ਵਿਧਾਇਕ ਧਾਲੀਵਾਲ ਨੇ ਆਵਾਜਾਈ ਜਾਮ ਖੁੱਲ੍ਹਵਾਇਆ

ਅਜਨਾਲਾ ਸ਼ਹਿਰ ਵਿੱਚ ਲੱਗਦੇ ਆਵਾਜਾਈ ਜਾਮ ਕਾਰਨ ਰਾਹਗੀਰ, ਸਕੂਲੀ ਬੱਚਿਆਂ ਦੇ ਵਾਹਨਾਂ ਸਣੇ ਐਂਬੂਲੈਂਸ ਆਦਿ ਦੇ ਚਾਲਕ ਰੋਜ਼ਾਨਾ ਪ੍ਰੇਸ਼ਾਨ ਹੁੰਦੇ ਹਨ। ਇਹ ਪ੍ਰੇਸ਼ਾਨੀ ਟਰੈਫਿਕ ਪੁਲੀਸ ਦੀ ਗ਼ੈਰ-ਮੌਜੂਦਗੀ ਕਾਰਨ ਵਧ ਜਾਂਦੀ ਹੈ। ਇੱਥੇ ਲੱਗਦੇ ਜਾਮ ਖੁੱਲ੍ਹਵਾਉਣ ਲਈ ਪ੍ਰਾਈਵੇਟ ਬੱਸਾਂ ਵਾਲੇ ਤੇ ਆਮ ਰਾਹਗੀਰ ਹੀ ਅੱਗੇ ਆਉਂਦੇ ਹਨ। ਅੱਜ ਜਦੋਂ ਵਿਧਾਇਕ ਕੁਲਦੀਪ ਸਿੰਘ ਧਾਲੀਵਾਲ ਦਾ ਕਾਫ਼ਲਾ ਮੁੱਖ ਚੌਕ ਨੇੜੇ ਪਹੁੰਚਿਆ ਤਾਂ ਉੱਥੇ ਲੱਗੇ ਜਾਮ ਕਾਰਨ ਉਹ ਖ਼ੁਦ ਗੱਡੀ ਵਿੱਚੋਂ ਉਤਰੇ ਤੇ ਲੋਕਾਂ ਦੀਆਂ ਗੱਡੀਆਂ ਜਾਮ ਵਿੱਚੋਂ ਕਢਵਾਈਆਂ। ਉਹ ਟਰੈਫਿਕ ਪੁਲੀਸ ਦੀ ਗ਼ੈਰ-ਮੌਜੂਦਗੀ ਅਤੇ ਪੁਲੀਸ ਵੱਲੋਂ ਆਵਾਜਾਈ ਦਾ ਧਿਆਨ ਨਾ ਰੱਖਣ ਕਾਰਨ ਖ਼ਫ਼ਾ ਹੋਏ।

ਜ਼ਿਕਰਯੋਗ ਹੈ ਕਿ ਸ਼ਹਿਰ ਅਜਨਾਲਾ ਅੰਦਰ ਤਹਿਸੀਲ ਪੱਧਰ ਦੇ ਸਾਰੇ ਦਫ਼ਤਰ ਅਤੇ ਵੱਖ ਵੱਖ ਵਿਭਾਗਾਂ ਦੇ ਦਫ਼ਤਰ ਹੋਣ ਕਾਰਨ ਵੱਡੀ ਗਿਣਤੀ ਲੋਕਾਂ ਦਾ ਆਉਣਾ-ਜਾਣਾ ਰਹਿੰਦਾ ਹੈ। ਇੱਥੇ ਲੱਗਦੇ ਟਰੈਫਿਕ ਜਾਮ ਕਾਰਨ ਲੋਕ ਪ੍ਰੇਸ਼ਾਨ ਹਨ। ਇਹ ਵੀ ਦੱਸਣ ਯੋਗ ਹੈ ਕਿ ਅੱਜ ਭਲਾ ਪਿੰਡ ਖੰਡ ਮਿੱਲ ਦਾ ਪਿੜਾਈ ਸੀਜਨ ਵੀ ਸ਼ੁਰੂ ਹੋ ਗਿਆ ਹੈ। ਇਸ ਕਰ ਕੇ ਗੰਨੇ ਨਾਲ ਭਰੀਆਂ ਟਰਾਲੀਆਂ ਸ਼ਹਿਰ ਦੇ ਵਿੱਚੋਂ ਲੰਘਣ ਕਾਰਨ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਟਰੈਫਿਕ ਸਮੱਸਿਆ ਬਣੀ ਰਹੇਗੀ।

