ਪੱਤਰ ਪ੍ਰੇਰਕ
ਤਲਵਾੜਾ, 25 ਨਵੰਬਰ
ਇੱਥੇ ਨੇੜਲੇ ਪਿੰਡ ਭਟੇੜ ਦੀ ਸਹਿਕਾਰੀ ਬਹੁਮੰਤਵੀ ਸਭਾ ‘ਚ ਲੱਖਾਂ ਰੁਪਏ ਘੁਟਾਲੇ ‘ਚ ਲੋੜੀਂਦੇ ਮੁੱਖ ਦੋਸ਼ੀ ਅਜੇ ਕੁਮਾਰ ਨੂੰ ਪੁਲੀਸ ਨੇ ਕਾਬੂ ਕਰ ਲਿਆ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਥਾਣਾ ਤਲਵਾੜਾ ਦੇ ਮੁਖੀ ਹਰਗੁਰਦੇਵ ਸਿੰਘ ਨੇ ਦੱਸਿਆ ਕਿ ਦਿ ਭਟੇੜ ਸਹਿਕਾਰੀ ਬਹੁਮੰਤਵੀ ਸਭਾ ਵਿਚ ਲੱਖਾਂ ਰੁਪਏ ਦੇ ਗਬਨ ਮਾਮਲੇ ‘ਚ ਨਾਮਜ਼ਦ ਸਭਾ ਦੇ ਸਾਬਕਾ ਸਕੱਤਰ ਅਜੇ ਕੁਮਾਰ ਪੁੱਤਰ ਗੁਰਪ੍ਰਸ਼ਾਦ ਵਾਸੀ ਭਟੇੜ ਥਾਣਾ ਤਲਵਾੜਾ ਨੂੰ ਪੁਲੀਸ ਨੇ ਸਥਾਨਕ ਬੱਸ ਸਟੈਂਡ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਏਐਸਆਈ ਹਰਜੀਤ ਸਿੰਘ ਦੀ ਅਗਵਾਈ ਹੇਠ ਪੁਲੀਸ ਟੀਮ ਨੇ ਮੁਖਬਰ ਦੀ ਨਿਸ਼ਾਨਦੇਹੀ ‘ਤੇ ਲੰਘੇ ਵੀਰਵਾਰ ਅਜੇ ਕੁਮਾਰ ਨੂੰ ਮੁੱਖ ਬਸ ਸਟੈਂਡ ਤੋਂ ਕਾਬੂ ਕੀਤਾ ਸੀ ਜਿਸ ਨੂੰ ਇੱਕ ਦਿਨ ਦੇ ਰਿਮਾਂਡ ‘ਤੇ ਰੱਖਿਆ ਗਿਆ ਸੀ। ਮੁਲਜ਼ਮ ਨੂੰ ਅੱਜ ਮੁਕੇਰੀਆਂ ਅਦਾਲਤ ‘ਚ ਪੇਸ਼ ਕਰਨ ਉਪਰੰਤ ਜ਼ੇਲ੍ਹ ਭੇਜ ਦਿੱਤਾ ਗਿਆ ਹੈ। ਜ਼ਿਕਰਯੋਗ ਹੈ ਸਥਾਨਕ ਪੁਲੀਸ ਨੇ ਅਜੇ ਕੁਮਾਰ ‘ਤੇ ਸਭਾ ਦੇ ਕਰੀਬ 52.30 ਲੱਖ ਰੁਪਏ ਦੇ ਗਬਨ ਦਾ ਮਾਮਲਾ ਇਸੇ ਸਾਲ ਜੁਲਾਈ ਮਹੀਨੇ ‘ਚ ਦਰਜ ਕੀਤਾ ਸੀ। ਇਸ ਤੋਂ ਇਲਾਵਾ ਮੁਲਜ਼ਮ ‘ਤੇ ਲਾਕਡਾਊਨ ਦੌਰਾਨ ਨਸ਼ੀਲੇ ਪਦਾਰਥ ਰੱਖਣ ਦੇ ਸਿਲਸਿਲੇ ‘ਚ ਵੀ ਇੱਕ ਮਾਮਲਾ ਦਰਜ ਹੈ।