ਮਹਿੰਗੇ ਪੈਟਰੋਲ ਤੋਂ ਸਸਤੇ ਸਫ਼ਰ ਵੱਲ
ਭਾਰਤ ਦਾ ਆਟੋਮੋਬਾਈਲ ਬਾਜ਼ਾਰ ਇਸ ਸਮੇਂ ਇੱਕ ਅਹਿਮ ਮੋੜ ’ਤੇ ਪਹੁੰਚ ਚੁੱਕਿਆ ਹੈ। ਫੈਡਰੇਸ਼ਨ ਆਫ਼ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ ਮੁਤਾਬਕ ਬੀਤੇ ਅਗਸਤ ਮਹੀਨੇ ਵਿੱਚ ਸੀ ਐੱਨ ਜੀ, ਹਾਈਬ੍ਰਿਡ ਅਤੇ ਬਿਜਲੀ ਨਾਲ ਚੱਲਣ ਵਾਲੇ ਯਾਤਰੀ ਵਾਹਨਾਂ ਦੀ ਕੁੱਲ ਰਿਟੇਲ ਵਿਕਰੀ 41.95 ਫ਼ੀਸਦੀ...
ਭਾਰਤ ਦਾ ਆਟੋਮੋਬਾਈਲ ਬਾਜ਼ਾਰ ਇਸ ਸਮੇਂ ਇੱਕ ਅਹਿਮ ਮੋੜ ’ਤੇ ਪਹੁੰਚ ਚੁੱਕਿਆ ਹੈ। ਫੈਡਰੇਸ਼ਨ ਆਫ਼ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ ਮੁਤਾਬਕ ਬੀਤੇ ਅਗਸਤ ਮਹੀਨੇ ਵਿੱਚ ਸੀ ਐੱਨ ਜੀ, ਹਾਈਬ੍ਰਿਡ ਅਤੇ ਬਿਜਲੀ ਨਾਲ ਚੱਲਣ ਵਾਲੇ ਯਾਤਰੀ ਵਾਹਨਾਂ ਦੀ ਕੁੱਲ ਰਿਟੇਲ ਵਿਕਰੀ 41.95 ਫ਼ੀਸਦੀ ਰਹੀ, ਜਦਕਿ ਪੈਟਰੋਲ ਵਾਹਨਾਂ ਦਾ ਹਿੱਸਾ 40.85 ਫ਼ੀਸਦੀ ਰਿਹਾ। ਇਹ ਇਤਿਹਾਸ ਵਿੱਚ ਪਹਿਲਾ ਮੌਕਾ ਹੈ ਜਦੋਂ ਬਦਲਵੇਂ ਬਾਲਣ ਵਾਲੇ ਵਾਹਨਾਂ ਨੇ ਰਵਾਇਤੀ ਪੈਟਰੋਲ ਵਾਹਨਾਂ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਹਾਲਾਂਕਿ, ਇਨ੍ਹਾਂ ਅੰਕੜਿਆਂ ਨੂੰ ਪੈਟਰੋਲ ਕਾਰਾਂ ਦੇ ਅੰਤ ਵਜੋਂ ਨਹੀਂ ਦੇਖਿਆ ਜਾਣਾ ਚਾਹੀਦਾ ਕਿਉਂਕਿ ਪੈਟਰੋਲ ਅਜੇ ਵੀ ਵੱਖਰੇ ਤੌਰ ’ਤੇ ਸਭ ਤੋਂ ਵੱਡਾ ਬਾਲਣ ਵਰਗ ਬਣਿਆ ਹੋਇਆ ਹੈ। ਸਗੋਂ, ਇਹ ਅੰਕੜੇ ਦੱਸਦੇ ਹਨ ਕਿ ਭਾਰਤੀ ਗਾਹਕ ਹੁਣ ਆਪਣੇ ਵਾਹਨਾਂ ਦੇ ਖ਼ਰਚੇ ਪ੍ਰਤੀ ਵਧੇਰੇ ਵਿਹਾਰਕ ਅਤੇ ਸਮਝਦਾਰ ਹੋ ਰਹੇ ਹਨ।
