ਹਤਿੰਦਰ ਮਹਿਤਾ
ਆਦਮਪੁਰ ਦੋਆਬਾ, 12 ਜੁਲਾਈ
ਬਲਾਕ ਆਦਮਪੁਰ ਅਧੀਨ ਪੈਂਦੇ ਪਿੰਡ ਦੌਲੀਕੇ ਸੁੰਦਰ ਪੁਰ ਵਿੱਚ ਮੀਂਹ ਪੈਣ ਕਾਰਨ ਘਰ ਦੀ ਛੱਤ ਡਿੱਗ ਗਈ। ਮੰਗੀ ਹੰਸ ਸਪੁੱਤਰ ਹਰਬਲਾਸ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਉਹ ਆਪਣੇ ਪਰਿਵਾਰ ਨਾਲ ਕਮਰੇ ਵਿੱਚ ਬੈਠ ਕੇ ਰੋਟੀ ਖਾ ਰਿਹਾ ਸੀ ਤੇ ਅਚਾਨਕ ਘਰ ਦੀ ਛੱਤ ਵਿਚੋਂ ਆਵਾਜ਼ ਆਈ ਤਾਂ ਪਰਿਵਾਰ ਦੇ ਸਾਰੇ ਮੈਂਬਰ ਕਮਰੇ ’ਚੋਂ ਭੱਜ ਕੇ ਬਾਹਰ ਆ ਗਏ ਪਰਿਵਾਰ ਦੇ ਬਾਹਰ ਆਉਂਦਿਆਂ ਹੀ ਗਾਡਰ ਟੁੱਟ ਕੇ ਛੱਤ ਡਿੱਗ ਗਈ। ਜਿਸ ਕਾਰਨ ਕਮਰੇ ਵਿੱਚ ਪਿਆ ਸਾਰਾ ਸਮਾਨ, ਟੀਵੀ, ਫਰਿੱਜ, ਬੈੱਡ, ਸ਼ੋ ਕੇਸ਼ ਅਤੇ ਹੋਰ ਸਾਮਾਨ ਬੁਰੀ ਤਰ੍ਹਾਂ ਟੁੱਟ ਗਿਆ।
ਪੀੜਤ ਪਰਿਵਾਰ ਨੇ ਦੱਸਿਆ ਕੇ ਨੁਕਸਾਨੇ ਗਏ ਸਾਮਾਨ ਦੀ ਕੀਮਤ ਲੱਗਭਗ ਇਕ ਲੱਖ ਤੋਂ ਉੱਪਰ ਹੈ।
ਉਸਨੇ ਦੱਸਿਆ ਕੇ ਉਹ ਆਪ ਮਜ਼ਦੂਰੀ ਕਰਕੇ ਪਰਿਵਾਰ ਦਾ ਗੁਜ਼ਾਰਾ ਕਰਦਾ ਹੈ ਤੇ ਉਸ ਦੀ ਮਾਂ ਜੋਗਿੰਦਰ ਕੌਰ ਨਰੇਗਾ ’ਚ ਮਜ਼ਦੂਰੀ ਕਰਦੀ ਹੈ। ਮੰਗੀ ਹੰਸ ਨੇ ਦੱਸਿਆ ਕੇ ਇਸ ਤਾਲਾਬੰਦੀ ’ਚ ਕੰਮਕਾਰ ਵੀ ਠੱਪ ਪਏ ਨੇ ਤੇ ਹੁਣ ਉਸਦੇ ਘਰ ਦੀ ਛੱਤ ਵੀ ਡਿੱਗ ਗਈ ਹੈ, ਜਿਸਨੂੰ ਦੁਬਾਰਾ ਬਣਾਉਣ ਲਈ ਉਹ ਆਰਥਿਕ ਤੌਰ ’ਤੇ ਬਹੁਤ ਕਮਜ਼ੋਰ ਹਾਂ ਤੇ ਉਸ ਨੇ ਅਤੇ ਉਸਦੀ ਵਿਧਵਾ ਮਾਂ ਜੋਗਿੰਦਰ ਕੌਰ ਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਹੈ ਕੇ ਇਸ ਕੋਰੋਨਾ ਬਿਮਾਰੀ ਚ ਉਨ੍ਹਾਂ ਦੇ ਪਰਿਵਾਰ ਨੂੰ ਸਿਰ ਢੱਕਣ ਲਈ ਇਹ ਕਮਰਾ ਬਣਾਉਣ ਲਈ ਆਰਥਿਕ ਮਦਦ ਕੀਤੀ ਜਾਵੇ।
