ਗੋਰਾਇਆ ਵਿੱਚ ਕੰਟੇਨਰ ਨਾਲ ਮੋਟਰਸਾਈਕਲ ਟਕਰਾਉਣ ਕਾਰਨ ਤਿੰਨ ਦੋਸਤਾਂ ਦੀ ਮੌਕੇ 'ਤੇ ਮੌਤ
ਡਰਾਈਵਰ ਕਥਿਤ ਤੌਰ 'ਤੇ ਕੰਟੇਨਰ ਨੂੰ ਛੱਡ ਕੇ ਫਰਾਰ; ਪੁਲੀਸ ਨੇ ਮਾਮਲਾ ਕੀਤਾ ਦਰਜ
ਗੋਰਾਇਆ ਦੇ ਮੁੱਖ ਚੌਕ ਨੇੜੇ ਸ਼ਨਿੱਚਰਵਾਰ ਤੜਕੇ ਇੱਕ ਭਿਆਨਕ ਸੜਕ ਹਾਦਸੇ ਵਿੱਚ ਤਿੰਨ ਦੋਸਤਾਂ ਦੀ ਮੌਤ ਹੋ ਗਈ।
ਏ ਐੱਸ ਆਈ ਬਾਵਾ ਸਿੰਘ ਅਨੁਸਾਰ, ਪੁਲੀਸ ਨੂੰ ਸਵੇਰੇ ਸੂਚਨਾ ਮਿਲੀ ਸੀ ਕਿ ਗੋਰਾਇਆ ਮੁੱਖ ਚੌਕ ਨੇੜੇ ਇੱਕ ਮੋਟਰਸਾਈਕਲ ਇੱਕ ਕੰਟੇਨਰ ਦੇ ਪਿਛਲੇ ਹਿੱਸੇ ਨਾਲ ਟਕਰਾ ਗਿਆ ਹੈ। ਜਦੋਂ ਪੁਲੀਸ ਮੌਕੇ 'ਤੇ ਪਹੁੰਚੀ ਤਾਂ ਤਿੰਨ ਨੌਜਵਾਨ ਮੌਕੇ 'ਤੇ ਮ੍ਰਿਤਕ ਪਾਏ ਗਏ।
ਮ੍ਰਿਤਕਾਂ ਦੀ ਪਛਾਣ ਜਤਿੰਦਰ ਕੁਮਾਰ (ਨਿਵਾਸੀ ਅਰਜਨ ਨਗਰ, ਲੁਧਿਆਣਾ), ਸਾਹਿਲ (ਨਿਵਾਸੀ ਲੁਧਿਆਣਾ) ਅਤੇ ਸੋਨੂੰ ਕੁਮਾਰ ਉਰਫ਼ ਵਿਕਾਸ (ਨਿਵਾਸੀ ਲੁਧਿਆਣਾ) ਵਜੋਂ ਹੋਈ ਹੈ।
ਲਾਸ਼ਾਂ ਨੂੰ ਐਂਬੂਲੈਂਸ ਰਾਹੀਂ ਸਿਵਲ ਹਸਪਤਾਲ ਫਿਲੌਰ ਦੇ ਮੁਰਦਾਘਰ ਵਿੱਚ ਪਹੁੰਚਾਇਆ ਗਿਆ।
ਮ੍ਰਿਤਕ ਜਤਿੰਦਰ ਕੁਮਾਰ ਦੇ ਭਰਾ ਉਪਿੰਦਰ ਕੁਮਾਰ ਦੇ ਬਿਆਨ 'ਤੇ, ਗੋਰਾਇਆ ਪੁਲੀਸ ਨੇ ਕੰਟੇਨਰ ਡਰਾਈਵਰ ਮਨੋਹਰ ਲਾਲ ਪੁੱਤਰ ਕਮਾਲੂ ਰਾਮ ਨਿਵਾਸੀ ਜੰਮੂ-ਕਸ਼ਮੀਰ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ।
ਪੁਲੀਸ ਨੇ ਦੱਸਿਆ ਕਿ ਡਰਾਈਵਰ ਕਥਿਤ ਤੌਰ 'ਤੇ ਕੰਟੇਨਰ ਨੂੰ ਮੌਕੇ 'ਤੇ ਹੀ ਛੱਡ ਕੇ ਫਰਾਰ ਹੋ ਗਿਆ।
ਪੋਸਟਮਾਰਟਮ ਤੋਂ ਬਾਅਦ ਲਾਸ਼ਾਂ ਪਰਿਵਾਰਾਂ ਨੂੰ ਸੌਂਪ ਦਿੱਤੀਆਂ ਜਾਣਗੀਆਂ।
