ਔਰਤ ਤੋਂ ਪੰਜ ਤੋਲੇ ਸੋਨਾ ਤੇ ਸਵਾ ਲੱਖ ਦੀ ਨਕਦੀ ਲੁੱਟੀ

ਜਗਜੀਤ ਸਿੰਘ

ਮੁਕੇਰੀਆਂ, 9 ਨਵੰਬਰ

ਇੱਥੇ ਟਾਂਡਾ ਰਾਮ ਸਹਾਏ ਨੇੜਲੀ ਬਾਬਾ ਹਿੰਮਤ ਸਿੰਘ ਕਲੋਨੀ ਵਿੱਚ ਬੀਤੀ ਰਾਤ ਚੋਰਾਂ ਨੇ ਘਰ ਦੇ ਬੂਹੇ ਤੋੜ ਕੇ 1.30 ਲੱਖ ਦੀ ਨਕਦੀ, ਪੰਜ ਤੋਲੇ ਸੋਨਾ ਅਤੇ ਹੋਰ ਕੀਮਤੀ ਸਾਮਾਨ ਚੋਰੀ ਕਰ ਲਿਆ।

ਘਰ ਦੀ ਮਾਲਕਣ ਬੀਬੀ ਕੁਲਵੰਤ ਕੌਰ ਨੇ ਦੱਸਿਆ ਕਿ ਉਸਦਾ ਪਤੀ ਰਵਿੰਦਰ ਸਿੰਘ ਬਿਮਾਰ ਹੈ ਜਿਸ ਦਾ ਇਲਾਜ ਜਲੰਧਰ ਦੇ ਇੱਕ ਹਸਪਤਾਲ ਵਿੱਚ ਚੱਲ ਰਿਹਾ ਹੈ। ਬੀਤੀ ਰਾਤ ਕਰੀਬ ਡੇਢ ਵਜੇ ਘਰ ਦਾ ਦਰਵਾਜ਼ਾ ਤੋੜ ਕੇ ਕਰੀਬ ਪੰਜ ਅਣਪਛਾਤੇ ਲੁਟੇਰੇ ਘਰ ਵਿੱਚ ਦਾਖਲ ਹੋ ਗਏ ਅਤੇ ਉਸਨੂੰ ਬੰਦੀ ਬਣਾ ਕੇ ਘਰ ਦੇ ਸਾਮਾਨ ਦੀ ਭੰਨ-ਤੋੜ ਕੀਤੀ।

ਇਸ ਦੌਰਾਨ ਉਹ 1.30 ਲੱਖ ਰੁਪਏ ਦੀ ਨਕਦੀ, ਸੋਨੇ ਦੇ ਤਿੰਨ ਟੋਪਸਾਂ ਦੀਆਂ ਜੋੜੀਆਂ, ਇੱਕ ਕਿੱਟੀ ਸੈੱਟ, ਤਿੰਨ ਮੁੰਦਰੀਆਂ, ਇੱਕ ਕੀਮਤੀ ਘੜੀ, ਦੋ ਮੋਬਾਈਲ ਫੋਨ ਲੈ ਗਏ। ਪੀੜਤਾ ਨੇ ਦੱਸਿਆ ਕਿ ਚੋਰਾਂ ਨੇ ਘਰੋਂ ਲੱਭੀ ਇੱਕ ਸ਼ਰਾਬ ਦੀ ਬੋਤਲ ਘਰ ਵਿੱਚ ਬੈਠ ਕੇ ਪੀਤੀ ਅਤੇ ਖਾਣ-ਪੀਣ ਦਾ ਸਾਮਾਨ ਵੀ ਲੈ ਗਏ। ਉਨ੍ਹਾਂ ਦੱਸਿਆ ਕਿ ਪੁਲੀਸ ਨੂੰ ਕੀਤੀ ਸ਼ਿਕਾਇਤ ਉਪਰੰਤ ਪੁਲੀਸ ਵਲੋਂ ਜਾਂਚ ਅਰੰਭ ਦਿੱਤੀ ਗਈ ਹੈ।

ਮਹੇੜੂ ਪਿੰਡ ਦੇ ਘਰ ’ਚੋਂ ਸਾਮਾਨ ਚੋਰੀ

ਫਗਵਾੜਾ (ਜਸਬੀਰ ਸਿੰਘ ਚਾਨਾ):

ਪਿੰਡ ਮਹੇੜੂ ਵਿਖੇ ਇੱਕ ਘਰ ’ਚੋਂ ਸਾਮਾਨ ਚੋਰੀ ਹੋਣ ਸਬੰਧੀ ਸਤਨਾਮਪੁਰਾ ਪੁਲੀਸ ਨੇ ਅਣਪਛਾਤੇ ਵਿਅਕਤੀਆਂ ਖਿਲਾਫ਼ ਕੇਸ ਦਰਜ ਕੀਤਾ ਹੈ। ਚਹੇੜੂ ਚੌਕੀ ਇੰਚਾਰਜ ਦਰਸ਼ਨ ਸਿੰਘ ਨੇ ਦੱਸਿਆ ਕਿ ਸ਼ਿਕਾਇਤ ਕਰਤਾ ਗੁਰਮੁਖ ਸਿੰਘ ਪੁੱਤਰ ਅਮਰ ਸਿੰਘ ਵਾਸੀ ਪਿੰਡ ਮਹੇੜੂ ਨੇ ਦੱਸਿਆ ਕਿ ਉਹ ਤੇ ਉਸਦੀ ਲੜਕੀ ਘਰ ’ਚ ਰਹਿੰਦੇ ਹਨ। ਉਸਦੀ ਲੜਕੀ ਪੜ੍ਹਨ ਗਈ ਸੀ ਤੇ ਉਹ ਰਿਸ਼ਤੇਦਾਰੀ ’ਚ ਕੰਮ ਗਿਆ ਸੀ। ਜਦੋਂ ਘਰ ਪਰਤਿਆ ਤਾਂ ਦੇਖਿਆ ਕਿ ਅੰਦਰੋਂ 60 ਹਜ਼ਾਰ ਰੁਪਏ, ਕੜਾ, ਮੁੰਦੀਆਂ ਤੇ ਹੋਰ ਸਾਮਾਨ ਗਾਇਬ ਸੀ। ਪੁਲੀਸ ਨੇ ਅਧਿਕਾਰੀਆਂ ਨੇ ਦੱਸਿਆ ਕਿ ਅਣਪਛਾਤੇ ਵਿਅਕਤੀਆਂ ਖਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ।