ਪੱਤਰ ਪ੍ਰੇਰਕ
ਫਗਵਾੜਾ, 6 ਅਕਤੂਬਰ
ਦਸਹਿਰੇ ਮੌਕੇ ਮੁਹੱਲਾ ਉਂਕਾਰ ਨਗਰ ਵਿੱਚ ਪ੍ਰਸ਼ਾਸਨ ਵੱਲੋਂ ਦੋ ਧਿਰਾਂ ਦੇ ਤਣਾਅ ਨੂੰ ਨਿਪਟਾਉਣ ਦੀ ਥਾਂ ਇੱਕ ਧਿਰ ਨੂੰ ਇੱਕ ਪੁਤਲਾ ਫੂਕਣ ਤੇ ਦੂਜੀ ਧਿਰ ਨੂੰ ਪੁਤਲਾ ਨਾ ਖੜ੍ਹਾ ਕਰਨ ਦੇ ਮਾਮਲੇ ਸਬੰਧੀ ਅੱਜ ਹਿੰਦੂ ਜਥੇਬੰਦੀਆਂ, ਵਿਧਾਇਕ ਤੇ ਪ੍ਰਮੁੱਖ ਸ਼ਹਿਰੀ ਲੋਕਾਂ ਨੇ ਇਸ ਦਾ ਤਿੱਖਾ ਵਿਰੋਧ ਕੀਤਾ ਹੈ। ਉਂਕਾਰ ਨਗਰ ਵਿੱਚ ਪੁਤਲੇ ਵਾਲੀ ਥਾਂ ’ਤੇ ਵਿਧਾਇਕ ਬਲਵਿੰਦਰ ਸਿੰਘ ਧਾਲੀਵਾਲ, ਸੁਰਿੰਦਰ ਮਿੱਤਲ, ਨਰੇਸ਼ ਭਾਰਦਵਾਜ ਮੌਕੇ ’ਤੇ ਪੁੱਜੇ। ਇਸ ਮੌਕੇ ਲੋਕਾਂ ਨੇ ‘ਆਪ’ ਆਗੂ ਜੋਗਿੰਦਰ ਸਿੰਘ ਮਾਨ, ਹਰਜੀ ਮਾਨ, ਦਲਜੀਤ ਰਾਜੂ, ਡੀਐੱਸਪੀ ਜਸਪ੍ਰੀਤ ਸਿੰਘ, ਐੱਸ.ਐੱਚ.ਓ ਸਿਟੀ ਅਮਨਦੀਪ ਨਾਹਰ ਖ਼ਿਲਾਫ਼ ਨਾਅਰੇਬਾਜ਼ੀ ਕਰਦਿਆਂ ਕਿਹਾ ਕਿ ਇਨ੍ਹਾਂ ਨੇ ਦਸਹਿਰੇ ਮੌਕੇ ਪੁਤਲੇ ਸਾੜਨ ’ਚ ਜੋ ਰੁਕਾਵਟ ਪਾਈ ਹੈ, ਉਸ ਨੂੰ ਹਿੰਦੂ ਸਮਾਜ ਕਦੇ ਮੁਆਫ਼ ਨਹੀਂ ਕਰੇਗਾ। ਉਨ੍ਹਾਂ ਕਿਹਾ ਕਿ ਜੇਕਰ ਇਨ੍ਹਾਂ ਆਗੂਆਂ ਖ਼ਿਲਾਫ਼ ਕੋਈ ਕਾਰਵਾਈ ਨਾ ਕੀਤੀ ਤਾਂ 48 ਘੰਟੇ ਬਾਅਦ ਹਿੰਦੂ ਸਮਾਜ ਇਕੱਠ ਕਰਕੇ ਜੀਟੀ ਰੋਡ ਜਾਮ ਕਰੇਗਾ। ਵਿਧਾਇਕ ਬਲਵਿੰਦਰ ਸਿੰਘ ਧਾਲੀਵਾਲ ਨੇ ਕਿਹਾ ਕਿ ਇਥੋਂ ਦੇ ‘ਆਪ’ ਆਗੂ ਅਫ਼ਸਰਸ਼ਾਹੀ ਨੂੰ ਨਾਲ ਰਲਾ ਕੇ ਲੋਕਾਂ ਨੂੰ ਬੁਰੀ ਤਰ੍ਹਾਂ ਪ੍ਰੇਸ਼ਾਨ ਕਰ ਰਹੇ ਹਨ ਤੇ ਉਹ ਜਲਦ ਹੀ ਇਹ ਸਾਰਾ ਮਾਮਲਾ ਮੁੱਖ ਮੰਤਰੀ ਦੇ ਧਿਆਨ ’ਚ ਲਿਆਉਣਗੇ।