ਰਾਜਪੂਤ ਸਭਾ ਵੱਲੋਂ ਨਵੇਂ ਯੂ ਜੀ ਸੀ ਨੇਮਾਂ ਦਾ ਵਿਰੋਧ

ਰਾਜਪੂਤ ਸਭਾ ਅਬਰੋਲ ਨਗਰ (ਪਠਾਨਕੋਟ) ਨੇ ਪ੍ਰਧਾਨ ਠਾਕੁਰ ਕਰਨੈਲ ਸਿੰਘ ਜੱਗੀ ਦੀ ਅਗਵਾਈ ਹੇਠ ਹੋਈ ਮੀਟਿੰਗ ਨਵੇਂ ਯੂ ਜੀ ਸੀ ਨੇਮ ਦਾ ਵਿਰੋਧ ਕੀਤਾ ਹੈ। ਇਸ ਮੀਟਿੰਗ ਵਿੱਚ ਜਨਰਲ ਸਕੱਤਰ ਜੰਗਵੀਰ ਸਿੰਘ ਪਠਾਨੀਆ, ਮਹੇਸ਼ ਠਾਕੁਰ, ਕੈਪਟਨ ਘਣਸ਼ਿਆਮ ਕਟੋਚ, ਕੈਪਟਨ ਸਤਪਾਲ ਰਾਣਾ, ਸੁਰੇਸ਼ ਗੁਲੇਰੀਆ, ਸੰਗਰਾਮ ਸਿੰਘ ਜੱਗੀ ਆਦਿ ਸ਼ਾਮਲ ਸਨ।

ਸਭਾ ਦੇ ਪ੍ਰਧਾਨ ਠਾਕੁਰ ਕਰਨੈਲ ਸਿੰਘ ਜੱਗੀ ਨੇ ਕਿਹਾ ਕਿ ਕੇਂਦਰ ਸਰਕਾਰ ਦੁਆਰਾ ਲਾਗੂ ਕੀਤਾ ਗਿਆ ਇਹ ਕਾਲਾ ਕਾਨੂੰਨ ਰਾਸ਼ਟਰੀ ਹਿਤ ਵਿੱਚ ਨਹੀਂ ਹੈ ਅਤੇ ਇਹ ਸਮਾਜ ਨੂੰ ਵੰਡਣ ਵਾਲਾ ਕਾਨੂੰਨ ਹੈ। ਉਨ੍ਹਾਂ ਕਿਹਾ ਕਿ ਉੱਚ ਜਾਤੀ ਭਾਈਚਾਰੇ ਦਾ ਇਹ ਵਿਰੋਧ ਕਿਸੇ ਖਾਸ ਜਾਤੀ ਜਾਂ ਧਰਮ ਦੇ ਵਿਰੁੱਧ ਨਹੀਂ ਹੈ ਸਗੋਂ ਉਹ ਸਮਾਜ ਦੇ ਸਾਰੇ ਵਰਗਾਂ ਦਾ ਸਤਿਕਾਰ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਇਹ ਕਾਨੂੰਨ ਉੱਚ ਜਾਤੀ ਦੇ ਨੌਜਵਾਨਾਂ ਦਾ ਭਵਿੱਖ ਬਰਬਾਦ ਕਰੇਗਾ ਅਤੇ ਐੱਸ ਸੀ, ਐੱਸ ਟੀ, ਓ ਬੀ ਸੀ ਅਤੇ ਉੱਚ ਜਾਤੀ ਭਾਈਚਾਰਿਆਂ ਵਿਚਕਾਰ ਪਾੜਾ ਪਾਵੇਗ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਕਠੋਰ ਕਾਨੂੰਨ ਨੂੰ ਰੱਦ ਕੀਤਾ ਜਾਵੇ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਵਿਦਿਅਕ ਸੰਸਥਾਵਾਂ ਵਿੱਚ ਜਾਤੀਵਾਦ ਨੂੰ ਉਤਸ਼ਾਹਿਤ ਕਰਨਾ ਕਿਸੇ ਤਰ੍ਹਾਂ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।