹੈ। ਇਹ ਫਲੂ ਦਾ ਮੌਸਮ ਤਾਂ ਲੰਘ ਜਾਵੇਗਾ ਪਰ ਸਰੀਰ ਅੰਦਰ ਗਈਆਂ ਐਂਟੀਬਾਇਓਟਿਕ ਦਵਾਈਆਂ ਦਾ ਅਸਰ ਖ਼ਤਮ ਨਹੀਂ ਹੋਣਾ।