Illegal Mining: ਸਵਾਂ ਦਰਿਆ ’ਚ ਨਾਜਾਇਜ਼ ਖਣਨ ਜ਼ੋਰਾਂ ’ਤੇ

ਖਣਨ ਰੋਕੋ ਜ਼ਮੀਨ ਬਚਾਓ ਸੰਘਰਸ਼ ਕਮੇਟੀ ਦੇ ਆਗੂਆਂ ਅਨੁਸਾਰ ਪਿੰਡ ਚੱਕ ਅਲੇਰਾ ਵਿੱਚ ਸਥਿਤ ਸਟੋਨ ਕਰੱਸ਼ਰ ਦਰਿਆ ਵਿੱਚੋਂ ਕੱਚਾ ਮਾਲ ਲੈ ਰਹੇ ਹਨ। ਇੱਥੇ ਕਰੀਬ 100 ਮੀਟਰ ਚੌੜਾਈ ਅਤੇ 60 ਤੋਂ 70 ਮੀਟਰ ਡੂੰਘਾਈ ਤੱਕ ਖੁਦਾਈ ਕਰਕੇ ਧਰਤੀ ਹੇਠਲਾ ਪਾਣੀ ਬਾਹਰ ਕੱਢ ਦਿੱਤਾ ਗਿਆ ਹੈ, ਜਿਸ ਨਾਲ ਆਸ-ਪਾਸ ਦੀਆਂ ਜ਼ਮੀਨਾਂ ਲਈ ਗੰਭੀਰ ਖ਼ਤਰਾ ਪੈਦਾ ਹੋ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਭਾਰੀ ਬਰਸਾਤ ਦੌਰਾਨ ਇਹ ਵੱਡੇ ਖੱਡੇ ਹੜ੍ਹ ਅਤੇ ਜਾਨ-ਮਾਲ ਦੇ ਨੁਕਸਾਨ ਦਾ ਕਾਰਨ ਬਣ ਸਕਦੇ ਹਨ। ਸੰਘਰਸ਼ ਕਮੇਟੀ ਨੇ ਪ੍ਰਸ਼ਾਸਨ ਦੀ ਚੁੱਪੀ 'ਤੇ ਸਵਾਲ ਖੜ੍ਹੇ ਕੀਤੇ ਹਨ।

ਇਸ ਸਬੰਧੀ ਹਿਮਾਚਲ ਪ੍ਰਦੇਸ਼ ਦੇ ਮਾਈਨਿੰਗ ਇੰਸਪੈਕਟਰ ਅਸ਼ਵਨੀ ਕੁਮਾਰ ਨੇ ਸਪੱਸ਼ਟ ਕੀਤਾ ਕਿ ਬਰਸਾਤ ਵਿੱਚ ਮਾਈਨਿੰਗ ’ਤੇ ਰੋਕ ਹੈ ਅਤੇ ਕਰੱਸ਼ਰ ਮਾਲਕ ਸਿਰਫ਼ ਸਟਾਕ ਕੀਤਾ ਕੱਚਾ ਮਾਲ ਹੀ ਵਰਤ ਸਕਦੇ ਹਨ। ਦੂਜੇ ਪਾਸੇ ਜ਼ਿਲ੍ਹਾ ਹੁਸ਼ਿਆਰਪੁਰ ਦੇ ਮਾਈਨਿੰਗ ਅਫ਼ਸਰ ਤੁਸ਼ਾਰ ਗੋਇਲ ਨੇ ਕਿਹਾ ਕਿ ਮਾਈਨਿੰਗ ’ਤੇ ਰੋਕ ਹੈ ਪਰ ਵਾਰ-ਵਾਰ ਸੰਪਰਕ ਕਰਨ ਅਤੇ ਸਬੂਤ ਵਜੋਂ ਫੋਟੋਆਂ ਭੇਜਣ ਦੇ ਬਾਵਜੂਦ ਕੋਈ ਠੋਸ ਜਵਾਬ ਨਹੀਂ ਦਿੱਤਾ।