ਰੌੜ ਖਹਿਰਾ ’ਚ ਗੁਰਮੀਤ ਬਾਵਾ ਯਾਦਗਾਰੀ ਮੇਲਾ

ਅੰਤਰਰਾਸ਼ਟਰੀ ਸੱਭਿਆਚਾਰਕ ਮੰਚ ਦੇ ਕੌਮੀ ਪ੍ਰਧਾਨ ਬਲਵਿੰਦਰ ਕੌਰ ਪੰਡੋਰੀ ਅਤੇ ਸੂਬੇਦਾਰ ਗੁਰਮੇਜ ਸਿੰਘ ਖਹਿਰਾ ਵੱਲੋਂ ਪਿੰਡ ਰੌੜ ਖਹਿਰਾ ਵਿੱਚ ਪੀਰ ਬਾਬਾ ਸਿਰਕੀ ਸ਼ਾਹ ਨੂੰ ਸਮਰਪਿਤ ਪਦਮ ਭੂਸ਼ਣ ਗੁਰਮੀਤ ਬਾਵਾ ਯਾਦਗਾਰੀ ਸੱਭਿਆਚਾਰਕ ਮੇਲਾ ਕਰਵਾਇਆ ਗਿਆ। ਇਸ ਦੌਰਾਨ ਲੋਕ ਗਾਇਕਾ ਗਲੋਰੀ ਬਾਵਾ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਜ਼ਿਲ੍ਹਾ ਯੋਜਨਾ ਬੋਰਡ ਗੁਰਦਾਸਪੁਰ ਦੇ ਚੇਅਰਮੈਨ ਜੋਬਨ ਰੰਧਾਵਾ, ਚੀਫ ਇੰਜਨੀਅਰ ਅਰਵਿੰਦਰਜੀਤ ਸਿੰਘ ਬੋਪਾਰਾਏ, ਸੁਰਿੰਦਰ ਫਰਿਸ਼ਤਾ ਸਮੇਤ ਕਈ ਪ੍ਰਮੁੱਖ ਸ਼ਖਸੀਅਤਾਂ ਵਿਸ਼ੇਸ਼ ਮਹਿਮਾਨ ਵਜੋਂ ਪੁੱਜੀਆਂ। ਮੇਲੇ ਵਿੱਚ ਗਲੋਰੀ ਬਾਵਾ, ਔਜਲਾ ਬ੍ਰਦਰਜ਼, ਸੁਰਿੰਦਰ ਸਿੰਘ ਭਾਗੋਵਾਲੀਆ ਅਤੇ ਹੋਰ ਕਲਾਕਾਰਾਂ ਨੇ ਆਪਣੇ ਗੀਤਾਂ ਰਾਹੀਂ ਤੀਆਂ ਦੀ ਭਾਈਚਾਰਕ ਸਾਂਝ ਦਾ ਸੁਨੇਹਾ ਦਿੱਤਾ। ਮੇਲੇ ਦੀ ਪ੍ਰਧਾਨਗੀ ਨੈਸ਼ਨਲ ਐਵਾਰਡੀ ਡਾ. ਪਰਮਜੀਤ ਸਿੰਘ ਕਲਸੀ ਨੇ ਕੀਤੀ। ਇਸ ਦੌਰਾਨ ਮੈਨੇਜਰ ਅਤਰ ਸਿੰਘ ਦੀ ਪੁਸਤਕ ‘ਮਹਿਕ ਸੱਜਣਾ ਦੀ’ ਅਤੇ ਨੂਰ ਸ਼ਾਇਰਾ ਦੀ ਪੁਸਤਕ ‘ਸਾਹਾਂ ਦੀ ਬਾਜ਼ੀ’ ਲੋਕ ਅਰਪਣ ਕੀਤੀਆਂ ਗਈਆਂ। ਪ੍ਰਸਿੱਧ ਗਾਇਕ ਔਜਲਾ ਬ੍ਰਦਰਜ਼ ਨੂੰ ‘ਪਦਮ ਭੂਸ਼ਣ ਗੁਰਮੀਤ ਬਾਵਾ ਯਾਦਗਾਰੀ ਪੁਰਸਕਾਰ’ ਨਾਲ ਸਨਮਾਨਿਤ ਕੀਤਾ ਗਿਆ।