ਬਦਲਵੇਂ ਬਾਲਣ ਵਾਲੇ ਖੇਤਰ ਵਿੱਚ ਸਭ ਤੋਂ ਮੋਹਰੀ ਨਾਂ ਸੀ ਐੱਨ ਜੀ ਦਾ ਹੈ, ਜਿਸ ਤੋਂ ਬਾਅਦ ਹਾਈਬ੍ਰਿਡ ਅਤੇ ਇਲੈਕਟ੍ਰਿਕ ਵਾਹਨ ਆਉਂਦੇ ਹਨ। ਮਾਹਿਰਾਂ ਅਤੇ ਡੀਲਰਾਂ ਦਾ ਮੰਨਣਾ ਹੈ ਕਿ ਗੱਡੀਆਂ ਚਲਾਉਣ ਦਾ ਘੱਟ ਖਰਚਾ, ਈ ਵੀ ਦੀ ਬਿਹਤਰ ਰੇਂਜ ਅਤੇ ਚਾਰਜਿੰਗ ਦੇ ਬੁਨਿਆਦੀ ਢਾਂਚੇ ਦਾ ਵਿਸਤਾਰ ਇਸ ਬਦਲਾਅ ਦੇ ਮੁੱਖ ਕਾਰਨ ਹਨ। ਭਾਵੇਂ ਈ20 ਪੈਟਰੋਲ ਵੱਲ ਵਧਣ ਬਾਰੇ ਲੋਕਾਂ ਦੀਆਂ ਕੁਝ ਚਿੰਤਾਵਾਂ ਨੇ ਇਸ ਰਫ਼ਤਾਰ ਨੂੰ ਤੇਜ਼ ਕੀਤਾ ਹੋਵੇ ਪਰ ਅਸਲ ਵਿੱਚ ਮਾਲੀ ਅਤੇ ਆਰਥਿਕ ਬੱਚਤ ਹੀ ਇਸ ਰੁਝਾਨ ਨੂੰ ਲੰਬੇ ਸਮੇਂ ਤੱਕ ਕਾਇਮ ਰੱਖ ਰਹੀ ਹੈ। ਈਥਾਨੌਲ ਬਲੈਂਡਿੰਗ ਨੀਤੀ ਦੇ ਉਦੇਸ਼ ਬਿਲਕੁਲ ਜਾਇਜ਼ ਅਤੇ ਸਹੀ ਹਨ, ਜਿਵੇਂ ਕਿ ਕੱਚੇ ਤੇਲ ਦੀ ਦਰਾਮਦ ਨੂੰ ਘਟਾਉਣਾ, ਦੇਸ਼ ਦੀ ਊਰਜਾ ਸੁਰੱਖਿਆ ਨੂੰ ਮਜ਼ਬੂਤ ਕਰਨਾ, ਪ੍ਰਦੂਸ਼ਣ ਨੂੰ ਘਟਾਉਣਾ ਅਤੇ ਕਿਸਾਨਾਂ ਦੀ ਫ਼ਸਲ ਲਈ ਨਵੀਂ ਮੰਗ ਪੈਦਾ ਕਰਨਾ। ਫਿਰ ਵੀ ਮਾਈਲੇਜ, ਇੰਜਣ ਦੀ ਅਨੁਕੂਲਤਾ ਅਤੇ ਲੰਬੇ ਸਮੇਂ ਦੀ ਕਾਰਗੁਜ਼ਾਰੀ ਨੂੰ ਲੈ ਕੇ ਗਾਹਕਾਂ ਦੇ ਮਨ ਵਿੱਚ ਮੌਜੂਦ ਸ਼ੰਕਿਆਂ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।
