ਜਗਜੀਤ ਸਿੰਘ
ਮੁਕੇਰੀਆਂ, 6 ਦਸੰਬਰ
ਪੁਲੀਸ ਪ੍ਰਸ਼ਾਸਨ ਵੱਲੋਂ ਥਾਣਿਆਂ ਅੰਦਰ ਇਨਸਾਫ਼ ਲਈ ਆਉਂਦੇ ਲੋਕਾਂ ਨੂੰ ਸਮਾਂਬੱਧ ਇਨਸਾਫ਼ ਨਾ ਦੇ ਕੇ ਰਾਜਸੀ ਦਬਾਅ ਅਤੇ ਭ੍ਰਿਸ਼ਟਾਚਾਰ ਕਰ ਕੇ ਕੇਸਾਂ ਨੂੰ ਲੰਬਾ ਸਮਾਂ ਲਮਕਾ ਕੇ ਰੱਖਣ ਖ਼ਿਲਾਫ਼ ਕੁੱਲ ਹਿੰਦ ਕਿਸਾਨ ਸਭਾ ਵੱਲੋਂ ਭੰਗਾਲਾ ਪੁਲੀਸ ਚੌਕੀ ਅੱਗੇ ਰੋਸ ਧਰਨਾ ਦਿੰਦਿਆਂ ਪੁਲੀਸ ਪ੍ਰਸਾਸ਼ਨ ਖਿਲਾਫ਼ ਨਾਅਰੇਬਾਜ਼ੀ ਕੀਤੀ ਗਈ। ਰੋਸ ਧਰਨੇ ਦੀ ਅਗਵਾਈ ਸਭਾ ਦੇ ਸੂਬਾਈ ਜੁਆਇੰਟ ਸਕੱਤਰ ਆਸ਼ਾ ਨੰਦ, ਤਹਿਸੀਲ ਪ੍ਰਧਾਨ ਅਸ਼ੋਕ ਮਹਾਜਨ ਅਤੇ ਜ਼ਿਲ੍ਹਾ ਕਮੇਟੀ ਮੈਂਬਰ ਸੁਰਜੀਤ ਸਿੰਘ ਬਾੜੀ ਨੇ ਸਾਂਝੇ ਤੌਰ ’ਤੇ ਕੀਤੀ।
ਇਸ ਮੌਕੇ ਬੁਲਾਰਿਆਂ ਨੇ ਕਿਹਾ ਕਿ ਹਲਕੇ ਦਾ ਪੁਲੀਸ ਪ੍ਰਸ਼ਾਸਨ ਰਾਜਸੀ ਦਬਾਅ ਜਾਂ ਫਿਰ ਆਪਸੀ ਮਿਲੀਭੁਗਤ ਕਰ ਕੇ ਲੋਕਾਂ ਦੀਆਂ ਇਨਸਾਫ਼ ਲਈ ਆਉਂਦੀਆਂ ਦਰਖ਼ਾਸਤਾਂ ’ਤੇ ਦੋਸ਼ੀਆਂ ਖਿਲਾਫ਼ ਕਾਰਵਾਈ ਦੀ ਥਾਂ ਕੇਸਾਂ ਨੂੰ ਲਮਕਾਈ ਰੱਖਦਾ ਹੈ। ਇਹ ਮਾਮਲਾ ਉੱਚ ਅਧਿਕਾਰੀਆਂ ਦੇ ਧਿਆਨ ਵਿੱਚ ਲਿਆਉਣ ਦੇ ਬਾਵਜੂਦ ਮਸਲਿਆਂ ਦਾ ਹੱਲ ਨਹੀਂ ਕੀਤਾ ਜਾ ਰਿਹਾ। ਭੰਗਾਲਾ ਚੌਕੀ ਵਿੱਚ ਸਤਨਾਮ ਸਿੰਘ ਮੰਝਪੁਰ, ਸ਼ੀਲਾ ਦੇਵੀ ਪੁਰਾਣਾ ਭੰਗਾਲਾ, ਸੁਰਜੀਤ ਕੌਰ ਪੁਰਾਣਾ ਭੰਗਾ ਅਤੇ ਮੁਕੇਰੀਆਂ ਥਾਣਾ ਵਿਚ ਜਗਦੀਸ਼ ਰਾਜ ਪਲਾਕੀ ਆਦਿ ਦੀਆਂ ਦਰਖ਼ਾਸਤਾਂ ਲੰਬੇ ਸਮੇਂ ਤੋਂ ਬਕਾਇਆ ਪਈਆਂ ਹਨ, ਜਿਨ੍ਹਾਂ ਨੂੰ ਹੱਲ ਕਰ ਕੇ ਪੀੜਤਾਂ ਨੂੰ ਇਨਸਾਫ਼ ਦੇਣ ਦੀ ਥਾਂ ਦੋਸ਼ੀਆਂ ਨਾਲ ਕਥਿਤ ਮਿਲੀ ਭੁਗਤ ਕਰ ਕੇ ਕੇਸ ਲਮਕਾਇਆ ਜਾ ਰਿਹਾ ਹੈ।
ਇਸ ਮੌਕੇ ਭੰਗਾਲਾ ਪੁਲੀਸ ਚੌਕੀ ਇੰਚਾਰਜ ਨੇ ਧਰਨੇ ਵਿਚ ਆ ਕੇ ਮਸਲਿਆਂ ਦੇ ਹੱਲ ਲਈ ਕੁਝ ਸੁਝਾਅ ਪੇਸ਼ ਕੀਤੇ, ਜਿਹੜੇ ਕਿ ਧਰਨਾਕਾਰੀਆਂ ਨੇ ਨਕਾਰ ਦਿੱਤੇ। ਉਨ੍ਹਾਂ ਮੰਗ ਕੀਤੀ ਕਿ ਦੋਸ਼ੀਆਂ ਖਿਲਾਫ਼ ਤੁਰੰਤ ਕਾਰਵਾਈ ਕਰ ਕੇ ਦਰਖਾਸਤਾਂ ਦਾ ਨਬਿੇੜਾ ਕੀਤਾ ਜਾਵੇ। ਅਣਗਹਿਲੀ ਵਰਤਣ ਵਾਲੇ ਅਧਿਕਾਰੀਆਂ ਖਿਲਾਫ਼ ਅਨੁਸਾਸ਼ਨੀ ਕਾਰਵਾਈ ਕੀਤੀ ਜਾਵੇ। ਇਸ ਮੌਕੇ ਸੰਯੁਕਤ ਕਿਸਾਨ ਮੋਰਚੇ ਦੇ ਆਗੂ ਅਮਰਜੀਤ ਸਿੰਘ ਕਾਨੂੰਨਗੋ ਨੇ ਵੀ ਸੰਘਰਸ਼ ਦਾ ਸਮਰਥਨ ਕੀਤਾ।
ਮਾਮਲੇ ਜਲਦ ਹੱਲ ਕੀਤੇ ਜਾਣਗੇ: ਚੌਕੀ ਇੰਚਾਰਜ
ਭੰਗਾਲਾ ਪੁਲੀਸ ਚੌਕੀ ਦੇ ਇੰਚਾਰਜ ਏਐਸਆਈ ਰਵਿੰਦਰ ਸਿੰਘ ਨੇ ਕਿਹਾ ਕਿ ਮਸਲਿਆਂ ਵਿੱਚ ਕੁਝ ਕਾਨੂੰਨੀ ਅੜਚਨਾਂ ਅਤੇ ਮਾਮਲੇ ਦੂਜੇ ਥਾਣਿਆਂ ਨਾਲ ਜੁੜੇ ਹੋਣ ਕਾਰਨ ਨਿਪਟਾਰੇ ਵਿੱਚ ਦੇਰੀ ਹੋਈ ਹੈ। ਸਬੰਧਿਤ ਧਿਰਾਂ ਨੂੰ ਜਾਣੂ ਕਰਵਾ ਦਿੱਤਾ ਗਿਆ ਹੈ। ਮਾਮਲਿਆਂ ਨੂੰ ਜਲਦ ਹੱਲ ਕਰ ਦਿੱਤਾ ਜਾਵੇਗਾ।