ਸਰਬਜੀਤ ਸਿੰਘ ਗਿੱਲ
ਫਿਲੌਰ, 1 ਜੁਲਾਈ
ਪਿੰਡ ਨੰਗਲ ’ਚ ਛੱਪੜ ਦੇ ਮਸਲੇ ’ਤੇ ਪਿੰਡ ਦੀਆਂ ਦੋ ਧਿਰਾਂ ਅੱਜ ਉਸ ਵੇਲੇ ਆਹਮੋ-ਸਾਹਮਣੇ ਆ ਗਈਆਂ ਜਦੋਂ ਇੱਕ ਧਿਰ ਨੇ ਬੀਤੇ ਦਿਨੀਂ ਗੁਰੂ ਰਵਿਦਾਸ ਸਭਾਵਾਂ ਨੂੰ ਪਿੰਡ ਨੰਗਲ ਪੁੱਜਣ ਦਾ ਸੱਦਾ ਦਿੱਤਾ। ਪਿੰਡ ਦੀ ਪੰਚਾਇਤ ਧਿਰ ਵੱਲੋਂ ਪਿਛਲੇ ਕੁੱਝ ਦਿਨਾਂ ਤੋਂ ਛੱਪੜ ਦੀ ਸਫ਼ਾਈ ਕਰਵਾਈ ਜਾ ਰਹੀ ਸੀ। ਪੰਚਾਇਤ ਨੇ ਇੱਕ ਮਤੇ ਰਾਹੀ ਇਸ ਦੀ ਚਾਰਦੀਵਾਰੀ ਕਰਨ ਅਤੇ ਨੁਹਾਰ ਬਦਲਣ ਦਾ ਪ੍ਰੋਗਰਾਮ ਬਣਾਇਆ ਹੋਇਆ ਸੀ। ਦੂਜੀ ਧਿਰ ਨੇ ਕਿਹਾ ਕਿ ਪੰਚਾਇਤ ਦੇ ਛੱਪੜ ਦੀ ਸਫ਼ਾਈ ਕਰਵਾਉਣ ’ਤੇ ਕੋਈ ਇਤਰਾਜ਼ ਨਹੀਂ ਹੈ, ਪਰ ਸੜਕ ਦੇ ਨਾਲ ਲਗਦੇ ਬਰਮ ਨਾ ਛੇੜੇ ਜਾਣ ਅਤੇ ਡਾ. ਅੰਬਡੇਕਰ ਦੇ ਬੁੱਤ ਦੇ ਨੇੜੇ ਤੋਂ ਮਿਟੀ ਨਾ ਹਟਾਈ ਜਾਵੇ। ਇਸ ਦੌਰਾਨ ਥਾਣਾ ਮੁਖੀ ਮੁਖਤਿਆਰ ਸਿੰਘ ਨੇ ਸਥਿਤੀ ਨੂੰ ਕਾਬੂ ’ਚ ਰੱਖਿਆ। ਇਸ ਮੌਕੇ ਉਨ੍ਹਾਂ ਕਿਹਾ ਕਿ ਇਸ ਥਾਂ ਦੀ ਨਿਸ਼ਾਨਦੇਹੀ ਕੀਤੀ ਜਾਵੇਗੀ। ਨਾਇਬ ਤਹਿਸੀਲਦਾਰ ਜਸਵਿੰਦਰ ਸਿੰਘ ਸਮੇਤ ਹੋਰ ਅਧਿਕਾਰੀ ਹਾਜ਼ਰ ਸਨ। ਸਾਬਕਾ ਸਰਪੰਚ ਖੁਸ਼ੀ ਰਾਮ ਅਤੇ ਬਹੁਜਨ ਸਮਾਜ ਪਾਰਟੀ ਦੇ ਜਲੰਧਰ ਦਿਹਾਤੀ ਦੇ ਪ੍ਰਧਾਨ ਅੰਮ੍ਰਿਤ ਭੌਸਲੇ ਵੱਲੋਂ ਐਸਡੀਐਮ ਦੇ ਨਾਂ ’ਤੇ ਮੰਗ ਪੱਤਰ ਵੀ ਦਿੱਤਾ ਗਿਆ।