ਜਨਤਕ ਭਰੋਸਾ ਬਣਾਈ ਰੱਖਣ ਲਈ ਵਾਹਨਾਂ ਦੀ ਅਨੁਕੂਲਤਾ, ਅਸਲ ਮਾਈਲੇਜ ਅਤੇ ਰੱਖ-ਰਖਾਅ ਦੇ ਖ਼ਰਚਿਆ ਬਾਰੇ ਪੂਰੀ ਪਾਰਦਰਸ਼ਤਾ ਹੋਣੀ ਬਹੁਤ ਜ਼ਰੂਰੀ ਹੈ।
ਇਸ ਤੋਂ ਇਲਾਵਾ ਅਗਸਤ ਮਹੀਨੇ ਦੇ ਸਮੁੱਚੇ ਅੰਕੜੇ ਵੀ ਬਹੁਤ ਜ਼ਿਆਦਾ ਉਤਸ਼ਾਹਜਨਕ ਰਹੇ ਹਨ। ਮੌਨਸੂਨ ਦੇ ਸੁਸਤ ਮੌਸਮ ਅਤੇ ਵਾਹਨਾਂ ਦੀਆਂ ਉੱਚੀਆਂ ਕੀਮਤਾਂ ਦੇ ਬਾਵਜੂਦ ਦੇਸ਼ ਵਿੱਚ ਆਟੋਮੋਬਾਈਲ ਰਿਟੇਲ ਵਿਕਰੀ ਸਾਲਾਨਾ ਆਧਾਰ ’ਤੇ 17.51 ਫ਼ੀਸਦੀ ਵਧ ਕੇ ਰਿਕਾਰਡ 24 ਲੱਖ ਯੂਨਿਟਾਂ ਤੱਕ ਜਾ ਪਹੁੰਚੀ ਹੈ। ਭਾਰਤ ਵਿੱਚ ਸਾਫ਼-ਸੁਥਰੀ ਅਤੇ ਵਾਤਾਵਰਣ ਪੱਖੀ ਆਵਾਜਾਈ ਵੱਲ ਇਹ ਤਬਦੀਲੀ ਆਖ਼ਰਕਾਰ ਸਰਕਾਰੀ ਹੁਕਮਾਂ ਦੀ ਬਜਾਏ ਆਮ ਗਾਹਕਾਂ ਦੀ ਆਪਣੀ ਪਸੰਦ ’ਤੇ ਨਿਰਭਰ ਕਰੇਗੀ। ਜੇਕਰ ਸੀ ਐੱਨ ਜੀ, ਹਾਈਬ੍ਰਿਡ ਅਤੇ ਇਲੈਕਟ੍ਰਿਕ ਵਾਹਨ ਲੋਕਾਂ ਨੂੰ ਭਰੋਸੇਯੋਗਤਾ ਅਤੇ ਘੱਟ ਖ਼ਰਚੇ ਦਾ ਭਰੋਸਾ ਦੇਣਗੇ ਤਾਂ ਖ਼ਰੀਦਦਾਰ ਖੁਦ-ਬ-ਖੁਦ ਇਨ੍ਹਾਂ ਵੱਲ ਮੋੜਾ ਕੱਟ ਲੈਣਗੇ। ਨੀਤੀ ਘਾੜਿਆਂ ਅਤੇ ਵਾਹਨ ਨਿਰਮਾਤਾਵਾਂ ਲਈ ਇਸ਼ਾਰਾ ਬਿਲਕੁਲ ਸਾਫ਼ ਹੈ ਕਿ ਕਿਫ਼ਾਇਤੀ ਕੀਮਤਾਂ, ਪਾਰਦਰਸ਼ਤਾ ਅਤੇ ਆਪਸੀ ਭਰੋਸਾ ਹੀ ਭਾਰਤ ਨੂੰ ਵਾਤਾਵਰਣ ਪੱਖੀ ਆਵਾਜਾਈ ਦੇ ਸਫਲ ਰਸਤੇ ’ਤੇ ਅੱਗੇ ਲੈ ਕੇ ਜਾ ਸਕਦੇ ਹਨ।
