ਗੁਰਦੇਵ ਸਿੰਘ ਗਹੂੰਣ
ਬਲਾਚੌਰ, 2 ਜੁਲਾਈ
ਬਲਾਚੌਰ ਮੰਡੀ ਵਿਚ ਸਿਆਲੂ ਮੱਕੀ ਦੀ ਆਮਦ ਜ਼ੋਰਾਂ ’ਤੇ ਹੈ। ਸਰਕਾਰੀ ਏਜੰਸੀਆਂ ਵੱਲੋਂ ਮੱਕੀ ਦੀ ਖਰੀਦ ਨਾ ਕੀਤੇ ਜਾਣ ਕਾਰਨ ਜਿੱਥੇ ਵਪਾਰੀ ਖ਼ੁਸ਼ ਹਨ, ਉੱਥੇ ਹੀ ਮੱਕੀ ਦੀ ਸਹੀ ਕੀਮਤ ਨਾ ਮਿਲਣ ਕਾਰਨ ਕਿਸਾਨ ਨਿਰਾਸ਼ ਹਨ।
ਕੇਂਦਰ ਸਰਕਾਰ ਨੇ ਮੱਕੀ ਦਾ ਘੱਟੋ-ਘੱਟ ਸਮਰਥਨ ਮੁੱਲ 1850 ਰੁਪਏ ਪ੍ਰਤੀ ਕੁਇੰਟਲ ਮਿੱਥਿਆ ਹੋਇਆ ਹੈ ਪਰ ਕਿਸਾਨਾਂ ਵੱਲੋਂ ਮੰਡੀ ਵਿਚ ਲਿਆਂਦੀ ਜਾ ਰਹੀ ਮੱਕੀ ਵਪਾਰੀਆਂ ਵੱਲੋਂ 500 ਰੁਪਏ ਕੁਇੰਟਲ ਤੋਂ ਲੈ ਕੇ 850 ਰੁਪਏ ਖਰੀਦ ਕੇ ਕਿਸਾਨਾਂ ਦੀ ਲੁੱਟ ਕੀਤੀ ਜਾ ਰਹੀ ਹੈ। ਪ੍ਰਤੀ ਏਕੜ ਤਿੰਨ-ਤਿੰਨ ਕੱਟੇ ਡਾਇਆ, ਦੋ-ਦੋ ਕੱਟੇ ਯੂਰੀਆ, ਮਹਿੰਗੇ ਭਾਅ ਦੀਆਂ ਨਦੀਨ ਨਾਸ਼ਕ ਦਵਾਈਆਂ ਅਤੇ ਅਨੇਕਾਂ ਤਰ੍ਹਾਂ ਦੇ ਖਰਚੇ ਕਰ ਕੇ ਅਤੇ ਕੁਦਰਤੀ ਆਫ਼ਤਾਂ ਨੂੰ ਆਪਣੇ ਪਿੰਡੇ ’ਤੇ ਝੱਲਦਾ ਹੋਇਆ ਕਿਸਾਨ ਹੁਣ ਜਦੋਂ ਮੱਕੀ ਦੀਆਂ ਟਰਾਲੀਆਂ ਭਰ ਕੇ ਮੰਡੀ ਲਿਆ ਰਿਹਾ ਹੈ ਤਾਂ ਉਸ ਨੂੰ ਇਹ ਕਹਿ ਕੇ ਦੁਰਕਾਰਿਆ ਜਾ ਰਿਹਾ ਹੈ ਕਿ ਮੱਕੀ ਗਿੱਲੀ ਹੈ, ਜਿਸ ਕਰਕੇ ਰੇਟ 500-600 ਰੁਪਏ ਕੁਇੰਟਲ ਹੀ ਮਿਲਣਾ ਹੈ। ਜਿਸ ਕਿਸਾਨ ਦੀ ਮੱਕੀ ਥੋੜ੍ਹੀ ਸੁੱਕੀ ਹੁੰਦੀ ਹੈ, ਉਸ ਨੂੰ 750 ਤੋਂ 850 ਰੁਪਏ ਪ੍ਰਤੀ ਕੁਇੰਟਲ ਭਾਅ ਦਿੱਤਾ ਜਾਂਦਾ ਹੈ।
ਇਸ ਸਾਲ ਸਿਆਲੂ ਮੱਕੀ ਦੀ ਬੰਪਰ ਫ਼ਸਲ ਹੋਈ ਹੈ, ਜਿਸ ਤੋਂ ਪ੍ਰਾਈਵੇਟ ਵਪਾਰੀ ਖ਼ੂਬ ਹੱਥ ਰੰਗ ਰਿਹਾ ਹੈ ਅਤੇ ਕਿਸਾਨ ਹਾਲੋਂ ਬੇ-ਹਾਲ ਮੰਡੀ ਤੋਂ ਵਾਪਸ ਘਰ ਪਰਤ ਰਹੇ ਹਨ। ਮਾਰਕੀਟ ਕਮੇਟੀ ਬਲਾਚੌਰ ਤੋਂ ਪ੍ਰਾਪਤ ਅੰਕੜਿਆਂ ਅਨੁਸਾਰ ਬਲਾਚੌਰ ਮੰਡੀ ਵਿਚ ਹੁਣ ਤਕ 16,650 ਕੁਇੰਟਲ ਮੱਕੀ ਦੀ ਆਮਦ ਹੋ ਚੁੱਕੀ ਹੈ, ਜਿਹੜੀ ਸਾਰੀ ਦੀ ਸਾਰੀ ਪ੍ਰਾਈਵੇਟ ਵਪਾਰੀਆਂ ਵੱਲੋਂ ਹੀ ਖਰੀਦੀ ਗਈ ਹੈ।