ਪਾਈਪਾਂ ਦੀ ਲੀਕੇਜ ਕਾਰਨ ਪਾਣੀ ਨੇ ਛੱਪੜ ਦਾ ਰੂਪ ਧਾਰਿਆ

ਕੰਢੀ ਦੇ ਪਿੰਡ ਫਤਹਿਪੁਰ ਦੀ ਚਾਰ ਪਿੰਡਾਂ ਨੂੰ ਪੀਣ ਵਾਲਾ ਸਾਫ ਪਾਣੀ ਮੁਹੱਈਆ ਕਰਵਾਉਣ ਵਾਲੀ ਜਲ ਸਪਲਾਈ ਸਕੀਮ ਦੀਆਂ ਖਸਤਾ ਹਾਲ ਪਾਈਪਾਂ ਵਿੱਚ ਹੋ ਰਹੀ ਲੀਕੇਜ ਕਾਰਨ ਨੇੜਲੇ ਘਰਾਂ ਕੋਲ ਪਾਣੀ ਦੇ ਛੱਪੜ ਬਣ ਗਏ ਹਨ। ਕਰੀਬ 30 ਸਾਲ ਪਹਿਲਾਂ ਕਾਂਗਰਸ ਸਰਕਾਰ ਸਮੇਂ ਕੰਢੀ ਦੇ ਫਤਿਹਪੁਰ, ਬਹਿ ਮਾਵਾ, ਰਾਮ ਨੰਗਲ ਤੇ ਸ੍ਰੀ ਪੰਡਾਇਣ ਸਣੇ ਕੁਝ ਪਿੰਡਾਂ ਨੂੰ ਪੀਣ ਵਾਲਾ ਪਾਣੀ ਮੁਹੱਈਆ ਕਰਾਉਣ ਲਈ ਫਤਹਿਪੁਰ ਵਿੱਚ ਸਾਂਝੀ ਜਲ ਸਪਲਾਈ ਯੋਜਨਾ ਸ਼ੁਰੂ ਕੀਤੀ ਗਈ ਸੀ। ਇਸ ਸਕੀਮ ਦੀਆਂ ਪਾਈਪਾਂ ਖਸਤਾ ਹੋ ਚੁੱਕੀਆਂ ਹਨ। ਲੀਕੇਜ ਹੋਣ ਕਾਰਨ ਲੋਕਾਂ ਨੂੰ ਵੀ ਲੋੜੀਂਦੀ ਮਾਤਰਾ ਵਿੱਚ ਪੀਣ ਵਾਲਾ ਸਾਫ ਪਾਣੀ ਨਹੀਂ ਮਿਲ ਰਿਹਾ। ਸਾਬਕਾ ਬਲਾਕ ਸੰਮਤੀ ਮੈਂਬਰ ਅਨਿਲ ਕੁਮਾਰ ਬਿੱਟੂ ਨੇ ਕਿਹਾ ਕਿ ਵਿਭਾਗੀ ਅਧਿਕਾਰੀ ਖਸਤਾ ਹਾਲ ਪਾਈਪਾਂ ਦੀ ਥਾਂ ਨਵੀਆਂ ਪਾਈਪਾਂ ਪਾਉਣ ਦੇ ਉਲਟ ਬੈਲਡਿੰਗ ਦੇ ਟੁੱਚ ਲਗਾ ਕੇ ਡੰਗ ਟਪਾ ਰਹੇ ਹਨ। ਐੱਸ ਡੀ ਓ ਰੋਹਿਤ ਰਾਣਾ ਨੇ ਕਿਹਾ ਕਿ ਪੰਚਾਇਤਾਂ ਨੂੰ ਜਲ ਸਪਲਾਈ ਸਕੀਮਾਂ ਦਾ ਜਿੰਮਾ ਦਿੱਤੇ ਜਾਣ ਕਾਰਨ ਇਸ ਦੀ ਮੁਰੰਮਤ ਜਾਂ ਨਵੀਆਂ ਪਾਈਪਾਂ ਪਾਉਣ ਵਾਲਾ ਬਜਟ ਪੰਚਾਇਤਾਂ ਕੋਲ ਹੀ ਆਉਂਦਾ ਹੈ। ਉਨ੍ਹਾਂ ਕਿਹਾ ਕਿ 15ਵੇਂ ਵਿੱਤ ਕਮਿਸ਼ਨ ਦੀ ਗ੍ਰਾਂਟ ਰਾਹੀਂ ਇਹ ਪਾਈਪਾਂ ਬਦਲਣ ਦੀ ਯੋਜਨਾ ਬਣਾਈ ਹੈ ਅਤੇ ਇਸ ਸਬੰਧੀ ਐਸਟੀਮੇਟ ਬਣਾ ਕੇ ਜਲਦ ਹੀ ਭੇਜ ਦਿੱਤਾ ਜਾਵੇਗਾ।