ਇਸ ਮੌਕੇ ਰਾਹਗੀਰਾਂ ਨੇ ਕਿਹਾ ਕਿ ਟਰੈਫਿਕ ਕੰਟਰੋਲ ਕਰਨ ਵਿੱਚ ਜ਼ਿੰਮੇਵਾਰ ਅਧਿਕਾਰੀ ਹੋ ਸਕਦਾ ਅੱਜ ਹਰਕਤ ਵਿੱਚ ਆ ਜਾਣ ਕਿਉਂਕਿ ਪਹਿਲਾਂ ਇੱਥੇ ਕਦੇ ਵੀ ਕਿਸੇ ਨੇ ਕੋਈ ਕੰਟਰੋਲ ਨਹੀਂ ਕੀਤਾ।

ਅਜਨਾਲਾ ਖੰਡ ਮਿੱਲ ਦੇ ਪਿੜਾਈ ਸੀਜ਼ਨ ਦਾ ਉਦਘਾਟਨ

ਅਜਨਾਲਾ ਸਹਿਕਾਰੀ ਖੰਡ ਮਿੱਲ ਭਲਾ ਪਿੰਡ ਲਿਮਿਟਡ ਦੇ 36ਵੇਂ ਸਾਲਾਨਾ ਗੰਨੇ ਦੀ ਪਿੜਾਈ ਦੇ ਸੀਜ਼ਨ ਦਾ ਉਦਘਾਟਨ ਵਿਧਾਇਕ ਕੁਲਦੀਪ ਸਿੰਘ ਧਾਲੀਵਾਲ ਨੇ ਕੀਤਾ। ਇਸ ਮੌਕੇ ਬੋਲਦਿਆਂ ਸ੍ਰੀ ਧਾਲੀਵਾਲ ਨੇ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਗੰਨੇ ਦੇ ਭਾਅ ਵਿੱਚ ਪ੍ਰਤੀ ਕੁਇੰਟਲ 15 ਰੁਪਏ ਵਾਧਾ ਕੀਤਾ ਹੈ ਜੋ ਬਾਕੀ ਸੂਬਿਆਂ ਤੋਂ ਸਭ ਤੋਂ ਵੱਧ ਹੈ। ਉਨ੍ਹਾਂ ਕਿਹਾ ਕਿ ਸਰਹੱਦੀ ਖੇਤਰ ਦੇ ਕਿਸਾਨਾਂ ਦੀ ਗੰਨਾ ਮੁੱਖ ਫ਼ਸਲ ਹੈ। ਉਨ੍ਹਾਂ ਕਿਹਾ ਕਿ ਗੰਨੇ ਨੂੰ ਸਿੰਜਾਈ ਲਈ ਹੋਰਨਾਂ ਫ਼ਸਲਾਂ ਦੇ ਮੁਕਾਬਲੇ ਪਾਣੀ ਦੀ ਵੀ ਬਹੁਤੀ ਲੋੜ ਨਹੀਂ ਹੁੰਦੀ ਅਤੇ ਗੰਨੇ ਦੇ ਪੈਸਿਆਂ ਦੀ ਅਦਾਇਗੀ ਵਿੱਚ ਸਰਕਾਰ ਵੱਲੋਂ ਕਾਸ਼ਤਕਾਰਾਂ ਨੂੰ ਕੋਈ ਦਿੱਕਤ ਨਹੀਂ ਆਉਣ ਦਿੱਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਨਾ ਹੀ ਗੰਨਾ ਕਾਸ਼ਤਕਾਰਾਂ ਨੂੰ ਸ਼ੂਗਰ ਮਿੱਲ ਦੇ ਯਾਰਡ ਵਿੱਚ ਕੋਈ ਮੁਸ਼ਕਿਲ ਆਉਣ ਦਿੱਤੀ ਜਾਵੇਗੀ। ਇਸ ਮੌਕੇ ਸ੍ਰੀ ਧਾਲੀਵਾਲ ਨੇ ਉਤਸ਼ਾਹੀ ਤੇ ਸਫ਼ਲ ਗੰਨਾ ਉਤਪਾਦਕਾਂ ਦਾ ਸਨਮਾਨ ਕੀਤਾ। ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਸਹਿਕਾਰੀ ਖੰਡ ਮਿੱਲ ਦੇ ਜਨਰਲ ਮੈਨੇਜਰ ਰਜਿੰਦਰ ਪ੍ਰਤਾਪ ਸਿੰਘ ਨੇ ਗੰਨਾ ਕਾਸ਼ਤਕਾਰਾਂ ਨੂੰ ਅਪੀਲ ਕੀਤੀ ਕਿ ਖੱਜਲ-ਖੁਆਰੀ ਤੋਂ ਬਚਣ ਲਈ ਮਿੱਲ ਨੂੰ ਗੰਨਾ ਸਾਫ਼-ਸੁਥਰਾ ਮੁਹੱਈਆ ਕਰਵਾਇਆ ਜਾਵੇ।